ឯកឧត្តបណ្ឌិតនាយករដ្ឋមន្រ្តី ហ៊ុន ម៉ាណែត បានជំរុញឱ្យធនាគារ មេយប៊ែង (Maybank) ដែលជាធនាគារដ៏ល្បីរបស់ប្រទេសម៉ាឡេស៊ី បង្កើនកិច្ចសហប្រតិបត្តិការជាមួយធនាគារជាតិនៃកម្ពុជា ដើម្បីបង្កើតការទូទាត់ឆ្លងធនាគាររួម ដើម្បីលើកកម្ពស់វិស័យហិរញ្ញវត្ថុរបស់ព្រះរាជាណាចក្រកម្ពុជា។
ឯកឧត្តបណ្ឌិតនាយករដ្ឋមន្ត្រី ក៏បានលើកទឹកចិត្តធនាគារឱ្យពិចារណាលើការបង្កើតឧស្សាហកម្មម្ហូបអាហារហាឡាល ក៏ដូចជាគាំទ្រការនាំចេញផលិតផលហាឡាលពីកម្ពុជាទៅកាន់ទីផ្សារអន្តរជាតិ។
គំនិតផ្តួចផ្តើមនេះធ្វើឡើងបន្ទាប់ពី ឯកឧត្តបណ្ឌិត ហ៊ុន ម៉ាណែត ធ្វើជាសាក្សីក្នុងពិធីផ្លាស់ប្តូរអនុស្សរណៈនៃការយោគយល់គ្នា រវាងធនាគារជាតិនៃកម្ពុជា និងធនាគារជាតិម៉ាឡេស៊ី។
នៅពេលល្ងាច ឯកឧត្តបណ្ឌិតនាយករដ្ឋមន្ត្រី បានទទួលការជួបសម្តែងការគួរសមពីគណៈប្រតិភូធនាគារ មេយប៊ែង ដឹកនាំដោយ លោក Dato’ Khairussaleh Ramli ប្រធាន និងជានាយកប្រតិបត្តិនៃធនាគារ មេយប៊ែង។ ភាគីទាំងពីរបានពិភាក្សាគ្នាអំពីមធ្យោបាយ និងផ្លាស់ប្តូរបទពិសោធន៍ ដើម្បីពង្រឹងកិច្ចសហប្រតិបត្តិការហិរញ្ញវត្ថុបន្ថែមទៀត ដើម្បីជាប្រយោជន៍នៃប្រទេសទាំងពីរ។
ក្នុងជំនួបនោះ លោក Ramli បានថ្លែងអំណរគុណចំពោះឯកឧត្តមបណ្ឌិត ហ៊ុន ម៉ាណែត ដែលបានឆ្លៀតពេលពីវេទិកាធុរកិច្ចកម្ពុជា-ម៉ាឡេស៊ី ដែលអនុញ្ញាតឱ្យលោក និងគណៈប្រតិភូមានឱកាសស្តាប់ និងស្វែងយល់បន្ថែមអំពីលទ្ធភាពនៃការពង្រីកកិច្ចសហប្រតិបត្តិការវិស័យធនាគារនៅក្នុងព្រះរាជាណាចក្រកម្ពុជា។
ប្រធានធនាគារ មេយប៊ែង បានកោតសរសើរចំពោះការដឹកនាំរបស់ ឯកឧត្តមបណ្ឌិត ហ៊ុន ម៉ាណែត ក្នុងរយៈពេលប្រាំមួយខែចុងក្រោយនេះ ហើយជឿជាក់ថា ឯកឧត្តមបណ្ឌិត នាយករដ្ឋមន្ត្រីគឺជាមេដឹកនាំដែលពោរពេញដោយភាពឆ្លាតវៃ និងចំណេះដឹង ព្រមទាំងមានការយល់ដឹងយ៉ាងស៊ីជម្រៅលើការវិនិយោគ ហិរញ្ញវត្ថុ និងប្រព័ន្ធធនាគារ។
ឯកឧត្តមបណ្ឌិត នាយករដ្ឋមន្ត្រី បានជំរុញឱ្យប្រធានធនាគារ មេយប៊ែង ពង្រីកកិច្ចសហប្រតិបត្តិការជាមួយធនាគារជាតិនៃកម្ពុជា ជាពិសេសឱ្យសហការលើការទូទាត់ឆ្លងធនាគារ ដើម្បីលើកកម្ពស់វិស័យហិរញ្ញវត្ថុនៅក្នុងព្រះរាជាណាចក្រកម្ពុជា។
