រដ្ឋាភិបាលកម្ពុជា តាមរយៈក្រសួងធនធានទឹក និងឧតុនិយម បានស្នើរដ្ឋាភិបាលឥណ្ឌា ផ្ដល់រូបភាពពីផ្កាយរណបសម្រាប់ព្យាករទឹកជំនន់ក្នុងរដូវវស្សាឱ្យមានប្រសិទ្ធភាព និងបណ្ដុះបណ្ដាធនធានមនុស្សលើវិស័យពាក់ព័ន្ធរបស់ក្រសួងបន្ថែម។
ការស្នើខាងលើនេះ ធ្វើឡើងក្នុងជំនួបពិភាក្សាការងាររវាងលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ជាមួយលោកស្រី ដេវ្យានី ខូបប្រាហ្កាដេ
(DEVYANI KHOBRAGADE) ឯកអគ្គរដ្ឋទូតឥណ្ឌាប្រចាំកម្ពុជា នៅទីស្ដីការក្រសួងកាលពីថ្ងៃចន្ទ។
ក្នុងជំនួបនេះ លោក ថោ ជេដ្ឋា បានថ្លែងអរគុណដល់លោកស្រីឯកអគ្គរដ្ឋទូតឥណ្ឌា និងគណៈប្រតិភូ ជាពិសេសអរគុណដល់រដ្ឋាភិបាលសាធារណរដ្ឋឥណ្ឌា ដែលតែងផ្តល់ជំនួយគាំទ្រទាំងសម្ភារៈ និងថវិកា ព្រមទាំងផ្តល់នូវកិច្ចសហប្រតិបត្តិការយ៉ាងល្អលើវិស័យធនធានទឹកសម្រាប់ក្រសួង។
រដ្ឋមន្ត្រីក្រសួងធនធានទឹក និងឧតុនិយម បានស្នើភាគីតំណាងរដ្ឋាភិបាលឥណ្ឌា បន្តផ្ដល់កិច្ចសហប្រតិបត្តិការលើវិស័យអភិវឌ្ឍន៍ធនធានវិស័យពាក់ព័ន្ធ និងបណ្ដុះបណ្ដាលធនធានមនុស្សនៅកម្ពុជា។
លោកក៏បានស្នើផ្ដល់គម្រោងដំឡើងស្ថានីយបូមទឹកដើរដោយថាមពលពន្លឺព្រះអាទិត្យ និងគម្រោងសិក្សាបន្ថែមទឹកក្រោមដីក្នុងខេត្តកំពង់ស្ពឺ ស្ថិតនៅក្រុងច្បារមន ស្រុក
ភ្នំស្រួច ស្រុកសំរោងទង និងស្រុកឧដុង្គ។
លោកបន្តស្នើឥណ្ឌា ផ្តល់រូបភាពពីផ្កាយរណប ដើម្បីជួយដល់ការព្យាករធាតុអាកាសនៅកម្ពុជាឱ្យមានប្រសិទ្ធភាព ជាពិសេសសម្រាប់ព្យាករទឹកជំនន់ក្នុងរដូវវស្សា។
រដ្ឋមន្ត្រីក្រសួងធនធានទឹក និងឧតុនិយម ក៏បានស្នើឥណ្ឌា ជួយដល់ការអភិវឌ្ឍធនធានមនុស្សទាំងផ្នែកបច្ចេកទេស និងផ្នែកបច្ចេកវិទ្យា ជាពិសេសបច្ចេកវិទ្យាទឹកក្រោមដី។
លោកស្រី ដេវ្យានី ខូបប្រាហ្កាដេ ឯកអគ្គរដ្ឋទូតឥណ្ឌាប្រចាំកម្ពុជា បានបញ្ជាក់ថា ចំពោះកិច្ចសហប្រតិបត្តិការរវាងរដ្ឋាភិបាលកម្ពុជា និងឥណ្ឌា ពីអតីតកាល រហូតដល់បច្ចុប្បន្ន គឺមានភាពល្អប្រសើរ ជាពិសេសថ្នាក់ដឹកនាំក្រសួងធនធានទឹក និងឧតុនិយម តែងសហការគ្នាបានយ៉ាងល្អប្រកបដោយគុណភាព និងប្រសិទ្ធភាព។
ភាគីកម្ពុជា និងឥណ្ឌា បានប្តេជ្ញាចិត្តជាថ្មី ដើម្បីពង្រឹងទំនាក់ទំនងល្អប្រសើររវាងប្រទេសទាំងពីរ និងបន្តកិច្ចសហការលើវិស័យធនធានទឹកឱ្យកាន់តែរីកចម្រើនទាំងបច្ចុប្បន្ន និងសម្រាប់ថ្ងៃអនាគត។
