សម្តេច ហ៊ុន សែន ប្រធានឧត្តមក្រុមប្រឹក្សាផ្ទាល់ព្រះមហាក្សត្របានវាយតម្លៃខ្ពស់ចំពោះតួនាទីដ៏សំខាន់របស់ប្រទេសចិនក្នុងការអភិវឌ្ឍសេដ្ឋកិច្ចសង្គមរបស់ប្រទេសកម្ពុជា ដែលចូលរួមចំណែកក្នុងការពង្រឹងឯករាជ្យភាពរបស់ព្រះរាជាណាចក្រកម្ពុជា។
លោកបានថ្លែងបែបនេះ នៅក្នុងជំនួបពិភាក្សាការងារជាមួយលោកស្រី ស៊ិន យៀក យៀក (Shen Yueyue)អនុប្រធានគណៈកម្មាធិការអចិន្ត្រៃយ៍នៃសភាប្រឹក្សានយោបាយប្រជាជនចិន (CPPCC) នៅវិមាន ៧ មករា ក្នុងរាជធានីភ្នំពេញកាលពីម្សិលមិញ។
សម្តេច ហ៊ុន សែន ក៏បានថ្លែងអំណរគុណចំពោះអគ្គលេខាបក្សកុម្មុយនិស្តចិន ដែលបានផ្ញើសារអបអរសាទរដល់គណបក្សប្រជាជនកម្ពុជា ក្នុងឱកាសខួបលើកទី៧០ នៃទិវាបុណ្យឯករាជ្យជាតិរបស់កម្ពុជា នៅថ្ងៃទី៩ ខែវិច្ឆិកា។
លោកស្រី ស៊ិន យៀក យៀក បានជម្រាបជូន សម្តេច ហ៊ុន សែន អំពីដំណើរទស្សនកិច្ចរបស់លោកស្រីមកកាន់កម្ពុជា គោលបំណងគឺដើម្បីជំរុញការអនុវត្តកិច្ចសហប្រតិបត្តិការជាក់ស្តែងបន្ថែមទៀត ក្នុងការកសាងសហគមន៍ជោគវាសនារួមកម្ពុជា-ចិនប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់ក្នុងយុគសម័យថ្មីនេះ។
លោកស្រីបានបញ្ជាក់ជាថ្មីថា ប្រទេសចិននឹងបន្តគាំទ្រដល់ការដឹកនាំរបស់ឯកឧត្តម បណ្ឌិតនាយករដ្ឋមន្ត្រី ហ៊ុន ម៉ាណែត ដើម្បីធានាបាននូវកំណើនសេដ្ឋកិច្ច និងនាំមកនូវវឌ្ឍនភាពបន្ថែមទៀតដល់ប្រទេសជាតិ និងប្រជាជន។
ក្នុងបរិបទនៃនយោបាយអន្តរជាតិដ៏ស្មុគស្មាញ កម្ពុជា និងចិនបានប្តេជ្ញាចិត្តបន្តគាំទ្រគ្នាទៅវិញទៅមក ដើម្បីរក្សាសន្តិភាព ស្ថិរភាព ការអភិវឌ្ឍន៍ និងធ្វើឱ្យទំនាក់ទំនងរវាងប្រជាជន និងប្រជាជនកាន់តែស៊ីជម្រៅ។ ក្នុងនាមជាមិត្តដែកថែប ភាគីទាំងពីរបានសង្កត់ធ្ងន់ថា កិច្ចព្រមព្រៀងពាណិជ្ជកម្មសេរីកម្ពុជា-ចិន ក្នុងការបន្តដើរតួនាទីយ៉ាងសំខាន់ក្នុងការកសាងសហគមន៍នៃជោគវាសនារួមស្របតាមមាគ៌ាអភិវឌ្ឍន៍របស់ប្រទេសជាតិផ្ទាល់ខ្លួន។
ភាគីទាំងពីរបានសន្យាពង្រឹងបន្ថែមទៀតនូវសមិទ្ធិផលប្រកបដោយផ្លែផ្កានៃ “ច្រករបៀងឧស្សាហកម្ម និងបច្ចេកវិទ្យា” និង “ច្រករបៀងត្រី និងអង្ករ” ក្រោមកិច្ចសហប្រតិបត្តិការត្បូងពេជ្រដែលបានឯកភាពគ្នាដោយមេដឹកនាំនៃប្រទេសទាំងពីរ។
AKP-C. Nika