សង្ឃគណៈមហានិយាយ និងគណៈធម្មយុត្តកនិកាយ អំពាវនាវព្រះសង្ឃ និងពុទ្ធបរិស័ទ នៅទូទាំងប្រទេសទៅចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ឱ្យបានគ្រប់គ្នា ដើម្បីប្រើសិទ្ធិសម្រេចលើជោគវាសនាប្រទេសជាតិ។
ក្នុងសេចក្តីអំពាវនាវរបស់គណៈសង្ឃនាយកនៃព្រះរាជាណាចក្រកម្ពុជា (គណៈមហានិកាយ) កាលពីថ្ងៃពុធ បានអំពាវនាវចំពោះព្រះសង្ឃ និងពុទ្ធបរិស័ទទាំងអស់ ដែលមានសិទ្ធិបោះឆ្នោត ទៅបោះឆ្នោតឱ្យបានគ្រប់ៗរូប ដើម្បីជ្រើសរើសអ្នកដឹកនាំប្រទេសជាតិសម្រាប់អភិវឌ្ឍ និងរីកចម្រើនគ្រប់វិស័យ។
គណៈសង្ឃនាយក បន្ថែមថា ព្រះសង្ឃ និងប្រជាពលរដ្ឋទាំងអស់ គប្បីត្រិះរិះពិចារណាធ្វើការសិក្សាស្វែងយល់ឱ្យបានច្បាស់លាស់ពីឆ្នាំ១៩៧៩ ដល់បច្ចុប្បន្ន គឺអាស្រ័យដោយលោកនាយករដ្ឋមន្ត្រី ហ៊ុន សែន ដែលបានស្វែងរកសុខសន្តិភាពឱ្យកើតមានមកដល់ពេលនេះ មិនមែនកើតមានដោយឯងៗនោះឡើយ តែអាស្រ័យដោយការដឹកនាំដ៏ប៉ិនប្រសព្វ។
គណៈសង្ឃនាយក បន្តថា៖ «ការបោះឆ្នោតដែលនឹងប្រព្រឹត្តទៅនាពេលខាងមុខ គឺជាការបោះឆ្នោតជាទូទៅ ជាសកល ដោយសេរី ត្រឹមត្រូវ យុត្តិធម៌ ស្មើភាព និងដោយសម្ងាត់ ស្របតាមគោលការណ៍លទ្ធិប្រជាធិបតេយ្យ សេរី ពហុបក្ស»។
គណៈសង្ឃនាយក បញ្ជាក់ថា ដោយមានសុខសន្តិភាព សេរីភាព នាពេលកន្លងមក និងបច្ចុប្បន្ននេះ ក្រោមការដឹកនាំប្រកបដោយគតិបណ្ឌិត និងការអភិវឌ្ឍនរបស់លោកនាយករដ្ឋមន្ត្រី ហ៊ុន សែន នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ សូមនិមន្ត និងអញ្ជើញទៅបោះឆ្នោតឱ្យបានគ្រប់ៗរូប។
សម្តេចព្រះមហាសង្ឃរាជ (គណៈធម្មយុត្តកនិកាយ) បួរ គ្រី ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហមុនីរាជា កាលពីម្សិលមិញបានអំពាវនាវដល់ប្រជាពលរដ្ឋទៅចូលរួមបោះឆ្នោត នៅថ្ងៃទី២៣កក្កដា ដើម្បីទទួលបានសន្តិភាព ក្រោមការដឹកនាំប្រកបដោយកាអភិវឌ្យរបស់លោកនាយករដ្ឋមន្ត្រី ហ៊ុន សែន និងលោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។
សម្តេចព្រះមហាសង្ឃរាជ បួរ គ្រី បន្ទូលបន្ថែមថា ថ្ងៃទី២៣កក្កដា គឺជាថ្ងៃសំខាន់មួយ ព្រោះជាថ្ងៃចូលរួមថែរក្សាការពារសន្តិភាព ស្ថិរភាព ដើម្បីប្រជាពលរដ្ឋគេចចេញពីសង្រាម និងភាពវឹកវរដូចប្រជាពលរដ្ឋធ្លាប់បានដឹង និងធ្លាប់ឆ្លងកាត់កាលពីអតីតកាល។