លោក គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិតសភាកម្ពុជា បានឱ្យដឹងថា បើគិតតាំងពីអតីតកាល រហូតដល់បច្ចុប្បន្ន ទំនាក់ទំនងរវាងកម្ពុជា និងឥណ្ឌា គឺល្អប្រសើរ មានស្ថិរភាព និងមាននិរន្តរភាព។
លោកបញ្ជាក់ថា មូលហេតុមានស្ថិរភាព និងនិរន្តរភាព ព្រោះទំនាក់ទំនងរវាងប្រទេសទាំងពីរនេះ មិនដែលអាក់ខានជាមួយគ្នានោះទេ ទោះកម្ពុជាមានការប្រែប្រួល
បរិបទនយោបាយក៏ដោយ។
លោកបន្តថា សូម្បីកាលពីឆ្នាំ១៩៧៩ និងឆ្នាំ១៩៨០ ក៏រដ្ឋាភិបាលឥណ្ឌា ពុំដែលកាត់ផ្ដាច់ការទូតជាមួយកម្ពុជាឡើយ ដូច្នេះ ឥណ្ឌា គឺជាប្រទេសតែមួយនៃប្រទេសសេរីដែលទទួលស្គាល់រដ្ឋាភិបាលសាធារណរដ្ឋប្រជាមានិត
កម្ពុជាក្រោយថ្ងៃរំដោះឆ្នាំ១៩៧៩។
លោក គិន ភា បន្ថែមថា៖ «សាធារណរដ្ឋឥណ្ឌា ក៏បានរួមចំណែកជាច្រើនលើការកសាងសន្តិភាពនៅកម្ពុជា ជាពិសេសជួយកម្ពុជាលើការអភិវឌ្ឍវិស័យធនធានមនុស្ស
វិស័យវប្បធម៌ និងការជួសជុលប្រាសាទខ្មែរនៅកម្ពុជា ជាដើម»។
កាលពីឆ្នាំ២០១៨ រដ្ឋាភិបាលឥណ្ឌា បានចុះកិច្ចព្រមព្រៀងជាមួយរដ្ឋាភិបាលកម្ពុជា ដើម្បីអនុវត្តគម្រោងធនធានទឹកស្ទឹងស្វាហាប់ ដែលស្ថិតក្នុងខេត្តកំពង់ស្ពឺ។
ចាប់តាំងពីឆ្នាំ២០០៤ រដ្ឋាភិបាលឥណ្ឌា តាមរយៈក្រសួងធនធានទឹក និងឧតុនិយម បានផ្ដល់ជំនួយក្រោមគម្រោងទិញម៉ាស៊ីនបូមទឹក គម្រោងអភិវឌ្ឍន៍ទំនប់អាងទឹកស្ទឹងតាសាល ដំណាក់កាលទី១ ដែលស្ថិតនៅ
ឃុំតាសាល ស្រុកឱរ៉ាល់ ខេត្តកំពង់ស្ពឺ។
ក្នុងនោះ រដ្ឋាភិបាលឥណ្ឌា ក៏បានផ្ដល់ជំនួយក្រោមគម្រោងអភិវឌ្ឍន៍ផែនការមេស្ទឹងសៀមរាប និងគម្រោងសិក្សាទឹកក្រោមដីក្នុងខេត្តកំពង់ស្ពឺ ដែលស្ថិតក្នុងស្រុកបរសេដ្ឋ និងស្រុកគងពិសី។
ចាប់តាំងពីដើមឆ្នាំ២០១៥ និងឆ្នាំ២០១៦ រដ្ឋាភិបាលឥណ្ឌា បានអនុម័តគម្រោងចំនួន៤៨ ដោយផ្ដោតទៅលើ
វិស័យបច្ចេកវិទ្យា កសិកម្ម សុខភាព អនាម័យ សិទ្ធិអំណាចដល់ស្ត្រី សុខុមាលភាពកុមារ ការអភិវឌ្ឍន៍ជនបទ
ហេដ្ឋារចនាសម្ពន្ធសង្គម និងវិស័យបរិស្ថាន ជាដើម។
កាលពីដើមឆ្នាំពី២០២៣ រដ្ឋាភិបាលឥណ្ឌា បានផ្តល់ជំនួយសម្រាប់គម្រោងបង្គន់សាធារណៈប្រើប្រាស់ថាមពលពន្លឺព្រះអាទិត្យខ្នាតតូច នៅកោះរ៉ុង ខេត្តព្រះសីហនុ ព្រមទាំងគាំទ្រលើការងារស្ដារ និងអភិរក្សប្រាសាទបុរាណ និងសកម្មភាពបោសសម្អាតមីននៅកម្ពុជាផងដែរ៕