ពាណិជ្ជកម្មរបស់កម្ពុជាជាមួយប្រទេសសមាជិកអាស៊ានមានតម្លៃ ៧,១ ពាន់លានដុល្លារក្នុងរយៈពេល ៦ ខែដំបូងនៃឆ្នាំនេះ ដែលស្មើនឹង ៣០ ភាគរយនៃពាណិជ្ជកម្មអន្តរជាតិសរុបរបស់ព្រះរាជាណាចក្រកម្ពុជា។
របាយការណ៍របស់ក្រសួងពាណិជ្ជកម្មបានបង្ហាញថាទំហំពាណិជ្ជកម្មកម្ពុជា-អាស៊ានបានធ្លាក់ចុះ១៧ភាគរយបើធៀបនឹងរយៈពេលដូចគ្នាកាលពីឆ្នាំមុន។
ចាប់ពីខែមករាដល់ខែមិថុនា ការនាំចេញសរុបរបស់កម្ពុជាទៅកាន់បណ្តាប្រទេសអាស៊ានមានចំនួន ២,៤ ប៊ីលានដុល្លារ កើនឡើង ៣៦ ភាគរយ ខណៈការនាំចូលសរុបមានជាង ៤,៦ ប៊ីលានដុល្លារ ថយចុះ ៣១ ភាគរយធៀបនឹងឆ្នាំមុន។
ទំហំពាណិជ្ជកម្មរវាងកម្ពុជា និងវៀតណាមមានចំនួន ៣,៣ ប៊ីលានដុល្លារ ខណៈថៃមានចំនួន ១ ប៊ីលានដុល្លារ និងសិង្ហបុរីជិត ៨០០ លានដុល្លារ។
យោងតាមក្រសួងពាណិជ្ជកម្មបានឱ្យដឹងថា ជាទូទៅកម្ពុជានាំចេញផលិតផលកសិកម្ម សម្លៀកបំពាក់ ស្បែកជើង ផលិតផលធ្វើដំណើរ គ្រឿងអេឡិចត្រូនិក និងកង់ ទៅកាន់ប្រទេសអាស៊ាន ចំណែកឯការនាំចូលរួមមាន ម្ហូបអាហារ ភេសជ្ជៈ ឧបករណ៍អគ្គិសនី និងអេឡិចត្រូនិច សម្ភារៈសំណង់ គ្រឿងយន្តកសិកម្ម និងរថយន្ត។
ក្នុងឆមាសទីមួយនៃឆ្នាំ២០២៣ ទំហំពាណិជ្ជកម្មអន្តរជាតិរបស់កម្ពុជាមានចំនួនសរុប ២៣,៦ ប៊ីលានដុល្លារ ធ្លាក់ចុះ ១៣ភាគរយធៀបនឹងរយៈពេលដូចគ្នាកាលពីឆ្នាំមុន។
ក្រុមប្រទេសអាស៊ានរួមមាន ប្រ៊ុយណេ កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន សិង្ហបុរី ថៃ និងវៀតណាម៕ ជា វណ្ណៈ – AKP