លោក ហ៊ុន ម៉ាណែត នាយករដ្ឋមន្ត្រីបានណែនាំ និងជំរុញដល់អាជ្ញាធរខេត្តជាប់សមុទ្ររួមគ្នាទប់ស្កាត់បទល្មើសឧក្រិដ្ឋកម្មឆ្លងដែន និងបទល្មើសនានា ដើម្បីបន្តរក្សាកិត្តិនាមជាសមាជិកក្លិបឆ្នេរស្អាតបំផុតនៅលើពិភបលោក និងស័ក្តិសមជាតារារៈនាទិសនិរតី។
ក្នុងអធិបតីភាពប្រកាសបិទ ពិធីបុណ្យសមុទ្រលើកទី១០ ដែលធ្វើឡើងនៅខេត្តកែប កាលពីរសៀលថ្ងៃអាទិត្យ លោក ហ៊ុន ម៉ាណែត បញ្ជាក់ថា អាជ្ញាធរមូលដ្ឋានខេត្តជាប់សមុទ្រ ជាពិសេសនៅតំបន់ទេសចរណ៍ ត្រូវបន្តយកចិត្តទុកដាក់ខ្ពស់ក្នុងការថែរក្សាសន្តិសុខ និងសណ្តាប់ធ្នាប់សម្រាប់ភ្ញៀវទេសចរណ៍។
លោកបន្ថែមថា៖ «ខ្ញុំសូមលើកទឹកចិត្តឱ្យមានការពង្រឹងសុវត្ថិភាពនៅគ្រប់គោលដៅទេសចរណ៍ទាំងអស់ និងមិនត្រូវឱ្យតំបន់គោលដៅទេសចរណ៍ទាំងនេះ រួមទាំងតំបន់តាមឆ្នេរសមុទ្រ ក្លាយទៅជាតំបន់ជ្រកកោន នៃអ្នកប្រើប្រាស់គ្រឿងញៀន ជួញដូរមនុស្ស និងឧក្រិដ្ឋកម្មឆ្លងដែនឡើយ»។
លោកបន្តថា៖ «សូមស្នើអាជ្ញាធរខេត្តតំបន់ឆ្នេរសមុទ្រទាំងអស់ និងបងប្អូនប្រជាពលរដ្ឋក្នុងខេត្តទាំងបួន (ព្រះសីហនុ កំពត កែប កោះកុង) រួមគ្នារក្សាឱ្យបាននូវកិត្តិនាមជាសមាជិកក្លិបឆ្នេរសមុទ្រដែលស្អាតបំផុតលើសកលលោក និងឱ្យស័ក្តិសមជាកិត្តិនាមជាតារារះនាទិសនិរតី»។
លោកថ្លែងថា រដ្ឋាភិបាលអាណត្តិទី៧ នឹងនៅតែចាត់ទុកក្លិបឆ្នេរសមុទ្រ ដែលស្អាតបំផុតលើសកលលោក ជាដៃគូដ៏សំខាន់ក្នុងក្របខណ្ឌនៃការគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា។
លោក ហ៊ុន ម៉ាណែត បន្ថែមថា ក្រសួង ស្ថាប័ន និងអាជ្ញាធរ ត្រូវរួមគ្នាចូលរួមក្នុងចលនាទីក្រុងស្អាត រមណីយស្អាត សេវាល្អ បដិសណ្ឋារកិច្ចល្អ និងថែរក្សាអនាម័យបរិស្ថានឱ្យល្អស្អាត ដើម្បីថែរក្សាតំបន់ឆ្នេរឱ្យបានស្អាតល្អ ជាពិសេសចូលរួមសហការថែរក្សសោភណ្ឌភាព អនាម័យ និងបរិស្ថាន ដែលមិនអាចខ្វះបានក្នុងការថែរក្សាតំបន់ឆ្នេរសមុទ្រឱ្យស្រស់ស្អាតយូរអង្វែងសម្រាប់ជាមរតកដល់កូចចៅជំនាន់ក្រោយ។
