រដ្ឋាភិបាលលើកទឹកចិត្តក្រុមគ្រួសារ ដែលមានលទ្ធភាពយកកូនឱ្យបានច្រើនលើសពីចំនួនដែលបានកំណត់ ដើម្បីជៀសវាងហានិភ័យកង្វះកម្លាំងពលកម្មនៅឆ្នាំ២០៥០ និងជំរុញកំណើនប្រជាជនកម្ពុជាឱ្យមានចំនួនច្រើនសម្រាប់ថ្ងៃអនាគត។
ក្នុងពិធីបិទសន្និបាតបូកសរុបការងារឆ្នាំ២០២៣ និងលើកទិសដៅការងារសម្រាប់ឆ្នាំ២០២៤ របស់ក្រសួងផែនការ កាលពីម្សិលមិញ លោកនាយករដ្ឋមន្ត្រី ហ៊ុន ម៉ាណែត បញ្ជាក់ថា៖ «ខ្ញុំក៏សុំលើកទឹកចិត្តដល់គូស្វាមីភរិយា ដែលមានលទ្ធភាពសេដ្ឋកិច្ចគួរមានកូនច្រើនលើសពីចំនួនកំណត់ ដើម្បីជៀសវាងនូវហានិភ័យកង្វះកម្លាំងពលកម្ម»។
លោកបន្ថែមថា៖ «យើងឃើញហើយថា នៅឆ្នាំ២០៥០ ចំនួនប្រជាជនដែលមានវ័យចាស់ គឺច្រើនជាង។ ឥឡូវនេះយើងមានអត្រាមនុស្សវ័យកណ្តាលមានកម្រិតធំនៅឡើយ ប៉ុន្តែបើសិនជាចំនួនអ្នកកើត កាន់តែតិចជាងចំនួនអ្នកចាស់ យើងមិនយូរមិនឆាប់អាចខ្វះកម្លាំងពលកម្ម ព្រោះនៅប្រទេសជិតខាងរបស់យើងជួបបញ្ហាទាំងនេះ»។
លោកបន្តថា ទោះបីទិន្នន័យជំរឿនបង្ហាញថា កម្ពុជាមិនទាន់មានបញ្ហាចោទនៅឆ្នាំ២០៥០ ចំពោះការខ្វះកម្លាំងពលកម្មក្តី ប៉ុន្តែមានសញ្ញានៃការថយចុះរវាងគម្លាតអ្នកដែលមានអាយុចាស់ និងអ្នកដែលពេញកម្លាំង គឺចាប់ផ្តើមកើន ហើយប្រសិនបើអត្រាកំណើតកាន់តែថយ នោះកម្ពុជានឹងអាចមានបញ្ហាប្រឈម។
លោកនាយករដ្ឋមន្ត្រីបញ្ជាក់ថា បើសិនប្រជាពលរដ្ឋយកកូនក្នុងពេលបច្ចុប្បន្ន គឺមានភាពងាយស្រួលជាងមានកូននៅឆ្នាំ២០៥០ ខាងមុខ។
លោក ហ៊ុន ម៉ាណែត បញ្ជាក់ថា គោលនយោបាយជាតិប្រជាជន ២០១៦-២០៣០ គឺឈរលើគោលការណ៍ទទួលស្គាល់ និងគាំទ្រចំពោះសិទ្ធិរបស់គូស្វាមីភរិយា និងបុគ្គលទាំងអស់ឱ្យមានសិទ្ធិជាមូលដ្ឋានក្នុងការសម្រេចចិត្តដោយសេរី និងទទួលខុសត្រូវលើកំណត់ចំនួនកូន ព្រមទាំងការពន្យារកំណើត ជាពិសេសជំរុញឱ្យមានលទ្ធភាពទទួលបាននូវព័ត៌មាន ការអប់រំ សេវា និងមធ្យោបាយនានា ដើម្បីធ្វើការសម្រេចចិត្តបញ្ហាខាងលើនេះ។