សម្តេចព្រះមហាសង្ឃរាជ បន្តថា៖ «គណបក្យប្រជាជនកម្ពុជា បានប្រឹងប្រែង និងព្យាយាមធ្វើ ដែលសមិទ្ធផលទាំងនេះ កើតឡើងជាការពិត ហើយយើងក៏មិនអាចបំភ្លេចនៃកាពិតនេះដែរ ដូច្នេះយើងក៏ត្រូវតែថែរក្សា ការពារ នូវអ្វីដែលយើងបានទទួលមកដល់បច្ចុបន្ននេះ កុំឱ្យសាបសូន្យ កុំឱ្យមហន្តរាយទៅវិញ»។
សម្តេចព្រះមហាសង្ឃរាជ បញ្ជាក់ថា៖ «យើងត្រូវតែនាំគ្នាធ្វើឱ្យបានគង់វង្ស នៅសន្តិភាពជារៀងរហូត ព្រោះសព្វថ្ងៃនេះ យើងក៏បានឃើញអ្វីៗទាំងអស់ បានកើតមកជាបន្តបន្ទាប់ ហើយក៏មិនចាញ់ប្រទេសដទៃៗឡើយ»។
កាលពីខែកុម្ភៈ ព្រះករុណាព្រះបាទសម្តេចព្រះបរមនាថ នរោត្ដម សីហមុនី ព្រះមហាក្សត្រ ទ្រង់អំពាវដល់ជនរួមជាតិ ដែលមានសិទ្ធិបោះឆ្នោតទាំងអស់ទៅបោះឆ្នោតឱ្យបានគ្រប់ៗគ្នា ដើម្បីជ្រើសរើសអ្នកដឹកនាំប្រទេសជាតិ។
ទ្រង់មានព្រះរាជបន្ទូលថា ការបោះឆ្នោតនៅថ្ងៃទី២៣កក្កដា គឺជាការបោះឆ្នោតទូទៅ ជាសកល ដោយសេរី ត្រឹមត្រូវ យុត្តិធម៌ ស្មើភាព និងដោយសម្ងាត់ ស្របតាមគោលការណ៍លទ្ធិប្រជាធិបតេយ្យ សេរី ពហុបក្ស។
ទ្រង់ព្រះរាជបន្ទូលថា ការបោះឆ្នោតប្រកបដោយសេរី និងយុត្តិធម៌ សូមកុំមានការព្រួយបារម្ភពីការគាបសង្កត់ ការគំរាម កំហែង ឬសម្លុតពីជនណាម្នាក់ ឬគណបក្សណាមួយឱ្យសោះ។
ទ្រង់ព្រះរាជបន្ទូលបន្ថែមថា ប្រជាពលរដ្ឋត្រូវប្រើសិទ្ធិសេរីភាពបោះឆ្នោតទៅតាមសតិសម្បជញ្ញៈរបស់ខ្លួន ដោយមានទំនុកចិត្តទៅលើបេក្ខជនណាម្នាក់ ឬគណបក្សនយោបាយណាមួយដោយសេរី។
គួររម្លឹកថា ការបោះឆ្នោតជ្រើសតាំងតំណាងរាស្ត្រ នីតិកាលទី៧ ប្រជាពលរដ្ឋសរុបប្រមាណ ៩ ៧១០ ៦៥៥នាក់ មានឈ្មោះក្នុងបញ្ជីបោះឆ្នោត នៅតាមការិយាល័យបោះឆ្នោតសរុបចំនួន ២៣ ៧៨៩ នៅទូទាំងប្រទេស។
គណបក្សនយោបាយ ដែលមានឈ្មោះចូលរួមបោះឆ្នោតជ្រើសតាំងតំណាងរាស្ត្រ សរុបមានចំនួន១៨ គណបក្ស ខណៈគណបក្សភ្លើងទៀន ដែលជាបក្សប្រឆាំងមួយនៅកម្ពុជា ត្រូវបានអាក់ខានចូលរួមបោះឆ្នោត ដោយសារ គ.ជ.ប អះអាងថា ខ្វះខាតនីតិវិធីមួយចំនួន។
ព្រឹត្តិការណ៍នៃយុទ្ធនាការឃោសនារកសំឡេងឆ្នោត ធ្វើឡើងចាប់ពីថ្ងៃទី១កក្កដា រហូតដល់ថ្ងៃទី២១ ខែកក្កដា ឆ្នាំ២០២៣ ខណៈថ្ងៃទី២២កក្កដា គឺជាថ្ងៃ ស៕