ក្រសួងព័ត៌មាន នឹងធ្វើវិសោធនកម្មច្បាប់ស្ដីពី របបសារព័ត៌មាន និងធ្វើបច្ចុប្បន្នភាពអ្នកសារព័ត៌មាន ដែលគ្មានភាពស្របច្បាប់ ដើម្បីឱ្យស្របទៅនឹងការវិវត្តនៃសង្គម និងកាត់បន្ថយព័ត៌មានមិនពិតនៅកម្ពុជា។
ការគ្រោងធ្វើវិសោធនកម្មច្បាប់ និងធ្វើបច្ចុប្បន្នភាពអ្នកសារព័ត៌មានខាងលើនេះ បន្ទាប់ពីមានកាស៊ីណូមួយ ស្ថិតក្បែរព្រំដែនកម្ពុជា-វៀតណាម កាលពីខែសីហា បានផ្សព្វផ្សាយថា មានអ្នកសារព័ត៌មានចន្លោះពី ៧០០ ទៅ ៩០០អង្គភាព បានសុំប្រាក់ឧបត្ថម្ភពីខ្លួនជារៀងរាល់ខែ។
ក្នុងកិច្ចប្រជុំពិនិត្យវឌ្ឍនភាពការងារ និងទិសដៅការងារបន្តរបស់អគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន កាលពីថ្ងៃចន្ទ លោក នេត្រ ភត្រ្តា បញ្ជាក់ថា បច្ចុប្បន្ន មានអ្នកសារព័ត៌មានអនឡាញជាច្រើន ដែលមិនទាន់មានច្បាប់ត្រឹមត្រូវ និងមិនគោរពច្បាប់របស់សារព័ត៌មាននៅកម្ពុជា។
លោកបន្ថែមថា ការមិនទាន់មានភាពស្របច្បាប់ និងមិនគោរពច្បាប់សារព័ត៌មាន បានធ្វើឱ្យមានព័ត៌មានមិនពិតមួយចំនួនកើតឡើង ហើយសារព័ត៌មាន ដែលគ្មានប្រភពច្បាស់លាស់ គឺធ្វើឱ្យប្រជាពលរដ្ឋទទួលបានព័ត៌មានមិនត្រឹមត្រូវ ជាពិសេសបំពុលដល់សង្គមផងដែរ។
លោក នេត្រ ភក្ត្រា បន្តថា ក្រសួងព័ត៌មាន នឹងពង្រឹងច្បាប់ ក្រមសីលធម៌ និងវិជ្ជាជីវៈអ្នកសារព័ត៌មាន ព្រោះបច្ចុប្បន្ននេះ កម្ពុជាកំពុងមានអ្នកសារព័ត៌មានអនឡានជាច្រើន ដែលគ្មានច្បាប់អនុញ្ញាតត្រឹមត្រូវ។
ការពង្រឹងច្បាប់ ក្រមសីលធម៌ និងវិជ្ជាជីវៈអ្នកសារព័ត៌មាន ដើម្បីកាត់បន្ថយព័ត៌មានមិនពិតនៅក្នុងសង្គម និងធានាប្រជាពលរដ្ឋនៅតាមមូលដ្ឋានទទួលព័ត៌មានពិត ឥតក្លែងក្លាយ។
រដ្ឋមន្ត្រីបញ្ជាក់ថា៖ «ក្រសួងនឹងធ្វើវិសោធនកម្មច្បាប់ស្ដីពី របបសារព័ត៌មាន ដើម្បីឱ្យស្របទៅនឹងការវិវត្តនៃសង្គមជារួម ព្រមទាំងពិនិត្យមើលច្បាប់ផ្សេងៗទៀត ដែលជាមូលដ្ឋានគ្រឹះនៃការការពារផលប្រយោជន៍នៅក្នុងវិស័យព័ត៌មាន»។
