ក្រសួងសាធារណការនិងដឹកជញ្ជូននៅឆ្នាំ២០២៣ បានដាក់គោលដៅស្ថាបនានិងសាងសង់ផ្លូវជាតិផ្លូវខេត្តចំនួន៨៥០ខ្សែដែលមានប្រវែងជាង២ម៉ឺនគីឡូម៉ែត្រ តែផ្លូវទាំងនោះបានក្រាលកៅស៊ូនិងបេតុងបានប្រវែងជាង១.១ម៉ឺនគីឡូម៉ែត្រ ឬស្មើនឹង៥៦.៣៨% នៃប្រវែងខ្សែផ្លូវសរុប។
ក្រសួងសាធារណការនិងដឹកជញ្ជូនពីម្សិលមិញបានបើកសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ ដែលប្រារព្ធធ្វើនៅទីស្ដីការក្រសួងក្រោមប្រធានបទ «ពង្រឹងការអភិវឌ្ឍធនធានមនុស្ស គុណភាពសំណង់ហេដ្ឋារចនាសម្ព័ន្ធ ការរៀបចំច្បាប់-បទដ្ឋានគតិយុត្ត ការផ្តល់សេវា និងការប្រើប្រាស់បច្ចេកវិទ្យានិងឌីជីថល»។
លោក ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន ដែលអញ្ជើញជាអធិបតីនៅក្នុងពិធីនោះបានអានរបាយការណ៍សង្ខេបថា នៅឆ្នាំ២០២៣ក្រសួងបានស្ថាបនានិងសាងសង់ផ្លូវជាតិនិងផ្លូវខេត្ត៨៥០ខ្សែមានប្រវែង ២០ ០១៦គីឡូម៉ែត្រ ហើយបានក្រាលកៅស៊ូនិងបេតុងប្រវែង ១១ ២៨៥គីឡូម៉ែត្រ ឬស្មើនឹង ៥៦,៣៨% នៃប្រវែងផ្លូវសរុប។
លោកថា នៅក្នុងនោះក្រសួងបានស្ថាបនានិងសាងសង់ផ្លូវជាតិកម្រិត១ចំនួន៩ខ្សែមានប្រវែងសរុប ២២ ០៥៤គីឡូម៉ែត្រ ហើយបានក្រាលកៅស៊ូនិងបេតុងសម្រេចបាន១០០%។
លោកបានបន្ថែមថា៖ «ក្រសួងបានស្ថាបនានិងសាងសង់ផ្លូវជាតិកម្រិត២ចំនួន៧២ខ្សែមានប្រវែងសរុប ៥១ ៣៥.៨៨គីឡូម៉ែត្រ ហើយបានក្រាលកៅស៊ូនិងបេតុងប្រវែង៣ ៩៣១គីឡូម៉ែត្រ ឬស្មើនឹង៧៦.៥៤% នៃប្រវែងផ្លូវសរុប»។
លោកថា៖ «ក្រសួងបានស្ថាបនានិងសាងសង់ផ្លូវខេត្តចំនួន៧៦៩ខ្សែមានប្រវែងសរុប ១២ ៦២៦គីឡូម៉ែត្រ ហើយបានក្រាលកៅស៊ូនិងបេតុង៥ ១០០គីឡូម៉ែត្រ ឬស្មើនឹង៤០.៣៩%នៃប្រវែងផ្លូវសរុប»។
នៅក្នុងពិធីបើកសន្និបាតនោះលោក ប៉េង ពោធិ៍នា រដ្ឋមន្ត្រីក្រសួងសាធារណការនិងដឹកជញ្ជូន មិនបានបញ្ជាក់ពីមូលហេតុដែលមិនសម្រេចតាមគោលដៅ ហើយក៏មិនបានបញ្ជាក់ពីថវិកាសរុបដែលបានចំណាយលើគម្រោងស្ថាបនានិងជួសជុលផ្លូវទាំងនោះទេ ដោយគ្រាន់តែនិយាយថា គម្រោងស្ថាបនានិងសាងសង់ផ្លូវស្ពានដោយប្រើប្រាស់ថវិកាជាតិនិងថវិកាដៃគូអភិវឌ្ឍន៍នានា។
