ការនាំចេញផលិតផលសំលៀកបំពាក់ ស្បែកជើង និង ផលិតផលធ្វើដំណើរ (GFT) របស់កម្ពុជាបានធ្លាក់ចុះ ២០, ៤៤ ភាគរយក្នុងអំឡុងខែមករាដល់ខែកក្កដា ឆ្នាំ ២០២៣នេះ។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករបានឲ្យដឹងថា ការនាំចេញផលិតផល( GFT )ក្នុងរយៈពេល៧ខែឆ្នាំនេះមានចំនួន ៦, ២៧ លានដុល្លារសហរដ្ឋអាមេរិក ពោលគឺធ្លាក់ចុះពីតម្លៃ ៧, ៨៩ លានដុល្លារក្នុងអំឡុងពេលដូចគ្នាកាលពីឆ្នាំទៅ។
ជាមួយគ្នានេះ ការនាំចេញទំនិញរបស់ផលិតផល GFT សម្រាប់ខែកក្កដា ឆ្នាំ ២០២៣ តែឯងបានបង្ហាញពីការធ្លាក់ចុះ ២៨,១៥ ភាគរយធៀបនឹងរយៈពេលដូចគ្នាកាលពីឆ្នាំមុន បន្ទាប់ពីការត្រលប់មកវិញនៅក្នុងខែមិថុនា នៅពេលដែលការនាំចេញទាំងនេះទទួលបានកំណើនមួយភាគរយធៀបនឹងខែមិថុនា ឆ្នាំ ២០២២។ ការធ្លាក់ចុះសម្រាប់ខែកក្កដានៃផលិតផល GFT ក៏បណ្តាលឱ្យការនាំចេញសរុបរបស់ប្រទេសធ្លាក់ចុះផងដែរគឺ ១,៨ ភាគរយក្នុងអំឡុងខែមករាដល់ខែកក្កដានៃឆ្នាំនេះ។
នៅក្នុងវិស័យនេះ សម្រាប់សម្លៀកបំពាក់ផ្នែកប៉ាក់បាននាំមកនូវប្រាក់ចំណូលចំនួន ៣,០៦ពាន់លានដុល្លាររហូតដល់ខែកក្កដា ពោលគឺធ្លាក់ចុះ ២២,៨ ភាគរយ បើធៀបនឹងតម្លៃ ៣,៩៧ ពាន់លានដុល្លារដែលរកបានក្នុងរយៈពេលដូចគ្នាក្នុងឆ្នាំ ២០២២។ ចំពោះសម្លៀកបំពាក់ដែលមិនមានប៉ាក់រកបានចំណូល ១, ៤០ ពាន់លានដុល្លារ ធៀបនឹងតម្លៃចំណូល ១,៦៤ ពាន់លានដុល្លារសម្រាប់រយៈពេលដូចគ្នាកាលពីឆ្នាំមុន ហើយពីមួយឆ្នាំទៅមួយឆ្នាំ ធ្លាក់ចុះ ១៤,៧ភាគរយ ។
លោក ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី(AVI) មានប្រសាសន៍ប្រាប់ខ្មែរថាមស៍ថា វិស័យផលិតផល GFT គឺត្រូវទទួលផលប៉ះពាល់ដោយស្ថានភាពសេដ្ឋកិច្ចសាកល។
លោកមានប្រសាសន៍ថា សង្គ្រាមអូសបន្លាយក្នុងប្រទេសអ៊ុយក្រែន និងការបង្កើនការប្រជែងគ្នាខាងភូមិសាស្ត្រនយោបាយបានប៉ះពាល់យ៉ាងធ្ងន់ធ្ងរដល់ទស្សនវិស័យសេដ្ឋកិច្ចពិភពលោក។
លោកមានប្រសសាសន៍ថា ខណៈដែលកិច្ចព្រមព្រៀងពាណិជ្ជកម្មសេរីរវាងកម្ពុជានិងចិន(CCFTA) អាចជំរុញការនាំចេញកសិកម្មរបស់កម្ពុជាទៅកាន់ប្រទេសចិន
