បេឡាជាតិសន្តិសុខសង្គម (ប.ស.ស.) ដែលជាសេនាធិការរបស់ក្រសួងការងារ និងបណ្តុះបណ្តាលវិជ្ជាជីវៈ ទទួលបានពានរង្វាន់អង្គភាពឆ្នើមពង្រីកការគ្របដណ្តប់របបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តដល់បុគ្គលស្វ័យនិយោជន៍ និងអ្នកក្នុងបន្ទុកសមាជិក នៅទីក្រុងកូឡាឡាំពួ ប្រទេសម៉ាឡេស៊ី កាលពីថ្ងៃអង្គារ។
លោក ម៉េង ហុង អគ្គនាយកបេឡាជាតិសន្តិសុខសង្គមស្តីទី ដែលជាតំណាងកម្ពុជាបានទៅទទួលពានរង្វាន់ផ្ទាល់ពីប្រធានផ្លាស់វេននៃសមាគមសន្តិសុខសង្គមអាស៊ាន (ASSA) ឆ្នាំ២០២២-២០២៣។
លោក ម៉េង ហុង បានឱ្យដឹងថា គិតរហូតមកដល់ពេលនេះ ប.ស.ស.ធ្លាប់ទទួលបានពានរង្វាន់អង្គភាពឆ្នើមស្តីពី ការអនុវត្តរបបសន្តិសុខសង្គមបានចំនួន ៧លើក ពីសមាគមសន្តិសុខសង្គមអាស៊ាន (ASSA) ហើយពាន់រង្វាន់អង្គភាពឆ្នើមដែលទទួលបាននាពេលនេះ គឺជាពានរង្វាន់ទី៨ ដែលប្រធានសមាគមសន្តិសុខសង្គមអាស៊ាន (ASSA) បានផ្តល់ជូន។
កាលពីថ្ងៃពុធ ប.ស.ស.បានប្រកាសថា ការផ្ដល់ពានរង្វាន់អង្គភាពឆ្នើមនេះ ធ្វើឡើងក្នុងកិច្ចប្រជុំប្រឹក្សាភិបាលនៃសមាគមសន្តិសុខសង្គមអាស៊ាន (ASSA) លើកទី៤០ នៅទីក្រុងកូឡាឡាំពួ ប្រទេសម៉ាឡេស៊ី ដោយមានសមាភាពចូលរួមពីតំណាងស្ថាប័នសន្តិសុខសង្គមនៃសមាគមសន្តិសុខសង្គមអាស៊ាន (ASSA) ចំនួន ២០ស្ថាប័ន ដែលមកពីបណ្តាប្រទេសចំនួន១០។
ប.ស.ស.បញ្ជាក់ថា ក្នុងកិច្ចប្រជុំប្រឹក្សាភិបាលនៃសមាគមសន្តិសុខសង្គមអាស៊ាន (ASSA) លើកទី៤០ សមាជិកទាំងអស់ក៏បានពិនិត្យ និងពិភាក្សាអំពីវឌ្ឍនភាពនៃផែនការសកម្មភាពឆ្នាំ២០២២-២០២៣ របស់សមាគមសន្តិសុខសង្គមអាស៊ាន (ASSA) និងផែនសកម្មភាពការងារបន្តសម្រាប់ឆ្នាំ២០២៣-២០២៤ របស់សមាគមផងដែរ។
លោក ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម បានឱ្យដឹងថា ការកសាងសមត្ថភាពធនធានមនុស្ស គឺជាយុទ្ធសាស្រ្តមួយក្នុងចំណោមយុទ្ធសាស្ត្រជាអាទិភាពដទៃផ្សេងទៀត ដែលប.ស.ស.ចាំបាច់ក្នុងការពង្រឹងសមត្ថភាពធនធានមនុស្ស ដើម្បីឆ្លើយតបទៅនឹងការអនុវត្តការងារប្រចាំថ្ងៃឱ្យមានប្រសិទ្ធភាព ផលិតភាព និងគុណភាព ដើម្បីធានាឱ្យការផ្ដល់សេវាសាធារណៈប្រកបដោយប្រសិទ្ធភាព និងភាពជឿជាក់។
លោកបន្ថែមថា បច្ចុប្បន្ន ប.ស.ស.បានរៀបចំផែនការផ្សព្វផ្សាយចំនួន ៤ ០០០លើក សម្រាប់ក្រុមគោលដៅសរុបប្រមាណ ១លាន ២០ម៉ឺននាក់ ដើម្បីធ្វើយ៉ាងណាឱ្យកម្មករនិយោជិត និងប្រជាពលរដ្ឋដែលជាអ្នកប្រកបរបរផ្ទាល់ខ្លួនទទួលបានការយល់ដឹងកាន់តែច្បាស់ និងស៊ីជម្រៅ ពីរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត។