លោកថា បច្ចុប្បន្ននេះក្រសួងសាធារណការនិងដឹកជញ្ជូនកំពុងដំណើរការសាងសង់គម្រោងផ្លូវស្ពានដោយប្រើប្រាស់ថវិកាដៃគូអភិវឌ្ឍន៍ ដូចជាគម្រោងប្រើប្រាស់ថវិកាប្រទេសចិនសម្រាប់ផ្លូវជាតិចំនួន៧ខ្សែមានប្រវែងសរុប៥៧៥.២៩គីឡូម៉ែត្រ រួមមានមានកំណត់ផ្លូវជាតិលេខ៧ប្រវែង៤៥.៤៨គីឡូម៉ែត្រ ផ្លូវជាតិលេខ១០ប្រវែង១៩៨.៥១គីឡូម៉ែត្រ ផ្លូវជាតិលេខ៣១ប្រវែង៥៣.៣៩គីឡូម៉ែត្រ ផ្លូវជាតិលេខ៣៣ប្រវែង៥២.៥៧គីឡូម៉ែត្រ ផ្លូវជាតិលេខ៤១ប្រវែង៩៥.២៩គីឡូម៉ែត្រ ផ្លូវជាតិលេខ៧១សេប្រវែង១០១.៣៦គីឡូម៉ែត្រ និងផ្លូវតភ្ជាប់ពីក្រុងក្រចេះប្រវែង៣១.៦៩គីឡូម៉ែត្រ។ គម្រោងប្រើប្រាស់ថវិកាប្រទេសចិនសម្រាប់សាងសង់ស្ពានចំនួនពីរប្រវែងសរុប២៦០៦.៧០ម៉ែត្រ រួមមានស្ពានឆ្លងទន្លេក្រចេះប្រវែង១៧៦១ម៉ែត្រ និងស្ពានចាក់អង្រែក្រោម-ព្រែប្រាប្រវែង៨៤៥.៧០ម៉ែត្រ។
លោកបន្ថែមថា ក្រសួងកំពុងដំណើរការគម្រោងសាងសង់ផ្លូវដោយប្រើប្រាស់ថវិកាប្រទេសជប៉ុនមានមួយខ្សែមានប្រវែង៣៥.១៤គីឡូម៉ែត្រ គឺកំណត់ផ្លូវជាតិលេខ៥ពីសិរីសោភ័ណទៅប៉ោយប៉ែត។ គម្រោងប្រើប្រស់ថវិកាប្រទេសកូរ៉េខាងត្បូងមានមួយខ្សែផ្លូវ គឺផ្លូវលេខជាតិ៤៨ប្រវែង១៤៨គីឡូម៉ែត្រ។
លោកថា សម្រាប់គម្រោងប្រើប្រាស់ថវិកាធនាគារអភិវឌ្ឍន៍អាស៊ីមានពីរខ្សែផ្លូវជាតិប្រវែងសរុប៤៣.២០គីឡូម៉ែត្រ រួមមានផ្លូវជាតិលេខ២៣ប្រវែង១៩.៨៣គីឡូម៉ែត្រ និងផ្លូវខេត្តលេខ៣១២ប្រវែង ២៣.៣៧ គីឡូម៉ែត្រ។ ចំណែកគម្រោងប្រើប្រាស់ធនាគារពិភពលោកមានប្រាំខ្សែផ្លូវប្រវែងសរុប ៣២៥.៧៥គីឡូម៉ែត្រ រួមមានផ្លូវជាតិលេខ៤ ប្រវែង១៩៦.១០គីឡូម៉ែត្រ កំណាត់ផ្លូវជាតិលេខ៧ប្រវែង៣១.២៥គីឡូម៉ែត្រ ផ្លូវជាតិលេខ៧៣ប្រវែង៤៩.៨១គីឡូម៉ែត្រ ព្រមទាំងផ្លូវខេត្តលេខ៣៧៧ និងផ្លូវខេត្តលេខ៣៧៧Aប្រវែង៤៨.៥គីឡូម៉ែត្រ៕