យោងតាមទិន្នន័យរបស់អគ្គនាយកដ្ឋានគយ និងរដ្ឋាករ (GDCE) បានឱ្យដឹងថា កម្ពុជារកចំណូលបាន២១៥ លានដុល្លារ ពីការនាំចេញផលិតផលធ្វើពីកៅស៊ូក្នុងរយៈពេលពីរខែដំបូងនៃឆ្នាំនេះ កើនឡើង៩០ ភាគរយបើធៀបនឹងរយៈពេលដូចគ្នាកាលពីឆ្នាំមុន។
ទិន្នន័យនេះបានបង្ហាញថា ការនាំចេញផលិតផលធ្វើពីកៅស៊ូរបស់កម្ពុជាដែលបានចាប់ផ្តើមនៅពាក់កណ្តាលចុងឆ្នាំ២០២២ នៅតែបន្តកើនឡើងដល់ឆ្នាំ២០២៤ផងដែរ។ ការនាំចេញបានកើនឡើង ទោះបីជាមានការធ្លាក់ចុះនៃការផលិតកៅស៊ូធម្មជាតិនៅទូទាំងពិភពលោក រួមផ្សំនឹងការកើនឡើងនៃតម្លៃក៏ដោយ។
គួរកត់សម្គាល់ដែរថា កម្ពុជារកចំណូលបាន ៩១៩ លានដុល្លារពីការនាំចេញផលិតផលធ្វើពីកៅស៊ូ និងកៅស៊ូធម្មជាតិនៅឆ្នាំ ២០២៣ ដែលកត់ត្រាកំណើន ៦៩,៦ ភាគរយបើធៀបនឹងឆ្នាំមុន។ ទីផ្សារកៅស៊ូកម្ពុជាភាគច្រើនរួមមាន ចិន វៀតណាម ម៉ាឡេស៊ី សិង្ហបុរី ឥណ្ឌា និងសហភាពអឺរ៉ុប។
ទន្ទឹមនឹងនេះ យោងតាមសមាគមប្រទេសផលិតកៅស៊ូធម្មជាតិ (ANRPC) ដែលមានមូលដ្ឋាននៅទីក្រុងកូឡាឡាំពួរ ការផ្លាស់ប្តូរជាវិជ្ជមាននៃតម្លៃកៅស៊ូធម្មជាតិ ភាគច្រើនអាចបណ្តាលមកពីការកាត់បន្ថយការផ្គត់ផ្គង់ ជាពិសេសការផលិត កៅស៊ូធម្មជាតិ ខណៈដែលឈានចូលដល់រដូវស្លឹកឈើជ្រុះ។
លោក Heng Guan អគ្គលេខាធិការ ANRPC បាននិយាយនៅក្នុងសេចក្តីប្រកាសព័ត៌មានមួយថា ផលប៉ះពាល់នៃកត្តាមួយចំនួនដូចជា ជំងឺដែលកើតមាននៅលើដើមកៅស៊ូ និងលក្ខខណ្ឌអាកាសធាតុមិនល្អ ក៏បានធ្វើឱ្យការផ្គត់ផ្គង់ជួបបញ្ហាប្រឈមផងដែរ រួមផ្សំដោយការស្ទាក់ស្ទើររបស់ម្ចាស់ចម្ការកៅស៊ូតូចៗក្នុងការប្រមូលផលពីដើមឈើ ដោយសារតម្លៃកៅស៊ូធ្លាក់ចុះ។
លោកបានបន្តថា “បញ្ហានេះនៅតែបន្តកើតមាននៅក្នុងឧស្សាហកម្មកៅស៊ូធម្មជាតិ ខណៈដែលយោបល់របស់ម្ចាស់អាជីវកម្មខ្នាតតូចដែលជារឿយៗមិនត្រូវបានគេអើពើ។ ជាលទ្ធផល សក្ដានុពលផ្នែកផ្គត់ផ្គង់ទាំងនេះបានរួមចំណែកយ៉ាងសំខាន់ដល់ការធ្វើឱ្យប្រសើរឡើងនៅក្នុងឧស្សាហកម្មនេះ។
នៅទូទាំងពិភពលោក ប្រទេសថៃគឺជាប្រទេសផលិតកៅស៊ូធម្មជាតិដ៏ធំបំផុតកាលពីឆ្នាំមុន បន្ទាប់មកគឺប្រទេសឥណ្ឌូនេស៊ី វៀតណាម ចិន ឥណ្ឌា ម៉ាឡេស៊ី និងកម្ពុជា។
ប្រទេសចិនបានបន្តជាអ្នកប្រើប្រាស់កៅស៊ូធម្មជាតិធំជាងគេបន្ទាប់មកមានប្រទេសឥណ្ឌា ថៃ និងម៉ាឡេស៊ី។
យោងតាមអ្នកជំនាញ ទីផ្សារកៅស៊ូធម្មជាតិនៅតែបន្តប្រឈមនឹងបញ្ហាធំៗ ជាពិសេសដោយសារតែកំណើនសេដ្ឋកិច្ចចិនតិចជាងការរំពឹងទុកនៅក្នុងឆមាសទីពីរនៃឆ្នាំមុន។ ប្រទេសចិនគឺជាប្រទេសផលិតសំបកកង់ធំបំផុតនៅលើពិភពលោកក។ បន្ថែមលើនេះ គឺជាផលប៉ះពាល់នៃសង្គ្រាមរុស្ស៊ី-អ៊ុយក្រែន និងអ៊ីស្រាអែល-ហាម៉ាស ដែលអូសបន្លាយពេលយូរ និងការចំណាយខ្ពស់ក្នុងការខ្ចីប្រាក់ដែលបណ្តាលមកពីអត្រាការប្រាក់ខ្ពស់។
