ក្រសួងមុខងារសាធារណៈបានចេញគោលការណ៍ស្ដីពីការពិនិត្យសំណើសុំផ្ទេរនិងផ្លាស់ប្ដូរកន្លែងការងាររបស់មន្ត្រីរាជការស៊ីវិលរបស់ក្រសួង ស្ថាប័ន និងរដ្ឋបាល ថ្នាក់ក្រោមជាតិ ដើម្បីទប់ស្កាត់មន្ត្រីរាជការស៊ីវិលផ្ទេរនិងផ្លាស់ប្ដូរស្ថាប័នការងារពីកន្លែងមួយទៅកន្លែងមួយទៀតដោយគ្មានមូលដ្ឋានច្បាស់លាស់។
លោក ជុន មន្នី អនុរដ្ឋលេខាធិការក្រសួងមុខងារសាធារណៈ បានប្រាប់ពីម្សិលមិញថា៖ «ការផ្អាកការផ្ទេរនេះ គឺមានន័យថា ដើម្បីចៀសវាងកុំឱ្យមន្ត្រីរត់ចុះរត់ឡើងនៅក្នុងស្ថានភាពដែលកំពុងរៀបចំនៅតាមក្រសួងស្ថាប័ន។ ការផ្អាកនេះមិនមែនផ្អាករហូតទេ គឺផ្អាកត្រឹមតែមួយរយៈកាល ហើយនឹងមានគោលការណ៍បើកឡើងវិញ»។
លោកបន្ថែមថា៖ «ការផ្អាកនេះ ដើម្បីរក្សាស្ថេរភាព ដើម្បីចៀសវាង [មន្ត្រីរាជការស៊ីវិល] ផ្ទេរចុះផ្ទេរឡើងច្រើនពេក។ ឧបមាថា ខ្ញុំជាថ្នាក់ដឹកនាំម្នាក់ត្រូវបានផ្ទេរទៅកន្លែងថ្មី ហើយមានជំនួយការផ្ទេរទៅតាម ប៉ុន្តែក្នុងករណីចាំបាច់ក៏គេអនុញ្ញាតដែរ»។
លោកបានបញ្ជាក់ថា ក្នុងដំណាក់ការនេះ រដ្ឋមិនអនុញ្ញាតមន្ត្រីរាជការស៊ីវិលផ្ទេរនិងផ្លាស់ប្ដូរកន្លែងការងារពីកន្លែងមួយទៅកន្លែងមួយទៀតបានឡើយ។ ឧទាហរណ៍ថា ប្រសិនបើមន្ត្រីរាជការស៊ីវិលម្នាក់បម្រើការងារនៅក្រសួងអប់រំ គឺមិន
អនុញ្ញាត្តឱ្យផ្ទេរទៅក្រសួងមហាផ្ទៃបានឡើយ ប៉ុន្តែប្រសិនបើមន្ត្រីរាជការម្នាក់នោះស្នើទៅតាមខេត្តត្រូវបានអនុញ្ញាត។
ក្រសួងមុខងារសាធារណៈបានធ្វើលិខិតចុះថ្ងៃទី២៩ ខែកញ្ញា ស្ដីពីការគ្រប់គ្រងការផ្ទេរនិងផ្លាស់ប្ដូរការងាររបស់មន្ត្រីរាជការស៊ីវិល ក្រោយពីលោកនាយករដ្ឋមន្ត្រី ហ៊ុន ម៉ាណែត បានណែនាំឱ្យផ្អាកផ្ទេរនិងផ្លាស់ប្ដូរមន្ត្រីរាជការសង្គមស៊ីវិលកាលពីថ្ងៃទី១១ ខែកញ្ញា។
លិខិតនេះបានផ្ញើជូនចំពោះក្រសួង ស្ថាប័ន និងអង្គភាពគ្រប់លំដាប់ថ្នាក់ ដោយបញ្ជាក់ថា ផ្អែកលើការសម្រេចរបស់រាជរដ្ឋាភិបាលក្នុងការគ្រប់គ្រងស្ថានភាពបំពេញការងាររបស់មន្ត្រីរាជការស៊ីវិលឱ្យមានស្ថិរភាពនិងប្រសិទ្ធភាពក្រសួងមុខងារសាធារណៈក្រសួងមុខងារសាធារណៈនឹងបន្តពិនិត្យនិងផ្តល់ទិដ្ឋាការចំពោះសំណើដែលមានការឯកភាពរួចហើយពីថ្នាក់ដឹកនាំក្រសួងស្ថាប័នក្នុងអាណត្តិមុនតាមអនុលោមបែបបទនិងនីតិវិធីជាធរមាន។
លោករដ្ឋមន្ត្រី ហ៊ុន ម៉ានី បាននិយាយក្នុងលិខិតថា៖ «ចំពោះសំណើដែលបានទទួលឯកភាពពីថ្នាក់ដឹកនាំនៃក្រសួងស្ថាប័ននៅក្នុងអាណត្តិរដ្ឋាភិបាលនីតិកាលទី៧នៃរដ្ឋសភា នឹងត្រូវអនុវត្តផ្អែកលើគោលការណ៍សម្រេចផ្អាកជាទូទៅរបស់រដ្ឋាភិបាលរហូតដល់មានការណែនាំជាថ្មី ឬការសម្រេចដោយឡែករបស់រាជរដ្ឋាភិបាល»។
