អគ្គនាយកដ្ឋានគយ និងរដ្ឋាករ (GDCE) បាននិយាយថា បន្ទាប់ពីមានកិច្ចប្រជុំផ្សព្វផ្សាយស្តីការកំណត់លក្ខខណ្ឌនានាពាក់ព័ន្ធនឹងការនាំចូលសាច់ ខ្លួននឹងកំណត់គោលការណ៍ណែនាំ និងលក្ខខណ្ឌតឹងរ៉ឹងបន្ថែមទៀតសម្រាប់អ្នកដែលប្រតិបត្តិការក្នុងវិស័យនេះ។
ក្នុងគោលបំណងធ្វើឱ្យប្រសើរឡើងនូវគុណភាពសាច់ គោលការណ៍ណែនាំថ្មីនឹងចូលជាធរមាននៅថ្ងៃទី១២ខែមេសា ឆ្នាំ២០២៤។ គោលការណ៍ណែនាំទាំងនេះត្រូវបានលើកឡើងបន្ទាប់កិច្ចប្រជុំផ្សព្វផ្សាយស្តីការកំណត់លក្ខខណ្ឌនានាពាក់ព័ន្ធនឹងការនាំចូលសាច់ដែលបានធ្វើឡើងនៅថ្ងៃទី៤ ខែមេសា ឆ្នាំ២០២៤ ដោយមានការចូលរួមពីក្រុមហ៊ុននាំចូល និងជើងសាគយ សរុបចំនួន ៨៦ នាក់។
កាលពីខែធ្នូ ឆ្នាំ២០២៣ លោក គុណ ញ៉ឹមអគ្គនាយកនៃអគ្គនាយកដ្ឋានគយនិងរដ្ឋាករកម្ពុជាបាននិយាយថា នាយកដ្ឋានប្តេជ្ញាចិត្តក្នុងការត្រួតពិនិត្យការលក់ និងចែកចាយសាច់ខុសច្បាប់ ឬខូចគុណភាព។ នៅក្នុងខែធ្នូដដែលក៏បានឃើញការកើនឡើងនៃការចុះទៅត្រួតពិនិត្យឃ្លាំងសាច់បង្កកផងដែរ។
បច្ចុប្បន្នកម្ពុជានាំចូលសាច់បង្កកពីសហរដ្ឋអាមេរិក អូស្ត្រាលី ឥណ្ឌា រុស្ស៊ី ប្រេស៊ីល និងជប៉ុន ដោយការនាំចូលសាច់ទាំងនេះគឺដើម្បីបំពេញតម្រូវការទីផ្សារក្នុងប្រទេស និងសណ្ឋាគារលំដាប់ផ្កាយប្រាំ និងភោជនីយដ្ឋានលំដាប់ខ្ពស់។
យោងតាមគោលការណ៍ណែនាំថ្មីចាប់ពីថ្ងៃទី១២ ខែមេសា ឆ្នាំ២០២៤ នេះតទៅ មានតែក្រុមហ៊ុនដែលត្រូវបានកំណត់ថាមានគុណវុឌ្ឍិប៉ុណ្ណោះ ទើបអាចធ្វើប្រតិបត្តិការនាំចូលមុខទំនិញសាច់បង្កកបាន។
GDCE បានបន្តថា រហូតមកដល់ពេលនេះ មានក្រុមហ៊ុនចំនួន ២០ ត្រូវបានទទួលស្គាល់ថាជាក្រុមហ៊ុនមានគុណវុឌ្ឍិក្នុងការនាំចូលមុខទំនិញសាច់បង្កក។ចំពោះក្រុមហ៊ុនផ្សេងទៀតដែលមានបំណងនាំចូលមុខទំនិញនេះដែរ ត្រូវអនុវត្តអោយស្របតាមគោលការណ៍ណែនាំថ្មី។