លោកបានសង្កត់ធ្ងន់ថា ធនាគារដើរតួនាទីយ៉ាងសំខាន់នៅក្នុងប្រទេស ហើយជាការពិតវាគឺជាសរសៃឈាម និងជាកម្លាំងជំរុញកំណើនសេដ្ឋកិច្ច ដែលនាំមកនូវផលប្រយោជន៍ទៅវិញទៅមកសម្រាប់កម្ពុជា និងធនាគារផងដែរ។
លោកបានសម្តែងការកោតសរសើរ និងវាយតម្លៃខ្ពស់ចំពោះធនាគារ មេយប៊ែង សម្រាប់ការសម្រេចចិត្តរបស់ខ្លួនក្នុងការវិនិយោគនៅក្នុងព្រះរាជាណាចក្រកម្ពុជា នៅដើមទសវត្សរ៍ឆ្នាំ១៩៩០។
ឯកឧត្តមបណ្ឌិត នាយករដ្ឋមន្ត្រីបានលើកទឹកចិត្តបន្ថែមទៀតដល់ធនាគារឱ្យពិចារណាពីលទ្ធភាពនៃការវិនិយោគលើការកសាងប្រព័ន្ធអេកូឡូស៊ីអាហារហាឡាលនៅក្នុងប្រទេសកម្ពុជា ដោយសារធនាគារគឺជាតួអង្គសំខាន់ដែលអាចជួយសម្រួលដល់អតិថិជន និងភាគីពាក់ព័ន្ធដែលទាក់ទងនឹងគម្រោងនេះ។
លោកបានជំរុញឱ្យធនាគារ មេយប៊ែង សហការជាមួយស្ថាប័នពាក់ព័ន្ធក្នុងប្រទេសកម្ពុជា ដើម្បីជំរុញការបង្កើតឧស្សាហកម្មអាហារហាឡាល ព្រមទាំងគាំទ្រដល់ការនាំចេញផលិតផលហាឡាលពីព្រះរាជាណាចក្រកម្ពុជាទៅកាន់ទីផ្សារអន្តរជាតិផងដែរ។
ក្នុងឱកាសនោះ ក៏មានវត្តមាន លោកស្រី ជា សិរី ទេសាភិបាលធនាគារជាតិនៃកម្ពុជា លោក គិត ម៉េង ប្រធានសភាពាណិជ្ជកម្មកម្ពុជា និងលោក តាំង ឃីម៉េង ប្រធានសភាពាណិជ្ជកម្មម៉ាឡេស៊ីប្រចាំកម្ពុជា។
លោកស្រី ជា សិរី បានជួបពិភាក្សាការងារជាមួយថ្នាក់ដឹកនាំធនាគារឯកជនម៉ាឡេស៊ី រួមមាន Public Bank Group និង Maybank Group ដែលមានក្រុមហ៊ុនបុត្រសម្ព័ន្ធនៅកម្ពុជា ពាក់ព័ន្ធនឹងការវិនិយោគ ពាណិជ្ជកម្ម និងហិរញ្ញវត្ថុ ព្រមទាំងការសម្រួលប្រតិបត្តិការទូទាត់។
យោងតាមសេចក្តីប្រកាសព័ត៌មានបានឱ្យដឹងថា ធនាគារជាតិនៃកម្ពុជា និងធនាគារជាតិម៉ាឡេស៊ី បានចាប់ផ្តើមកិច្ចសហប្រតិបត្តិការទ្វេភាគីតាមរយៈការចុះហត្ថលេខាលើអនុស្សរណៈនៃការយោគយល់គ្នា លើកដំបូងក្នុងឆ្នាំ២០១០ ក្នុងគោលបំណងលើកកម្ពស់នវានុវត្តន៍ហិរញ្ញវត្ថុ ការអភិវឌ្ឍន៍ប្រព័ន្ធទូទាត់ ការតភ្ជាប់ប្រព័ន្ធទូទាត់ឆ្លងប្រទេស និងយន្តការត្រួតពិនិត្យធនាគារ។