យោងតាមក្រសួងកសិកម្ម រុក្ខាប្រមាញ់ និងនេសាទ នៅឆ្នាំ២០២១ កម្ពុជាមានផ្ទៃដីដាំកៅស៊ូជាង ៤០ម៉ឺនហិកតា។ កម្ពុជាក៏មានរោងចក្រកែច្នៃកៅស៊ូ និងមជ្ឈមណ្ឌលសិប្បកម្មចំនួន ១៦៨ទីតាំង ក្នុងខេត្តចំនួន ១១។ កំពង់ធំ គឺជាខេត្តដែលផលិតកៅស៊ូនាំមុខគេក្នុងប្រទេសកម្ពុជា ដែលមានផ្ទៃដីដាំសរុបចំនួន ១៥,៤ បន្ទាប់មកខេត្តមណ្ឌលគិរី (៨,៤ ភាគរយ) និងស្ទឹងត្រែង (៤,២ ភាគរយ) ។
ខណៈដែលកម្ពុជាកំពុងនាំចេញជ័រកៅស៊ូធម្មជាតិភាគច្រើនកាលពីប៉ុន្មានឆ្នាំមុន ការបើកដំណើរការរោងចក្រផលិតសំបកកង់ជាច្រើន ជាពិសេសដោយក្រុមហ៊ុនចិនកាលពីឆ្នាំមុន បានធ្វើឱ្យតម្រូវការក្នុងស្រុកកើនឡើងខ្ពស់សម្រាប់កៅស៊ូកម្ពុជា។
ក្រុមហ៊ុនផលិតនៅក្នុងប្រទេសចិន ដែលជាក្រុមហ៊ុនផលិត និងនាំចេញសំបកកង់ធំជាងគេលើពិភពលោក បានចាប់ផ្តើមសាងសង់រោងចក្របន្ថែមទៀតនៅបរទេស ដើម្បីឆ្លើយតបនឹងតម្រូវការទីផ្សារដែលស្ទុះងើបឡើងវិញបន្ទាប់ពីបានប្រទេសឡើងវិញ ។
ទិន្នផលសំបកកង់ប្រចាំឆ្នាំរបស់ប្រទេសចិនមានចំនួនច្រើនជាងពាក់កណ្តាលនៃចំនួនសរុបទូទាំងពិភពលោក។ ប៉ុន្តែថ្មីៗនេះ ក្រុមហ៊ុនជាច្រើនបានចាប់ផ្តើមសាងសង់រោងចក្រនៅក្រៅប្រទេស ជាពិសេសនៅក្នុងប្រទេសកម្ពុជា ដែលជាប្រទេសផលិតកៅស៊ូដ៏សំខាន់ ដើម្បីទាញយកអត្ថប្រយោជន៍ពីតម្លៃផលិតកម្មទាប។
ក្រុមហ៊ុន General Tire Technology (Cambodia) ដែលជាក្រុមហ៊ុនដំបូងគេដែលបើកដំណើរការនៅកម្ពុជា បានចាប់ផ្តើមប្រតិបត្តិការរោងចក្រកមានតម្លៃ៣០០ លានដុល្លារនៅក្នុងតំបន់សេដ្ឋកិច្ចពិសេសក្រុងព្រះសីហនុ (SSEZ) កាលពីឆ្នាំមុន។ រោងចក្រនេះមានសមត្ថភាពផលិតសំបកកង់ពាក់កណ្តាលដែកបានប្រាំលានកង់និងសំបកកង់រ៉ាឌីល់ដែកទាំងអស់ ៩០០.០០០កង់ ក្នុងមួយឆ្នាំ។
រោងចក្រនេះគឺជាក្រុមហ៊ុនបុត្រសម្ព័ន្ធរបស់ក្រុមហ៊ុនផលិតសំបកកង់របស់ចិនមកពីទីក្រុង Jiangsu ដែលមានឈ្មោះថា General Science Technology។ សំបកកង់ដែលផលិតនៅរោងចក្រកំពុងត្រូវបាននាំចេញជាចម្បងទៅកាន់សហរដ្ឋអាមេរិក អឺរ៉ុប និងប្រេស៊ីល។
ក្រុមហ៊ុន Doublestar Tire Industrial របស់ចិនក៏បានចាប់ផ្តើមសាងសង់រោងចក្រដែលមានតម្លៃ២០០ លានដុល្លារនៅក្នុងតំបន់សេដ្ឋកិច្ចពិសេសខេត្តក្រចេះ ជាមួយនឹងសមត្ថភាពផលិតប្រចាំឆ្នាំចំនួន ៨,៥ លានសំបកកង់រ៉ាឌីកាល់។
កាលពីពេលថ្មីៗនេះ ក្រុមហ៊ុន Cart Tire Co Ltd ដែលជាក្រុមហ៊ុនផលិតសំបកកង់ទំនើបដ៏ធំរបស់ចិន ដែលប្រតិបត្តិការក្នុងនាមក្រុមហ៊ុន Sailun Group បានបើកដំណើរការសំបកកង់រថយន្តដំបូងរបស់ខ្លួនដែលផលិតនៅក្នុងប្រទេសកម្ពុជា ដែលគេស្គាល់ថា “Sailun”។
យោងតាមប្រភពពីក្រុមហ៊ុនបានឲ្យដឹងថា រោងចក្រនៅខេត្តស្វាយរៀងនេះ អាចផលិតសំបកកង់បានរហូតដល់ ៣៥,០០០ គ្រឿងក្នុងមួយថ្ងៃក្នុងដំណាក់កាលទី១។ ពួកគេក៏គ្រោងនឹងសាងសង់រោងចក្រចំនួនពីរបន្ថែមទៀតនៅកម្ពុជា ផងដែរ។