រដ្ឋមន្រ្តីថ្មីនៃក្រសួងសង្គមកិច្ច អតីតយុទ្ធជន និងយុវនីតិសម្បទា លោក ជា សុមេធី បានស្នើជនរងគ្រោះដែលទទួលសេវាបន្សាបគ្រឿងញៀនខិតខំហាត់កីឡានិងលុតដំខ្លួនដោយអត់ធ្មត់ ដើម្បីកសាងអនាគតថ្មី និងប្រាប់ពួកគេឱ្យជឿជាក់ថា សង្គមមិនរើសអើងអ្នកដែលរងគ្រោះឬមានប្រវត្តិធ្លាប់ប្រើប្រាស់គ្រឿងញៀនឡើយ។
ការស្នើនេះធ្វើឡើងនៅពេលដែលលោកដឹកនាំក្រុមការងារចុះពិនិត្យវឌ្ឍនភាពរបស់មជ្ឈមណ្ឌលជាតិព្យាបាលនិងស្ដារនីតិសម្បទា អ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍ ស្ថិតនៅភូមិឫទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ កាលពីថ្ងៃចន្ទ។
លោក ជា សុមេធី សង្ឃឹមថា ជនរងគ្រោះដែលកំពុងទទួលសេវាបន្សាបគ្រឿងញៀនទាំងអស់នៅមជ្ឈមណ្ឌលជាតិព្យាបាល និងស្ដារនីតិសម្បទា នឹងឆាប់ជាសះស្បើយ ហើយបានត្រឡប់ជួបជុំគ្រួសារ។
លោកបានស្នើពួកគេបំភ្លេចរឿងចាស់ ហើយខិតខំកសាងអនាគតឱ្យក្លាយជាមនុស្សល្អ ជាធនធានរបស់ប្រទេសជាតិ។
មជ្ឈមណ្ឌលជាតិព្យាបាលនិងស្ដារនីតិសម្បទា អ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍ មានសមត្ថភាពទទួលជនរងគ្រោះបានចំនួន ២០០០នាក់។ មជ្ឈមណ្ឌលនេះមានតួនាទីបន្សាប ព្យាបាល អប់រំ ស្តារនីតិសម្បទា បណ្ដុះបណ្តាលវិជ្ជាជីវៈ និងធ្វើសមាហរណកម្មអ្នកជាសះស្បើយពីគ្រឿងញៀនចូលក្នុងសហគមន៍និងក្រុមគ្រួសារវិញ។
លោក កែវ វាសនា ប្រធានគ្រប់គ្រង មជ្ឈមណ្ឌលជាតិព្យាបាលនិងស្ដារនីតិសម្បទា អ្នកញៀនគ្រឿងញៀនដោយស្ម័គ្រចិត្ត និងផ្អែកលើសហគមន៍ បានលើកឡើងថា ជនរងគ្រោះដោយគ្រឿងញៀនប្រមាណ
៥០០នាក់ បានទទួលសេវាសេវាបន្សាបគ្រឿងញៀននៅមជ្ឈមណ្ឌលនេះ។
លោកបានបញ្ជាក់ថា ពួកគេភាគច្រើនត្រូវបានបញ្ជូនពីបណ្ដាខេត្តនានាមកកាន់ទីនេះ ដើម្បីទទួលសេវាសេវាបន្សាបជាមួយនឹងការបណ្ដុះបណ្ដាលជំនាញវិជ្ជាជីវៈដល់ពួកគេ ដែលពួកគេអាចយកទៅប្រកបអាជីពចិញ្ចឹមជីវតបាននៅពេលដែលពួកគេជាសះស្បើយ។
លោកថា៖ «នៅទីនេះមិនត្រឹមតែផ្ដល់សេវាបន្សាបគ្រឿងញៀនបណ្ណោះទេ តែថែមទាំងផ្ដល់ការបណ្ដុះបណ្ដាលជំនាញវិជ្ជាជីវៈដល់ពួកគេថែមទៀត។ នៅពេលពួកគេព្យាបាលជាសះស្បើយហើយនោះ យើងអនុញ្ញាតពួកគេត្រឡប់ទៅគ្រួសារពួកគេវិញ ចំណែកអ្នកកំព្រាគ្មានឪពុកម្ដាយ ក៏យើងអនុញ្ញាតពួកគេត្រឡប់ទៅសហគមន៍ដើមរបស់ពួកគេវិញដែរ»។
លោកបន្តថា៖ «នៅពេលពួកគេត្រឡប់ចូលសហគមន៍វិញ ហើយបណ្ដោយខ្លួនធ្លាក់ចូលការសេពគ្រឿងញៀនតាមការអូសទាញដោយមិត្តភក្តិ គឺជាបញ្ហាមួយដែលពិបាកសម្រាប់ពួកគេ»។
លោកបានបន្ថែមថា ដោយសារតែបារម្ភចំពោះបញ្ហានេះទើបរដ្ឋមន្ត្រីក្រសួងសង្គមកិច្ចបានលើកទឹកចិត្តពួកគេឱ្យបំភ្លេចរឿងចាស់ចោល ហើយខិតខំកសាងអនាគត និងជឿជាក់ថា សង្គមមិនរើសអើងពួកគេឡើយ។
របាយការណ៍របស់ក្រសួងសង្គមកិច្ច បានបង្ហាញថា បច្ចុប្បន្នកម្ពុជាមានមណ្ឌលព្យាបាលជាតិបន្សាបនិងស្តារនីតិសម្បទា ចំនួនប្រាំបួនកន្លែងនៅទូទាំងប្រទេស។ គិតចាប់ពីឆ្នាំ២០១៩ ដល់ឆ្នាំ២០២៣ មណ្ឌលព្យាបាលជាតិបន្សាបនិងស្តារនីតិសម្បទា ទាំងនេះទទួលជនរងគ្រោះដោយការប្រើប្រាស់គ្រឿងញៀនចំនួន ៤៧ ៩០៤នាក់ និងធ្វើសមាហរណកម្មអ្នកជាសះស្បើយពីគ្រឿងញៀនចូលក្នុងសហគមន៍និងក្រុមគ្រួសារវិញមានចំនួន ៣១ ៨៩១នាក់៕