ស្ពានកោះពេជ្រ-កោះនរា ត្រូវបានបើកឱ្យប្រើប្រាស់បណ្តោះអាសន្ន ចាប់ពីថ្ងៃនេះតទៅ វេលាម៉ោង ៦:០០ព្រឹក ដើម្បីកាត់បន្ថយការកកស្ទះចរាចរណ៍ នៅចំណុចការដ្ឋានសាងសង់ស្ពានអាកាសព្រះមុនីវង្ស។
ដំណឹងល្អនេះត្រូវបានមន្ទីរសាធារណការ និងដឹកជញ្ជូនរាជធានីភ្នំពេញប្រកាសកាលពីម្សិលមិញ។
ស្ពានខ្សែកាបដែលតភ្ជាប់ពីទីក្រុងរណបកោះពេជ្រទៅតំបន់អភិវឌ្ឍន៍កោះនរា ក្នុងខណ្ឌច្បារអំពៅ រាជធានីភ្នំពេញ ធ្លាប់ត្រូវបានបើកឱ្យប្រើប្រាស់ជាបណ្ដោះអាសន្នក្នុងឱកាសបុណ្យភ្ជុំបិណ្ឌកាលពីសប្តាហ៍មុន ដើម្បីសម្រួលដល់ការធ្វើដំណើររបស់ប្រជាពលរដ្ឋ។
ស្ពានដែលសាងសង់ជិតរួចរាល់ និងដែលត្រូវបានបើកការដ្ឋានសាងសង់ក្នុងខែតុលា ឆ្នាំ២០២០ ក្នុងតម្លៃសរុប ៣៨ លានដុល្លារអាមេរិក ដោយសាជីវកម្មវិនិយោគកម្ពុជាក្រៅប្រទេស (Overseas Cambodian Investment Corporation-OCIC) ដែលជាក្រុមហ៊ុនឯកជនវិនិយោគតំបន់អភិវឌ្ឍន៍កោះនរាទាំងស្រុង គ្រោងនឹងសម្ពោធដាក់ឱ្យប្រើប្រាស់ជាផ្លូវការនៅខែវិច្ឆិកា ឆ្នាំ ២០២៣។
នៅពេលដាក់ឱ្យដំណើរការ ស្ពានខ្សែកាបដែលមានបណ្តោយប្រវែង ៨២៤ម៉ែត្រ និងទទឹង ២៤,៥ ម៉ែត្រ នឹងកាត់បន្ថយការកកស្ទះចរាចរណ៍លើផ្លូវជាតិលេខ ១ ស្ថិតនៅខាងត្បូងតំបន់អភិវឌ្ឍន៍កោះនរា និងលើកកម្ពស់សេដ្ឋកិច្ចក្នុងស្រុកដោយសម្រួលដល់ការដឹកជញ្ជូនទំនិញនិងមនុស្ស។
AKP- C.Nika