អាកាសយានដ្ឋានអន្តរជាតិសៀមរាប-អង្គរ នឹងបើកដំណើរការទទួលជើងហោះហើរជាផ្លូវការនៅថ្ងៃទី ១៦ ខែតុលា បន្ទាប់ពីការដាក់អោយធ្វើតេស្តសាកល្បងដោយជោគជ័យរួមមានការផ្តល់សំបុត្រយន្តហោះ ការឡើងយន្តហោះ និងការចុះចត ព្រមទាំងនីតិវិធីចាំបាច់ជាច្រើនទៀត។
អាកាសយានដ្ឋានអន្តរជាតិសៀមរាប-អង្គរមានចំណតសម្រាប់ចតយន្តហោះចំនួន ៣៨ចំណត និងអាចទទួលអ្នកដំណើរតាមផ្លូវអាកាសបាន ៧លាននាក់ក្នុងមួយឆ្នាំ សម្រាប់ឆ្នាំ២០២៣ និង ១២លាននាក់ ក្នុងមួយឆ្នាំ ចាប់ពី២០៤០។
លើសពីនេះ អាកាសយាន្តដ្ឋាននេះ អាចផ្ទុកទំនិញតាមផ្លូវអាកាសចំនួន ១០ ០០០តោន ក្នុងមួយឆ្នាំចាប់ពីឆ្នាំ ២០២៣ និង ២៦ ០០០ តោន ក្នុងមួយឆ្នាំ ចាប់ពីឆ្នាំ២០៤០ ព្រមទាំងអាចទទួលជើងហោះហើរបានពី ៦៥ ៨០០ជើងក្នុងមួយឆ្នាំ ចាប់ពីឆ្នាំ ២០២៣ ទៅ ១១២ ៧០០ ជើង ក្នុងមួយឆ្នាំ ចាប់ពីឆ្នាំ២០៤០។
តាមការគ្រោងទុក នៅថ្ងៃទី១ ខែធ្នូ ឆ្នាំ២០២៣ អាកាសយានដ្ឋានអន្តរជាតិសៀមរាប-អង្គរនឹងបើកសម្ពោធជាផ្លូវការ ក្រោមអធិបតីភាពឯកឧត្តមបណ្ឌិត ហ៊ុន ម៉ាណែត នាយករដ្ឋមន្ត្រីនៃកម្ពុជា។
ការសាងសង់អាកាសយានដ្ឋានអន្តរជាតិសៀមរាប-អង្គរ បានចាប់ផ្តើមនៅក្នុងខែមីនា ឆ្នាំ ២០២០ ជាមួយនឹងការវិនិយោគប្រមាណ ១,១ ពាន់លានដុល្លារ ដោយក្រុមហ៊ុន Angkor International Airport Investment (Cambodia) Co., Ltd.
យោងតាមរបាយការណ៍របស់រដ្ឋលេខាធិការដ្ឋានអាកាសចរស៊ីវិល កម្ពុជាបានចុះបញ្ជីអ្នកដំណើរតាមផ្លូវអាកាសចំនួន ៣,៤ លាននាក់ ក្នុងរយៈពេល ៨ ខែដំបូងនៃឆ្នាំ ២០២៣ កើនឡើង ១៨០ ភាគរយធៀបនឹងឆ្នាំមុន។
វិស័យទេសចរណ៍គឺជាសសរស្តម្ភមួយក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចរបស់កម្ពុជា។ ក្នុរងឆ្នាំ២០១៩ កម្ពុជាទទួលបានភ្ញៀវទេសចរអន្តរជាតិរហូតដល់ ៦.៦១លាននាក់ដែលរកបានចំណូលសរុបចំនួន ៤.៩២ពាន់លានដុល្លារអាមេរិក នេះបើយោងតាមក្រសួងទេសចរណ៍។AKP-CheaVannak