លោកបញ្ជាក់ថា ជាលទ្ធផលនៃយុទ្ធនាការតាមរោងចក្រ សហគ្រាស ផ្ទះជួល ផ្សារ និងទីប្រជុំជន នៅទូទាំងប្រទេស គិតត្រឹមថ្ងៃអង្គារ ប.ស.ស.បានផ្សព្វផ្សាយសរុបចំនួន ១០៤៩លើក ដែលមានអ្នកចូលរួមចំនួន ៣៥៣ ០៥៧នាក់ ស្មើនឹង ៣០% នៃផែនការដែលបានគ្រោងទុក។
ក្នុងពិធីផ្សព្វផ្សាយស្តីពីរបបសន្តិសុខសង្គមផ្នែកថែទាំសុខភាព នៅរាជធានីភ្នំពេញ កាលពីថ្ងៃពុធ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា របបសន្តិសុខសង្គមផ្នែកថែទាំសុខភាពតាមរបបភាគទានដោយស័្មគ្រចិត្ត គឺជាការពង្រីកវិសាលភាពបន្ថែម ដើម្បីឆ្លើយតបទៅនឹងកំណើននៃតម្រូវការ និងសេចក្តីប្រាថ្នាក្នុងការចង់ក្លាយទៅជាសមាជិក ប.ស.ស.។
ការឆ្លើយតបទៅនឹងតម្រូវការ និងចង់ក្លាយទៅជាសមាជិក ប.ស.ស.ក្នុងចំណោមប្រជាពលរដ្ឋក្នុងវិស័យសេដ្ឋកិច្ចក្រៅប្រព័ន្ធ ជាពិសេសបុគ្គលស្វ័យនិយោជន៍ ព្រមទាំងពីសំណាក់សមាជិក ប.ស.ស.ដែលប្រាថ្នាចង់បានការថែទាំសុខភាពទៅដល់សមាជិកគ្រួសាររបស់ខ្លួនបន្ថែមទៀត។
លោកបន្ថែមថា បច្ចុប្បន្ន ប.ស.ស.បានក្លាយជានិមិត្តរូបនៃសុខភាព និងការរីកចម្រើនរបស់ប្រជាជន និងកម្មករនិយោជិត ដែលបានជួយកាត់បន្ថយបន្ទុកចំណាយ ពង្រឹងស្ថិភាព និងការព្យាករបាននៃចំណូល និងធ្វើឱ្យប្រសើរឡើងនូវសុខភាពរបស់ខ្លួន។
លោក ហេង សួរ បញ្ជាក់ថា ការអនុវត្តកម្មវិធីរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តនេះ ជាសមិទ្ធផលមួយ ដែលបង្ហាញឱ្យឃើញថា រដ្ឋាភិបាលតែងតែយកចិត្តទុកដាក់ជាចម្បងបំផុត ទៅដល់សុខុមាលភាពរបស់កម្មករនិយោជិត ក៏ដូចជាប្រជាពលរដ្ឋនៅទូទាំងប្រទេស ដោយមិនទុកឱ្យនរណាម្នាក់មិនទទួលបានការព្យាបាលជំងឺ នៅពេលដែលមានជំងឺនោះឡើយ ដែលនេះជាការគ្របដណ្ដប់ឆ្ពោះទៅរកការគ្របដណ្តប់សុខភាពជាសកល។
គួររម្លឹកថា គិតរហូតមកដល់បច្ចុប្បន្ននេះ ប.ស.ស.បាននឹងកំពុងដំណើរការរបបសន្តិសុខសង្គមចំនួន ៣ផ្នែក គឺមានផ្នែកហានិភ័យការងារ ផ្នែកថែទាំសុខភាព និងផ្នែកប្រាក់សោធន។
កាលពីថ្មីៗនេះ រដ្ឋាភិបាលបានសម្រេចដាក់ចេញនូវគោលនយោបាយថ្មីមួយ ដើម្បីប្រជាពលរដ្ឋមានរបរផ្ទាល់ខ្លួន (បុគ្គលស្វ័យនិយោជន៍) រួមទាំងអ្នកក្នុងបន្ទុកសមាជិក ប.ស.ស. ក៏អាចមានសិទ្ធិស្នើសុំធ្វើបណ្ណសមាជិក ប.ស.ស. បានផងដែរ ហើយបណ្ណ ប.ស.ស.នឹងទទួលបានការធានារ៉ាប់រងលើការថែទាំសុខភាពពេញ ២៤ម៉ោង លើ២៤ម៉ោង៕