រដ្ឋបាលរាជធានីភ្នំពេញកាលពីម្សិលមិញបានដាក់ឱ្យអនុវត្តសាកល្បងការផ្ដល់សេវារដ្ឋបាលតាមប្រព័ន្ធអនឡាញ នៅអង្គភាពច្រកចេញចូលតែមួយរាជធានីភ្នំពេញ ក្នុងគោលបំណងដើម្បីបង្កើនប្រសិទ្ធភាពក្នុងការផ្តល់សេវាសាធារណៈដល់ពាណិជ្ជករ និងប្រជាជនទូទៅក្នុងយុគសម័យឌីជីថល។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញបានឲ្យដឹងថា ដើម្បីវិវត្តន៍ទៅតាមយុគសម័យឌីជីថល និងសម្រេចបាននូវការផ្តល់សេវាសាធារណៈឱ្យបានឆាប់រហ័ស សន្សំសំចៃកម្រៃ និងពេលវេលាធ្វើដំណើររបស់ប្រជាពលរដ្ឋក្នុងការមកដាក់ពាក្យស្នើសុំផ្ទាល់នៅសាលារាជធានីភ្នំពេញ នោះ រដ្ឋបាលរាជធានីភ្នំពេញ នឹងដាក់ឱ្យអនុវត្តសាកល្បងការទទួលពាក្យស្នើសុំ និងផ្តល់សេវារដ្ឋបាលតាមប្រព័ន្ធ អនឡាញ(Online)។
ក្នុងនោះលើវិស័យចំនួន៤ គឺវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ វិស័យកសិកម្ម រុក្ខាប្រមាញ់ និងនេសាទ វិស័យវប្បធម៌ និងវិចិត្រសិល្បៈ និងវិស័យទេសចរណ៍។
ទន្ទឹមនឹងការផ្តល់សេវារដ្ឋបាលតាមប្រព័ន្ធអនឡាញ(Online) បងប្អូនប្រជាពលរដ្ឋទាំងអស់នៅតែអាច អញ្ជើញមកទំនាក់ទំនងស្នើសុំសេវាដោយផ្ទាល់នៅអង្គភាពច្រកចេញចូលតែមួយរាជធានីភ្នំពេញ ដែលមានទីតាំង នៅក្នុងបរិវេណសាលារាជធានីភ្នំពេញ អាសយដ្ឋានលេខ៦៩ មហាវិថីព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញដូចមុនដដែល។
សម្រាប់បងប្អូនប្រជាពលរដ្ឋ ដែលមានបំណងចង់ដាក់ពាក្យស្នើសុំសេវារដ្ឋបាលតាមប្រព័ន្ធអនឡាញ(Online) សូមចូលទៅកាន់គេហទំព័រ http://online.owso.gov.kh/ ដើម្បីបង្កើតគណនីសម្រាប់ស្នើសុំសេវារដ្ឋបាល ទាំង៤
វិស័យខាងលើ ដោយភ្ជាប់ឯកសារពាក់ព័ន្ធតាមការណែនាំក្នុងជំហាននីមួយៗ។
ទោះជាយ៉ាងនេះក្តី អភិបាលរងសាលារាជធានីភ្នំពេញ លោក កើត ឆែ បានប្រាប់កាសែតខ្មែរថាមស៍កាលពីម្សិលមិញថា សេវារដ្ឋបាលសាធារណៈតាមប្រព័ន្ធអនឡាញ
និងប្រព័ន្ធបង្កាន់ដៃពាក្យសុំត្រូវបានប្រើប្រាស់ចាប់ពីថ្ងៃ
ទី៦ ខែកញ្ញា ឆ្នាំ២០២៣។
លោកបានមានប្រសាសន៍ថា សាលារាជធានីភ្នំពេញបានចាប់ផ្ដើមដាក់ឱ្យដំណើរការប្រព័ន្ធសេវាសាធារណៈតាមប្រព័ន្ធអនឡាញតាមមូលដ្ឋានសាកល្បងមួយរយៈ ដើម្បីផ្តោតលើសេវាចាំបាច់មួយចំនួនដែលអាចឱ្យប្រព័ន្ធដំណើរការ និងគ្រប់គ្រងប្រកបដោយប្រសិទ្ធភាព មុននឹងឈានទៅជំហានបន្ទាប់។ សាលារាជធានីភ្នំពេញកំពុងប្រឈមនឹងការខ្វះខាតធនធានមនុស្ស និងឧបករណ៍។
លោកមានប្រសាសន៍ថា៖ « ពួកយើងផ្តល់សេវាអនឡាញដែលស្រួល និងមាននិតីវិធីងាយស្រួល ហើយប្រតិបត្តិដំបូង បន្ទាប់មក យើងនឹងសិក្សាពីសេវាកម្មដែលមានភាពស្មុគស្មាញបន្ថែមទៀត ដូចជាការចេញប័ណ្ណនៅពេលក្រោយ ដើម្បីផ្តល់សេវាកម្មកាន់តែមានប្រសិទ្ធភាព និងងាយស្រួលដល់ប្រជាជនរបស់យើង។ ចាប់ពីពេលនេះតទៅ យើងផ្តល់សេវាកម្មកាន់តែងាយស្រួល និងសាមញ្ញជាងមុន ដូចជាការចេញអាជ្ញាប័ណ្ណសម្រាប់អាជីវកម្មភោជនីយដ្ឋានជាដើម»។
លោកមានប្រសាសន៍បន្ថែមថា៖ « ជាឧទាហរណ៍ នៅពេលដែលពួកគេស្នើសុំបើកភោជនីយដ្ឋាន យើងគ្រាន់តែត្រូវការទីតាំងរបស់ពួកគេ ដើម្បីមើលថាតើពួកគេមានកន្លែងចតរថយន្តគ្រប់គ្រាន់ និងសមរម្យឬអត់។ ដូច្នេះនៅពេលដែលពួកគេថតរូប និងផ្ញើរូបថតទីតាំងរបស់ពួកគេមកយើង យើងនឹងអាចធ្វើការវាយតម្លៃបាន ព្រោះយើងអាចប្រើប្រាស់បច្ចេកវិទ្យាទីតាំងដើម្បីសម្រេចថាតើយើងនឹងអនុញ្ញាតឱ្យពួកគេបើកភោជនីយដ្ឋាននោះឬអត់ »៕
ប្រែសម្រួលដោយ៖ សុ ជាតា