លោកនាយករដ្ឋមន្ត្រី ក៏បានជំរុញក្រសួងពាក់ព័ន្ធត្រូវផ្តល់អាទិភាពអភិវឌ្ឍន៍តំបន់ឆ្នេរ ជាពិសេសកសាងហេដ្ឋារចនាសម្ពន្ធចាំបាច់សម្រាប់បម្រើដល់វិស័យទេសចរណ៍ និងត្រូវពង្រីកការតភ្ជាប់ពីតំបន់មួយទៅតំបន់មួយទាំងផ្លូវគោក ផ្លូវដែក ផ្លូវអាកាស ដើម្បីបង្កភាពងាយស្រួលដល់ការធ្វើដំណើរកម្សាន្តរបស់ភ្ញៀវទេសចរ។
លោក ឡោ សុវិជ្ជា អគ្គនាយករងអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ បានឱ្យដឹងថា ក្រុមការងារប្រយុទ្ធប្រឆាំងគ្រឿងញៀនក្នុងវិស័យទេសចរណ៍ គឺរាល់ពិធីបុណ្យសមុទ្រ និងបុណ្យទន្លេ គឺសាធារណជនតែងគាំទ្រចូលរួមទស្សនា និងសិក្សាស្វែងយល់ពីបញ្ហាគ្រឿងញៀនយ៉ាងច្រើនកុះករ ដើម្បីទទួលបានចំណេះដឹងកាន់តែច្បាស់ពីបញ្ហាគ្រឿងញៀន ជួញដូរមនុស្ស និងរាល់បទល្មើសនានា។
លោក លឹម តុងហួត ប្រធាននាយកដ្ឋានផ្សព្វផ្សាយអប់រំ និងទំនាក់ទំនងសាធារណ: នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា បុណ្យសមុទ្រលើកទី១០ ក្រោមប្រធានបទ «យើងទាំងអស់គ្នាដើម្បីទេសចរណ៍»។
លោកបន្ថែមថា បុណ្យសមុទ្រលើកទី១០ ធ្វើឡើងនៅខេត្តកែប កាលពីថ្ងៃទី១ ដល់ថ្ងៃទី៣ ខែធ្នូ ឆ្នាំ២០២៣ ដែលមានថ្នាក់ដឹកនាំកំពូលរបស់ជាតិ និងសាធារណជនចូលរួមយ៉ាងច្រើនកុះករ និងបានចូលទស្សនាសិក្សាស្វែងយល់ និងទទួលឯកសារសម្រាប់ផ្សព្វផ្សាយបន្ត ដើម្បីរួមចំណែកកសាងបាននូវភូមិ ឃុំ មានសុវត្ថិភាពពីបញ្ហាគ្រឿងញៀន ដែលបង្កទៅជាបទល្មើសនានា។
លោកបានបញ្ជាក់ថា អាជ្ញាធរជាតិប្រយុទ្ធប្រឆាំងគ្រឿងញៀន បានដាក់ចេញសេចក្តីណែនាំឱ្យភាគីពាក់ព័ន្ធពង្រឹងប្រសិទ្ធភាពការងារ ដែលតម្រូវឱ្យគ្រប់ក្រសួង ស្ថាប័ន និងថ្នាក់ក្រោមជាតិទាំងអស់ ត្រូវផ្សព្វផ្សាយឱ្យបានទូលំ ទូលាយពីផលវិបាក និងគ្រោះថ្នាក់នៃគ្រឿងញៀន ឥទ្ធិពលនៃគ្រឿងញៀន និងអប់រំដាស់តឿន ក្រើនរំលឹកដល់មន្ត្រីគ្រប់ជាន់ថ្នាក់ និងប្រជាពលរដ្ឋគ្រប់ស្រទាប់ឱ្យចៀសឆ្ងាយពីគ្រឿងញៀន៕