China Unicom Group ដែលជាប្រតិបត្តិករទូរគមនាគមន៍ធំជាងគេមួយរបស់ប្រទេសនឹងសាងសង់ខ្សែកាបអុបទិកក្រោមបាតសមុទ្រដែលគ្រប់គ្រងដោយរដ្ឋដំបូងគេនៅកម្ពុជា ដែលមានសមត្ថភាពធំសម្រាប់ការភ្ជាប់ទំនាក់ទំនងអន្តរជាតិ។
ក្រុមហ៊ុន China Unicom បានប្រកាសកាលពីម្សិលមិញដោយលើកឡើងពីកិច្ចព្រមព្រៀងដែលខ្លួនបានចុះហត្ថលេខាជាមួយក្រសួងប្រៃសណីយ៍ និងទូរគមនាគមន៍កម្ពុជានៅថ្ងៃដដែលនោះថា ខ្សែកាបអុបទិកក្រោមបាតសមុទ្រប្រវែងជិត ៣០០០គីឡូម៉ែត្រ នឹងរត់ពីទីក្រុងហុងកុងទៅកាន់ខេត្តព្រះសីហនុ។
ក្រុមហ៊ុនដែលមានមូលដ្ឋាននៅទីក្រុងប៉េកាំងបានបន្ថែមថា គម្រោងនេះនឹងចាប់ផ្តើមសាងសង់នៅថ្ងៃទី២ ខែមីនា ឆ្នាំក្រោយ ហើយនឹងបញ្ចប់នៅខែកក្កដា ឆ្នាំ២០២៥ ដោយគូសបញ្ជាក់ថា គម្រោងនេះនឹងធ្វើឱ្យកាន់តែស៊ីជម្រៅថែមទៀតនូវភាពជាដៃគូជាមួយប្រទេសកម្ពុជាលើការសាងសង់ហេដ្ឋារចនាសម្ព័ន្ធឌីជីថល និងសេដ្ឋកិច្ចឌីជីថលនាពេលអនាគត។
ក្រុមហ៊ុន China Unicom កាន់កាប់ស្ថានីយ៍ព្រំដែនខ្សែកាបអុបទិកជាង២០កន្លែង ដោយតភ្ជាប់ប្រទេសចិនជាមួយប្រទេសជិតខាង និងតំបន់ជាង១០ ដែលតភ្ជាប់ទៅកាន់ប្រព័ន្ធខ្សែកាបអុបទិកអន្តរជាតិជាង២០ (land optical fiber cable border stations) ។ ក្រុមហ៊ុនក៏មានស្ថានីយ៍ខ្សែកាបក្រោមបាតសមុទ្រចំនួន១០ (submarine cable landing stations) នៅទូទាំងពិភពលោក និងប្រព័ន្ធខ្សែកាបក្រោមបាតសមុទ្រជាង៦០។
ខ្សែកាបក្រោមបាតសមុទ្រ SEA-H2X ដែលត្រូវបានសហការផ្តួចផ្តើមឡើងដោយក្រុមហ៊ុន China Unicom តភ្ជាប់ទីក្រុងហុងកុង ខេត្តហៃណានភាគខាងត្បូងប្រទេសចិន ហ្វីលីពីន ថៃ ម៉ាឡេស៊ី និងសិង្ហបុរី និងពង្រីកបន្ថែមទៀតទៅកាន់ប្រទេសវៀតណាម កម្ពុជា និងឥណ្ឌូនេស៊ី។ Yicaiglobal