វិស័យផលិតផល GFT ប្រហែលជាមិនអាចទទួលបានសារៈប្រយោជន៍ក្រោមកិច្ចព្រមព្រៀងនេះទេ។
តាមរយៈការដកស្រង់ពីការសិក្សាសមាហរណកម្មពាណិជ្ជកម្មកម្ពុជាឆ្នាំ ២០១៩-២០២៣ លោកបាននិយាយនៅក្នុងអត្ថបទមួយក្នុង Fulcrum ថាប្រទេសចិនមិនអាចជំនួសសហភាពអឺរ៉ុប និងសហរដ្ឋអាមេរិកដែលជាទីផ្សារគោលដៅសម្រាប់សម្លៀកបំពាក់ កង់ និងស្បែកជើងរបស់កម្ពុជា។
លោកមានប្រសាសន៍ថា ដោយសារបារម្ភពីបញ្ហាសិទ្ឋមនុស្ស ប្រជាធិបតេយ្យនៅកម្ពុជា EU កាត់បន្ថយការអនុគ្រោះ EBA របស់ខ្លួនប្រហែល ២០ ភាគរយសម្រាប់កម្ពុជាក្នុងខែសីហា ឆ្នាំ ២០២០។ សហរដ្ឋអាមេរិកក៏បានផ្អាកការអនុគ្រោះពន្ធ GSP របស់ខ្លួនផងដែរ។
លោកបានសសេរក្នុងអត្ថបទនោះថាកម្ពុជាក៏មានដែនកំណត់ដែរក្នុងការពង្រីកទីផ្សារនាំចេញទៅកាន់តំបន់។ លោកថា៖ «មានតែផ្នែកតូចមួយនៃការនាំចេញសរុបទៅកាន់ទីផ្សារបែបនេះ ហើយការធ្វើអាជីវកម្មរបស់ប្រតេសគឺមិនទាន់ត្រូវបានរួមបញ្ចូលឱ្យបានគ្រប់គ្រាន់ទៅក្នុងខ្សែសង្វាក់តម្លៃក្នុងតំបន់ផងដែរ»។
សេដ្ឋវិទូជាន់ខ្ពស់ លោក គី សេរីវឌ្ឍន៍ អគ្គនាយកវិទ្យាស្ថានសិក្សាចិន នៃរាជបណ្ឌិត្យសភាកម្ពុជាក៏បានចែករំលែកថាវិស័យផលិតGFTរបស់កម្ពុជាកំពុងតស៊ូទៅនឹងការធ្លាក់ចុះនៃសេដ្ឋកិច្ចសាកល។
ប៉ុន្តែនៅក្នុងផ្នត់គំនិតរបស់លោក បញ្ហា GSP និង EBA គឺមិនប៉ះពាល់ដល់ការនាំចេញផលិតផលGFT ច្រើនសម្រាប់កម្ពុជានោះទេ ។ លោកបានកត់សម្គាល់ថា ការនាំចេញផលិត GFT របស់កម្ពុជាគឺនៅកើនឡើងពីឆ្នាំ ២០១៩ ទៅ ២០២២ សូម្បីតែបន្ទាប់ពីការមិនបន្ត GSP និងការកាត់បន្ថយ EBA ជាដើម។
បន្ទាប់មករដ្ឋាភិបាលកម្ពុជាបានចាប់ផ្តើមផ្តល់ប្រាក់ឧបត្ថម្ភដល់កម្មករដែលបាត់បង់ការងារដោយសាររោងចក្របិទ និង ព្យួរការងារ។ ក្នុងនោះកម្មករដែលបាត់បង់ការងារទទួលបានប្រាក់ឧបត្ថម្ភ៧០ដុល្លារក្នុងមួយខែ ដោយក្នុងនោះម្ចាស់រោងចក្រចូលរួម ៣០ដុល្លារ និងក្រៅពីនេះជារបស់រដ្ឋាភិបាលក្នុងការចំណាយ៕
ប្រែសម្រួលដោយ៖ សុ ជាតា