ទីភ្នាក់ងារស្បៀងអាហារជាតិ (Bapanas) បានឱ្យដឹងថា រដ្ឋាភិបាលឥណ្ឌូនេស៊ី គ្រោងនឹងនាំចូលអង្ករចំនួន ២២៥០០ តោនពីកម្ពុជា ដើម្បីបង្គ្រប់ស្តុកក្នុងប្រទេស សម្រាប់ដើម្បីបំពេញតម្រូវការនៅមុនពិធីបុណ្យស្រាយបួស Eid al-Fitr ។
លោក Arief Prasetyo Adi ប្រធានទីភ្នាក់ងារស្បៀងអាហារជាតិ (Bapanas) បានគូសបញ្ជាក់នៅក្នុងទីក្រុងហ្សាកាតាកាលពីថ្ងៃចន្ទថា “យើងកំពុងផ្តល់អាទិភាពដល់អង្ករដែលផលិតក្នុងស្រុក។ ទោះយ៉ាងណាក៏ដោយ យើងបានសម្រេចចិត្តថា សារជីវកម្ម Bulog (ក្រុមហ៊ុនភស្តុភារកម្មរបស់រដ្ឋ) នឹងទិញអង្ករពីបរទេសនៅពេលនេះ។ យើងនឹងនាំចូលអង្ករចំនួន ២២៥០០ (តោន) ពីប្រទេសកម្ពុជា”។
ប្រធានទីភ្នាក់ងារបានចេញសេចក្តីថ្លែងការណ៍បន្ទាប់ពីបានចូលរួមកិច្ចប្រជុំមួយដែលដឹកនាំដោយប្រធានាធិបតី ចូកូ វីដូដូ (Joko Widodo) នៅវិមានប្រធានាធិបតី។
លោក Adi បានកត់សម្គាល់ថា បច្ចុប្បន្នទីភ្នាក់ងារស្បៀងអាហារជាតិ កំពុងមានវិធានការត្រៀមប្រមូលផលស្រូវដ៏ច្រើន ដែលត្រូវបានព្យាករណ៍នៅចន្លោះខែមីនា និងខែមេសាឆ្នាំនេះ។
លោកបានសម្តែងសុទិដ្ឋិនិយមអំពីកសិករឥណ្ឌូនេស៊ីដែលសម្រេចបាននូវគោលដៅនៃទិន្នផលស្រូវ ប៉ុន្តែ តម្លៃទំនិញសំខាន់នេះ ត្រូវបានគេរំពឹងថានឹងនាំឱ្យមានការធ្លាក់ចុះ។
បន្ទាប់មក លោកបានកត់សម្គាល់ថា រដ្ឋាភិបាលបានខិតខំប្រឹងប្រែងជាច្រើន ដើម្បីធានាថា ប្រជាពលរដ្ឋមិនប្រឈមមុខនឹងការខ្វះខាតស្រូវ រួមទាំងការចែកជំនួយអង្ករដល់ប្រជាជនដែលជួបការលំបាករាប់លាននាក់ផងដែរ។
លោកបានគូសបញ្ជាក់ថា “កាលពីឆ្នាំមុន រដ្ឋាភិបាលបានចែកជំនួយអង្ករ ១០គីឡូក្រាម ដល់អ្នកជួបការលំបាក ២២លាននាក់ សម្រាប់រយៈពេលប្រាំពីរខែ។ យើងបានសម្រេចចិត្តបន្តការចែកអំណោយ រយៈពេលប្រាំមួយខែក្នុងឆ្នាំនេះ»។
តាមរយៈកម្មវិធីជំនួយអង្ករ លោកបានបញ្ជាក់ថា រដ្ឋាភិបាលបានគ្រប់គ្រងទៅតាមតម្រូវការអង្ករចំនួន ៨ ភាគរយនៃចំនួនប្រជាពលរដ្ឋឥណ្ឌូនេស៊ី។
លោកបានគូសបញ្ជាក់ថា “នេះមិននិយាយដល់ចលនាអាហារថោក ដែលត្រូវបានអនុម័តដោយលោក Tito Karnavian (រដ្ឋមន្ត្រីក្រសួងមហាផ្ទៃ) និងរដ្ឋាភិបាលក្នុងតំបន់”។
មន្ត្រីរូបនេះបានកត់សម្គាល់បន្ថែមទៀតថា រដ្ឋាភិបាលនឹងបន្តត្រួតពិនិត្យស្តុកស្រូវដែលបម្រុងទុកដោយសារជីវកម្ម Bulog ដើម្បីធានាបាននូវស្តុកគ្រប់គ្រាន់រហូតដល់ខែមិថុនា ឆ្នាំ២០២៤។
លោកបានសន្និដ្ឋានថា៖ «យើងត្រូវបម្រុងទុកអង្ករចំនួន ១,២ លានតោន របស់សារជីវកម្ម Bulog រហូតដល់ខែមិថុនា។