ប្រជាពលរដ្ឋស្ថិតនៅតំបន់ដែលងាយរងគ្រោះទឹកជំនន់ក្នុងភូមិសាស្ត្ររាជធានីភ្នំពេញ ស្នើអាជ្ញាធរពាក់ព័ន្ធត្រៀមកម្លាំងអន្តរាគមន៍ឱ្យបានទាន់ពេលវេលា ដើម្បីធានាសុខសុវត្ថិភាពប្រជាពលរដ្ឋនៅតាមមូលដ្ឋាន។
លោក សាយ សុវណ្ណរិទ្ធ ប្រជាពលរដ្ឋរស់ក្នុងខណ្ឌដង្កោ ប្រាប់កាសែតខ្មែរថាមស៍ កាលពីម្សិលមិញថា ជារៀងរាលឆ្នាំ ទឹកជំនន់តែងកើតឡើងជាប្រចាំ ប៉ុន្តែឆ្នាំខ្លះ ទឹកជំនន់ឡើងតិចតួច ក៏ស្រកទៅវិញ តែឆ្នាំខ្លះទឹកជំនន់បានហក់ឡើងខ្លាំង ដែលប្រជាពលរដ្ឋក្នុងភូមិមួយចំនួនប្រឈមហានីភ័យខ្ពស់។
លោកបន្ថែមថា នៅពេលទឹកជំនន់ ប្រជាពលរដ្ឋជាច្រើនគ្រួសារបានខាតបង់ទ្រព្យសម្បត្តិ និងខូចខាតផ្ទះសម្បែង ហើយក្មេងៗក្នុងតំបន់មួយចំនួន ក៏ប្រឈមគ្រោះថ្នាក់ផងដែរ បើសិនអាជ្ញាធរមិនបានអន្តរាគមន៍ទាន់ពេលវេលា។
លោកស្នើថា៖ «ខ្ញុំសូមស្នើឱ្យរដ្ឋបាលរាជធានី ក៏ដូចអាជ្ញាធរខណ្ឌដង្កោ និងខណ្ឌពាក់ព័ន្ធមួយចំនួន គួរត្រៀមកម្លាំងឱ្យបានរួចរាល់ ដើម្បីចុះជួយប្រជាពលរដ្ឋក្នុងតំបន់ដែលងាយរងគ្រោះខ្លាំងជាងគេ»។
លោក សេក មីនា ប្រជាពលរដ្ឋរស់នៅក្នុងខណ្ឌកំបូល បានលើកឡើងថា ភាគច្រើននៅពាក់កណ្ដាលខែតុលា ឬដើមខែវិច្ឆិកា តែងមានទឹកជំនន់កើតឡើង ប៉ុន្តែក្នុងតំបន់មួយចំនួនឃើញអាជ្ញាធរចុះអន្តរាគមន៍បានទាន់ពេលវេលា ប៉ុន្តែតំបន់មួយចំនួនពុំឃើញមានអាជ្ញាធរចុះសួរសុខទុក្ខប្រជាពលរដ្ឋឡើយ។
លោកបន្ថែមថា ចង់ឃើញមេភូមិ ចៅសង្កាត់ និងអាជ្ញាធរពាក់ព័ន្ធទាំងអស់ ចុះជួយប្រជាពលរដ្ឋឱ្យបានទាន់ពេលវេលា និងស្នើភាពគ្នា ដោយមិនគិតពីនិន្នាការនយោបាយ ឬពណ៌សម្បុរនោះទេ ព្រោះអាជ្ញាធរស្ថិតក្នុងគណបក្សកាន់អំណាច តែបើតំបន់នោះធ្លាប់តែប្រឆាំងនឹងគាត់ គឺពួកគាត់នឹងមិនជួយ។
លោកបញ្ជាក់ថា៖ «ខ្ញុំសូមស្នើមេភូមិ ឬចៅសង្កាត់ បើចែកអំណោយ គួរផ្ដល់ដល់ជនរងគ្រោះឱ្យបានស្មើភាពគ្នា ជាពិសេសអ្នកខ្វះខាតពិតប្រាកដ តែកុំជួយដោយរើសអើងបក្សនយោបាយធ្វើអ្វី? គឺមិនល្អទេ ហើយខ្ញុំជាប្រជាពលរដ្ឋ ក៏មិនគាំទ្របែបនេះដែរ»។
កាលពីម្សិលមិញ លោក ឃួង ស្រេង អភិបាលរាជធានីភ្នំពេញ បានបញ្ជារដ្ឋបាលខណ្ឌទាំង១៤ ជាពិសេសរដ្ឋបាលខណ្ឌដង្កោ ខណ្ឌកំបូល ខណ្ឌព្រែកព្នៅ ខណ្ឌឫស្សីកែវ ខណ្ឌជ្រោយចង្វារ និងខណ្ឌច្បារអំពៅ ត្រូវកំណត់ទីទួលសុវត្ថិភាព ដើម្បីត្រៀមជម្លៀសប្រជាពលរដ្ឋ។
ត្រូវរៀបចំបង្គន់អនាម័យ ទឹកស្អាត និងអគ្គិសនី ដើម្បីប្រជាពលរដ្ឋប្រើប្រាស់បណ្ដោះអាសន្ន និងជំរុញឱ្យផ្សព្វផ្សាយដល់ប្រជាពលរដ្ឋឱ្យបានជ្រាបនូវទីទួលសុវត្ថិភាព ដែលបានកំណត់ និងត្រូវរៀបចំកម្លាំងការពារសន្តិសុខ សុវត្ថិភាព និងរបៀបរៀបរយនៅទីទួលសុវត្ថិភាព។
លោកក៏បានជំរុញរដ្ឋបាលខណ្ឌពាក់ព័ន្ធត្រៀមមធ្យោបាយដឹកជញ្ជូន រថយន្ត សម្ភារៈ ចប បង្គី បាវខ្សាច់ និងស្បៀង ដើម្បីជួយសង្គ្រោះ ប្រជាពលរដ្ឋដែលរងគ្រោះដោយទឹកជំនន់។