ក្នុងនោះក៏ពិនិត្យលើលិខិតបទដ្ឋានមួយចំនួនដែលមិនទាន់បានធ្វើ ហើយបន្តតាមដាននិងពិនិត្យរកព័ត៌មានក្លែងក្លាយ និងធ្វើកិច្ចសហប្រតិបត្តិការជាមួយដៃគូពាក់ព័ន្ធ ជាពិសេសនឹងធ្វើបច្ចុប្បន្នភាពអ្នកសារព័ត៌មានដែលគ្មានច្បាប់ត្រឹមត្រូវ ដើម្បីកាត់បន្ថយព័ត៌មានមិនពិត និងនាំផលប្រយោជន៍សម្រាប់សាធារណជនទូទាំងប្រទេស។
លោក នេត្រ ភក្ត្រា បានជំរុញអ្នកសារព័ត៌មាន ត្រូវផ្សព្វផ្សាយព័ត៌មានឱ្យប្រកបដោយវិជ្ជាជីវៈ ក្រមសីលធម៌ និងត្រូវមានប្រភពច្បាស់លាស់ ព្រោះការផ្សាយព័ត៌មានពិត នឹងក្លាយជាអាវក្រោះសម្រាប់ការពារអ្នកសារព័ត៌មានពីទណ្ឌកម្មផ្លូវច្បាប់ ព្រមទាំងរក្សាតម្លៃថ្លៃថ្នូរក្នុងនាមជាអ្នកសារព័ត៌មានផងដែរ។
លោក ណុប វី នាយកប្រតិបត្តិនៃសមាគមសម្ព័ន្ធអ្នកសារព័ត៌មានកម្ពុជា ប្រាប់កាសែតខ្មែរថាមស៍ កាលពីម្សិលមិញថា ការធ្វើបច្ចុប្បន្នភាព ឬធ្វើវិសោធនកម្មច្បាប់ស្ដីពី របបសារព័ត៌មាន គឺជាការផ្ដួចផ្ដើមដ៏ល្អ។
លោកបន្ថែមថា លោកក៏គាំទ្រឱ្យមានការធ្វើវិសោធនកម្មច្បាប់ខាងលើនេះ ប៉ុន្តែទទូចធ្វើយ៉ាងណាឱ្យការធ្វើវិសោធនកម្មច្បាប់នេះស្របតាមបទដ្ឋានច្បាប់អន្តរជាតិ ក៏ដូចសិទ្ធិរបស់ប្រជាពលរដ្ឋ សិទ្ធិនយោបាយ និងសិទ្ធិថ្លែងការណ៍ជាសាកលស្ដីពី សិទ្ធិមនុស្ស។
លោកបន្តថា អ្នកសារព័ត៌មាន ដែលមានភាពស្របច្បាប់ ឬគ្មានភាពស្របច្បាប់ គឺគ្មានច្បាប់ណាកំណត់អំពីស្របច្បាប់ ឬមិនស្របច្បាប់របស់អ្នកសារព័ត៌មាននោះទេ ព្រោះនៅក្នុងច្បាប់អន្តរជាតិ ទោះបុគ្គលណាក៏ដោយដែលអាចអនុវត្តតួនាទី និងភារកិច្ចរបស់អ្នកសារព័ត៌មាន ក្នុងការចូលរួមយកព័ត៌មាន និងផ្សព្វផ្សាយព័ត៌មានបាន ត្រូវបានគេសម្គាល់ថា ជាអ្នកសារព័ត៌មានទាំងអស់។
លោក ណុប វី បញ្ជាក់ថា៖ «បើបង្កើតច្បាប់ដើម្បីកំណត់អ្នកនេះជាអ្នកសារព័ត៌មាន ហើយអ្នកនោះមិនមែនជាអ្នកសារព័ត៌មាន ខ្ញុំគិតថា នឹងប៉ះពាល់សេរីភាពនៃការចូលរួមរបស់ប្រជាពលរដ្ឋមិនខាន»។
លោកបន្ថែមថា សារព័ត៌មាន គឺជាអំណាចមួយនៅដាច់ដោយឡែក ព្រោះអ្នកសារព័ត៌មាន គឺមានតួនាទីក្នុងការអង្កេត និងឃ្លាំមើលលើការអនុវត្តតួនាទី និងភារកិច្ចនៃអំណាចទាំងបីនៅកម្ពុជា៕