ក្រសួងសេដ្ឋកិច្ច និងហិរញ្ញវត្ថុក្រោមកិច្ចសហការជាមួយមូលនិធិវិនិយោគអាកាសធាតុ (CIF) និងធនាគារអភិវឌ្ឍន៍អាស៊ី (ADB) កំពុងរៀបចំវេទិកាអន្តរជាតិរយៈពេលបួនថ្ងៃ ក្នុងគោលបំណងផ្លាស់ប្តូរបទពិសោធន៍ ដើម្បីដោះស្រាយការប្រែប្រួលអាកាសធាតុ ការគ្រប់គ្រងព្រៃឈើប្រកបដោយនិរន្តរភាព និងដំណោះស្រាយផ្អែកលើធម្មជាតិនៅក្នុងតំបន់អាស៊ីប៉ាស៊ីហ្វិក។
ពិធីបើកកាលពីម្សិលមិញត្រូវបានធ្វើឡើងក្រោមប្រធានបទ “កម្មវិធីផ្លាស់ប្តូរចំណេះដឹងក្នុងតំបន់អាស៊ីប៉ាស៊ីហ្វិក Asia-Pacific Knowledge Exchange” (APKE) បានប្រព្រឹត្តទៅក្រោមអធិបតីភាពលោក អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុនៅសណ្ឋាគារSofitel Phnom Penh Phokeethra។
នៅក្នុងឱកាសនោះក៏មានការចូលរួមពីលោក LautimuiaAfoaUeleseVa’aiរដ្ឋមន្ត្រីក្រសួងហិរញ្ញវត្ថុនៃរដ្ឋឯករាជ្យសាម័រ លោក Warren Evans ទីប្រឹក្សាជាន់ខ្ពស់ និងបេសកជនអាកាសធាតុរបស់ ADB និងលោកស្រីTariyeGbadegesinនាយិការប្រតិបត្តិនៃ CIF និងលោក Jyotsana Varma នាយក ADB ប្រចាំកម្ពុជា។
លោក អូន ព័ន្ធមុនីរ័ត្ន បាននិយាយថា រាជរដ្ឋាភិបាល ក្រោមការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត បានដាក់ចេញ “យុទ្ធសាស្ត្របញ្ចកោណដំណាក់កាលទី១” សម្រាប់កំណើនការងារ សមធម៌ ប្រសិទ្ធភាព និងចីរភាព។
លោកបានបន្តថា “រាជរដ្ឋភិបាលបានកំណត់គោលដៅយុទ្ធសាស្ត្រជាក់លាក់ចំនួនប្រាំ ដែលយុទ្ធសាស្រ្តទី៥គឺធានានិរន្តរភាពនៃការអភិវឌ្ឍន៍សេដ្ឋកិច្ចសង្គមនៅកម្ពុជា និងដើម្បីកសាងភាពធន់នឹងការប្រែប្រួលអាកាសធាតុ។
លោកបានបន្ថែមថា កម្ពុជាបានប្តេជ្ញាចិត្តខ្ពស់ចំពោះអាកាសធាតុតាមរយៈ “ការរួមចំណែកដែលបានកំណត់ដោយថ្នាក់ជាតិ (NDC)” និង “យុទ្ធសាស្ត្ររយៈពេលវែងសម្រាប់អព្យាក្រឹតភាពកាបូន (LTS4CN)” ដើម្បីសម្រេចបាននូវអព្យាក្រឹតភាពកាបូននៅឆ្នាំ ២០៥០។
យោងតាមក្រសួងសេដ្ឋកិច្ចវេទិកាដែលធ្វើឡើងចាប់ពីថ្ងៃទី១-៤ ខែមេសា ត្រូវបានរៀបចំឡើងក្នុងគោលបំណងចែករំលែកចំណេះដឹង បទពិសោធន៍ និងដំណោះស្រាយរវាង CIFក៏ដូចជាបណ្តាប្រទេសដែលចូលរួមក្នុងការអនុវត្តគម្រោង និងកម្មវិធីផ្សេងៗស្តីពីភាពធន់នឹងអាកាសធាតុ។