ត្រៀមធ្វើស្ថិតិប្រជាពលរដ្ឋរងគ្រោះដោយទឹកជំនន់ ដើម្បីងាយស្រួលគាំពារផ្នែកជីវភាព និងជំនួយសង្គមផ្សេងៗ ព្រមទាំងផ្សព្វផ្សាយតាមគ្រប់មធ្យោបាយដល់ប្រជាពលរដ្ឋក្នុងតំបន់ងាយរងគ្រោះ ដើម្បីឱ្យត្រៀមលក្ខណៈបង្ការ និងការពារសុវត្ថិភាពនៅពេលមានទឹកជំនន់កើតឡើង។
លោក ឃួង ស្រេង បានណែនាំរដ្ឋបាលខណ្ឌកៀរគររកសប្បុរសជន ដើម្បីចូលរួមឧបត្ថម្ភគាំទ្រថវិកា សម្ភារៈ នឹងគ្រឿងឧបភោគបរិភោគ សម្រាប់ប្រជាពលរដ្ឋរងគ្រោះ ព្រមទាំងរៀបចំក្រុមវេនយាមប្រចាំការ ដើម្បីក្តាប់ព័ត៌មាន ត្រៀមអន្តរាគមន៍ និងចាត់វិធានការដោះស្រាយរាល់បញ្ហាដែលបានកើតឡើង។
ចំពោះស្នងការដ្ឋាននគរបាលរាជធានី បញ្ជាការដ្ឋានកងរាជអាវុធហត្ថរាជធានី និងបញ្ជាការដ្ឋានយោធភូមិភាគពិសេស ត្រូវត្រៀមកម្លាំង មធ្យោបាយដឹកជញ្ជូន រថយន្ត ទូក កាណូត អូប័រ និងសម្ភារៈផ្សេងៗ ដើម្បីជួយអន្តរាគមន៍សង្គ្រោះប្រជាពលរដ្ឋរងគ្រោះដោយទឹកជំនន់។
ក្នុងសេចក្ដីណែនាំរបស់រដ្ឋបាលរាជធានី បានស្នើមន្ទីរធនធានទឹក និងឧតុនិយម ត្រូវតាមដានព្យាករណ៍ឧតុនិយមជាប្រចាំ ដើម្បីផ្ដល់ដំណឹងដល់ប្រជាពលរដ្ឋ រដ្ឋបាលខណ្ឌ រដ្ឋបាលសង្កាត់ និងមន្ទីរជំនាញពាក់ព័ន្ធ ព្រមទាំងសម្របសម្រួលការងារបច្ចេកទេសផ្សេងៗ។
មន្ទីរសុខាភិបាល ត្រូវត្រៀមរៀបចំផែនការការពារសុខភាព និងរថយន្តគិលានសង្គ្រោះ ឧបករណ៍ សម្ភារៈសុខាភិបាល និងថ្នាំសង្កូវផ្សេងៗ ដើម្បីផ្តល់សេវាសុខាភិបាលនៅតាមទីទួលសុវត្ថិភាព។
មន្ទីរសាធារណការ និងដឹកជញ្ជូន ត្រូវត្រៀមគ្រឿងចក្រ កាណូត និងសម្ភារៈផ្សេងៗ ដើម្បីត្រៀមចុះនៅតំបន់ងាយរងគ្រោះដោយទឹកជំនន់ និងសហការជាមួយរដ្ឋបាលខណ្ឌពាក់ព័ន្ធរៀបចំបង្គន់អនាម័យចល័តនៅទីទួលមានសុវត្ថិភាព ព្រមទាំងត្រៀមស្ការហេដ្ឋារចនាសម្ព័ន្ធសាធារណៈឡើងវិញ។
មន្ទីរអប់រំ យុវជន និងកីឡា និងមន្ទីរធម្មការ និងសាសនា ត្រូវណែនាំដល់គ្រប់គ្រឹះស្ថានសិក្សា និងវត្តអារាម ដែលស្ថិតក្នុងតំបន់ងាយរងគ្រោះឱ្យមានការប្រុងប្រយ័ត្នខ្ពស់។
ចំពោះមន្ទីរអប់រំ យុវជន និងកីឡា ត្រូវសុំការអនុញ្ញាតពីក្រសួង ដើម្បីត្រៀមផ្អាកដំណើរការគ្រឹះស្ថានសិក្សាជាបណ្ដោះអាសន្ន សម្រាប់គ្រឹះស្ថានសិក្សាដែលត្រូវរងគ្រោះដោយទឹកជំនន់ និងធ្វើការផ្ទេរសិស្សទៅរៀននៅគ្រឹះស្ថានសិក្សាផ្សេងជាបណ្តោះអាសន្ន។
រដ្ឋបាលរាជធានី អំពាវនាវប្រជាពលរដ្ឋនៅតាមបណ្ដោយដងទន្លេមេគង្គ និងដងស្ទឹងព្រែកត្នោត ត្រូវបង្កើនការប្រុងប្រយ័ត្នខ្ពស់ តាមដានព័ត៌មានជាប្រចាំអំពីកម្ពស់ទឹក និងត្រូវត្រៀមលក្ខណៈទុកជាមុនដូចជា ទ្រព្យសម្បត្តិ សម្ភារៈចាំបាច់ និងសត្វពាហនៈឱ្យបានរៀបរយ ដើម្បីជម្លៀសទៅទីទួលសុវត្ថិភាព៕