លោកបានបន្តថា ក្រសួងមុខងារសាធារណៈនឹងពិនិត្យនិងផ្តល់ទិដ្ឋាការចំពោះសំណើផ្ទេរនិងផ្លាស់ប្ដូរការងារក្នុងករណីមន្ត្រីរាជការកំពុងបម្រើការងារក្នុងក្រសួងស្ថាប័នមួយ ហើយបានប្រឡងជាប់ក្នុងក្របខ័ណ្ឌក្រសួងស្ថាប័នមួយផ្សេងទៀត ដែលត្រូវផ្ទេរក្របខ័ណ្ឌទៅបម្រើការងារក្នុងក្របខ័ណ្ឌក្រសួងស្ថាប័នដែលសាមីមន្តី្របានប្រឡងជាប់។
លោកបន្ថែមថា សម្រាប់មន្ត្រីរាជការដែលត្រូវបានតែងតាំងក្នុងមុខតំណែងនយោបាយ ដូចជារដ្ឋលេខាធិការ អនុរដ្ឋលេខាធិការ និងមន្ត្រីខុទ្ទកាល័យរបស់ថ្នាក់ដឹកនាំ
កម្រិតនយោបាយនិងក្នុងមុខតំណែងមុខងារសាធារណៈជាអភិបាលនៃគណៈអភិបាលខេត្ត អភិបាលរងខេត្ត ក្រុង ស្រុក ខណ្ឌ ឬមុខតំណែងប្រហាក់ប្រហែលផ្សេងទៀត ដែលត្រូវផ្ទេរក្របខណ្ឌនិងការបើកបៀវត្សនៅក្រសួង ស្ថាប័ន និងអង្គភាពថ្មី។
លោកបានបញ្ជាក់ថា ការផ្ទេរនិងផ្លាស់ប្ដូរកន្លែងការងារក្នុងក្រសួងស្ថាប័នតែមួយ ដែលជួយដល់ការពង្រាយមន្ត្រីទៅតំបន់ដែលកំពុងប្រឈមនឹងបញ្ហាខ្វះមន្ត្រី (តំបន់ក្រៅទីប្រជុំជន) ត្រូវបានអនុញ្ញត្តក្នុងរូបភាព ដូចជាការផ្ទេរឆ្លងអង្គភាពពីថ្នាក់ជាតិទៅថ្នាក់ក្រោមជាតិ ការផ្ទេរពីរាជធានីទៅខណ្ឌនិងទៅខេត្ត ការផ្ទេររវាងខេត្តនិងខេត្ត (មិនអនុញ្ញាតការផ្ទេរចូលរាជធានីភ្នំពេញ) និងការផ្ទេរពីខេត្តទៅក្រុងនិងស្រុក។
លោក ឡាំ សុជាតិ នាយកប្រតិបត្តិវិទ្យាស្ថានតស៊ូមតិនិងគោលនយោបាយ (API) យល់ឃើញថា គោលការណ៍របស់ក្រសួងមុខងារសាធារណៈ ព្រោះជាគោលការណ៍អភិបាល
កិច្ចល្អ ដើម្បីរក្សាមន្ត្រីរាជការសង្គមស៊ីវិសបំពេញការងារតាមឋានៈ តួនាទី ជំនាញបច្ចេកទេស និងការទទួលខុសត្រូវនៅក្នុងស្ថាប័នកំពុងបំពេញការងារ។
លោកបន្តថា មន្ត្រីរាជការស៊ីវិលមានក្របខណ្ឌ ទោះបីជានៅក្នុងស្ថាប័ននោះមានមេដឹកនាំថ្មីមកគ្រប់គ្រងក៏ដោយ ក៏ត្រូវនៅបន្តធ្វើការងារជាមួយនឹងមេដឹកនាំថ្មីនៃស្ថាប័នដែលខ្លួនកំពុងបំពេញការងារនោះដែរ។ មិនមែនថ្នាក់ដឹកនាំចាស់ផ្ទេរឬផ្លាស់ប្ដូរទៅកន្លែងថ្មី មន្ត្រីរាជការស៊ីវិលមិនអាចផ្ទេរការងារទៅតាមនោះទេ។
លោកបានបន្ថែមថា៖ «ថ្នាក់ដឹកនាំចាស់ដែលផ្ទេរទៅក្រសួងស្ថាប័នថ្មី ហើយយកមន្ត្រីរាជការស៊ីវិលដែលមានតួនាទីជាជំនួយការទៅជាមួយ គឺអាចថ្នាក់ដឹកនាំចាស់នោះជឿជាក់ ទុកចិត្ត ឬអាចជាសាច់ញាតិរបស់គាត់ដែលបានដឹងរឿងល្អនិងរឿងមិនដែលអាចជួយលាក់បាំងបាន»៕