លោកស្រីGbadegesinបាននិយាយថា “CIF មានកិច្ចសហការយ៉ាងទូលំទូលាយជាមួយប្រទេសនានា និងជំរុញសកម្មភាពអាកាសធាតុ តាមរយៈការវិនិយោគដែលបង្កើតភាពធន់សម្រាប់មនុស្ស ហេដ្ឋារចនាសម្ព័ន្ធ និងប្រព័ន្ធអេកូឡូស៊ីក្នុងបណ្តាប្រទេសដែលងាយរងគ្រោះដោយអាកាសធាតុបំផុតមួយចំនួនក្នុងពិភពលោក។
“នៅក្នុងតំបន់អាស៊ីប៉ាស៊ីហ្វិកវិញ យើងមានឧទាហរណ៍ដ៏ច្រើននៃភាពជោគជ័យ ក៏ដូចជាបញ្ហាប្រឈមនានាដែលជាមេរៀនជាក់ស្តែងពីការអនុវត្តគម្រោងពិតៗដែលប៉ះជះឥទ្ធិពលដល់ជីវិតរស់នៅ»។
ចំណេះដឹង បទពិសោធន៍ និងភស្តុតាងផ្តល់ឱ្យយើងច្រើនជាងការយល់ដឹងអំពីរបៀបដែលយើងកំពុងកសាងភាពធន់នឹងការប្រែប្រួលអាកាសធាតុ។ លោកស្រីបានបន្ថែមថា មេរៀនទាំងនេះជួយយើងសិក្សារៀនសូត្របន្ថែម និងជូនព័ត៌មានអំពីការវិនិយោគ និងអន្តរាគមន៍នាពេលអនាគតរបស់យើងនៅប្រទេសកម្ពុជា តំបន់អាស៊ីប៉ាស៊ីហ្វិក និងតំបន់ផ្សេងទៀត។
របៀបវារៈថ្ងៃដំបូងមានកម្មវិធីពិភាក្សាស្តីពី ‘ហិរញ្ញវត្ថុអាកាសធាតុសម្រាប់ភាពធន់នៅក្នុងតំបន់អាស៊ីប៉ាស៊ីហ្វិក’ សម្របសម្រួលដោយ Srinivasan Anchaអ្នកឯកទេសផ្នែកបំរែបំរួលអាកាសធាតុរបស់ ADB ដោយមានលោកEmmanuel Kouadioអ្នកដឹកនាំកម្មវិធីភាពធន់នឹងអាកាសធាតុនៃ CIF ជាអ្នកធ្វើបទបង្ហាញ។
កិច្ចពិភាក្សានេះមានការចូលរួមពីលោក អ៊ូ ច័ន្ទធារិទ្ធ ប្រធាននាយកដ្ឋានវិទ្យាសាស្ត្រ និងបច្ចេកវិទ្យា នៃក្រសួងបរិស្ថានរួមជាមួយនឹងលោកស្រី Colleen McGinn ទីប្រឹក្សាពិសេសនៃវិទ្យាស្ថានសម្រាប់ការផ្លាស់ប្តូរសង្គម និងបរិស្ថាន-អន្តរជាតិ លោក Jakob Ekinye មន្រ្តីទំនាក់ទំនង CIF នៃប្រទេសប៉ាពួញូហ្គីណេ លោក Zhihong Zhang អ្នកជំនាញហិរញ្ញវត្ថុជាន់ខ្ពស់នៃធនាគារពិភពលោក និង Habiba Gitayទីប្រឹក្សាអភិវឌ្ឍន៍ធន់នឹងអាកាសធាតុនៃអ្នកជំនាញឯករាជ្យ។
វគ្គនេះបានលើកឡើងពីលទ្ធផលនៃភាពធន់សំខាន់ៗដែលសម្រេចបានរហូតមកដល់បច្ចុប្បន្នតាមរយៈកម្មវិធីផែនការរបស់ CIF សម្រាប់ភាពធន់នឹងអាកាសធាតុ (PPCR) និងបានគូសបញ្ជាក់អំពីតម្រូវការ និងយុទ្ធសាស្ត្រជាអាទិភាពនាពេលអនាគតនៅក្នុងតំបន់នេះ។
វេទិកានេះក៏មានការចូលរួមពីតំណាងក្រសួងពាក់ព័ន្ធ ដៃគូអភិវឌ្ឍន៍ ស្ថាប័នស្រាវជ្រាវ និងក្រុមសហគមន៍មូលដ្ឋានក្នុងប្រទេសកម្ពុជា ព្រមទាំងប្រទេសចំនួន១៣ផ្សេងទៀតនៅទូទាំងតំបន់អាស៊ីប៉ាស៊ីហ្វិក រួមមាន បង់ក្លាដែស ប៊ូតាន ហ្វីជី ឥណ្ឌា ឥណ្ឌូនេស៊ី កៀហ្ស៊ីស៊ីស្ថាន ឡាវនេប៉ាល់ ប៉ាពួញូហ្គីណេ ហ្វីលីពីន សាម័រ តាហ្ស៊ីគីស្ថាន និងតុងហ្គោ។