GDCE បានបន្តថា ចំពោះក្រុមហ៊ុនផ្សេងទៀតដែលមានបំណងនាំចូលមុខទំនិញនេះដែរ ត្រូវរៀបចំឃ្លាំងរក្សាសាច់បង្កករបស់ខ្លួនឱ្យបានសមស្របតាមលក្ខណៈបច្ចេកទេស និងត្រូវរួសរាន់ស្នើសុំមកអគ្គនាយកដ្ឋានគយនិងរដ្ឋាករកម្ពុជា ដើម្បីចុះពិនិត្យវាយតម្លៃលើគុណវុឌ្ឍិជាបន្តបន្ទាប់ទៀត។
ប្រភពដដែលបានអោយដឹងទៀតថា ក្នុងគោលបំណងផ្សព្វផ្សាយដល់វិស័យឯកជនពាក់ព័ន្ធនូវវិធានការមួយចំនួនរបស់រាជរដ្ឋាភិបាលពាក់ព័ន្ធនឹងការកំណត់ក្រុមហ៊ុនមានគុណវុឌ្ឍិ និងការកំណត់មាត់ច្រកសម្រាប់ការនាំចូលមុខទំនិញសាច់បង្កក។
បច្ចុប្បន្ន មានតែមាត់ច្រកព្រំដែនចំនួន ៥ ប៉ុណ្ណោះ ដែលត្រូវបានអនុញ្ញាតឱ្យនាំចូលសាច់បង្កក រួមមាន ច្រកទ្វារកំពង់ផែអន្តរជាតិក្រុងព្រះសីហនុច្រកទ្វារកំពង់ផែអន្តរជាតិរាជធានីភ្នំពេញច្រកទ្វារព្រំដែនអន្តរជាតិប៉ោយប៉ែតច្រកទ្វារព្រំដែនអន្តរជាតិបាវិតនិងច្រកទ្វារព្រំដែនអន្តរជាតិដូង។ ចំពោះការនាំចូលតាមមាត់ច្រកផ្សេងពីនេះ ត្រូវស្នើសុំការអនុញ្ញាតជាមុនពីអគ្គនាយកដ្ឋានគយនិងរដ្ឋាករកម្ពុជា។
GDCE បានបន្ថែមថា ខ្លួនចង់ធ្វើឱ្យប្រសើរឡើងនូវគុណភាពនៃផលិតផលដែលចូលមកទីផ្សារកម្ពុជា និងទប់ស្កាត់ការនាំចូលសាច់ដែលមិនមានគុណភាព។
អ្នកផលិតសាច់ក្នុងស្រុក រួមទាំងសមាគមបសុសត្វកម្ពុជា បានត្អូញត្អែរថា ការនាំចូលសាច់ខុសច្បាប់ ជះឥទ្ធិពលអវិជ្ជមានដល់កសិករចិញ្ចឹមសត្វក្នុងស្រុក ដែលធ្វើអោយផលិតក្នុងស្រុកធ្លាក់ថ្លៃ។
កាលពីខែមករាកន្លងទៅនេះ ក្រសួងពាណិជ្ជកម្ម និងក្រសួងកសិកម្ម រុក្ខាប្រមាញ់ និងនេសាទ បានហាមឃាត់ការនាំចូលសាច់បង្កក ជាបណ្តោះអាសន្នសម្រាប់រយៈពេលប្រាំមួយខែ (ថ្ងៃទី១២ខែមីនា ដល់ថ្ងៃទី១២ ខែកញ្ញា ឆ្នាំ 20២៤) ដោយវិធានការនេះត្រូវបានដាក់ចេញបន្ទាប់ពីមានក្តីបារម្ភអំពីការធ្លាក់ចុះតម្លៃសម្រាប់អ្នកផលិតសាច់ក្នុងស្រុកដោយសារការនាំចូលសាច់បង្កកខុសច្បាប់។ ប៉ុន្តែ ការហាមឃាត់មិនអនុវត្តចំពោះគម្រោងវិនិយោគដែលមានលក្ខណៈសម្បត្តិគ្រប់គ្រាន់ (QIPs) ដែលនាំចូលទំនិញដើម្បីប្រើប្រាស់ជាវត្ថុធាតុដើមក្នុងផលិតកម្មសម្រាប់ការនាំចេញនោះទេ។