លោក ប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជា ធ្លាប់ឱ្យដឹងថា ការលើកទឹកចិត្តឱ្យយកកូនច្រើន គឺជារឿងល្អ ប៉ុន្តែរដ្ឋគួរតែមានគោលនយោបាយសមស្របណាមួយ ដើម្បីលើកទឹកចិត្តឪពុកម្តាយដែលចង់បានកូនច្រើនផងដែរ ព្រោះការចិញ្ចឹមកូននាពេលបច្ចុប្បន្ន គឺខុសពី១០ ទៅ២០ឆ្នាំមុន។
លោកបញ្ជាក់ថា៖ «ការចិញ្ចឹមកូននាពេលបច្ចុប្បន្ននេះ ត្រូវចំណាយច្រើន ហើយការផ្លាស់ប្តូរសង្គមវប្បធម៌យើងក៏មានការប្រែប្រួល ដែលកាលពីមុនម្តាយតែងតែនៅផ្ទះ ដើម្បីមើលកូន ប៉ុន្តែឥឡូវអត់ទេ ពួកគេត្រូវចេញទៅធ្វើការទាំងអស់គ្នា ដើម្បីបានចំណូលមកទប់ទល់លើការចំណាយ និងធ្វើឱ្យជីវភាពគ្រួសារសមរម្យ»។
លោកបន្ថែមថា ចំពោះការលើកទឹកចិត្តឱ្យពលរដ្ឋយកកូនឱ្យបានច្រើននេះ ទាល់តែរដ្ឋាភិបាលមានការគាំទ្រ លើកទឹកចិត្ត និងបង្កបរិយាកាសប្រកបដោយភាពសមរម្យ ទើបអាចជំរុញឱ្យឪពុកម្តាយយកកូនឱ្យបានច្រើនស្របតាមបំណងរបស់ខ្លួន។
កាលពីឆ្នាំ២០២៣ រដ្ឋាភិបាលធ្លាប់ប្រកាសព័ត៌មានថា កម្ពុជានឹងក្លាយជាប្រទេសអ្នកមាននៅឆ្នាំ២០៥០ ដែលបច្ចុប្បន្នត្រូវរៀបចំគោលនយោបាយ ដើម្បីកុំឱ្យប្រជាជនមានចំនួនមនុស្សចាស់ច្រើនជាងក្មេងសម្រាប់ថ្ងៃអនាគត។
នៅឆ្នាំ២០៥០ ភាគច្រើនប្រជាពលរដ្ឋមិនចង់បានកូនច្រើននោះទេ ព្រោះត្រូវចំណាយច្រើនលើការចិញ្ចឹម និងរបៀបរបបធ្វើការ ហើយចំនួនអ្នកក្រុងនាពេលបច្ចុប្បន្ន គឺមានកូនត្រឹម១កន្លះ ដែលមធ្យមភាគមានការថយចុះ។
រដ្ឋាភិបាលបានស្នើក្រសួងផែនការ និងក្រសួងពាក់ព័ន្ធលើកទឹកចិត្តប្រជាពលរដ្ឋបង្កើតកូនឱ្យបានច្រើន ព្រោះដីនៅទូលាយច្រើន ហើយការបង្កើនចំនួនប្រជាជន នឹងរួមចំណែកធ្វើឱ្យទីផ្សារមានភាពធំទូលាយ និងរឹងមាំនាពេលអនាគត។
រដ្ឋាភិបាលបន្ថែមថា បច្ចុប្បន្នកម្ពុជាមានប្រជាជនប្រមាណ ១៧លាននាក់ ដូច្នេះគួរបង្កើនចំនួនឱ្យបានដល់ ៣០ ទៅ ៤០លាននាក់ នៅត្រឹមឆ្នាំ២០៥០។
លទ្ធផលចុងក្រោយជំរឿនទូទៅប្រទេសកម្ពុជាឆ្នាំ២០១៩ គិតត្រឹមថ្ងៃទី៣ ខែមីនា ឆ្នាំ២០១៩ ប្រជាជនកម្ពុជាសរុបមានចំនួន ១៥,២៨៨,៤៨៩នាក់ (ស្រី ៧,៨៦៩,៩១២នាក់)។ ចំនួនប្រជាជនសរុបកើនឡើង ១,៨៩២,៨០៧នាក់ ស្មើនឹង ១៤.១ភាគរយ ក្នុងរយៈពេល១១ឆ្នាំ រវាងឆ្នាំ២០០៨ និងឆ្នាំ២០១៩។
អត្រាកំណើនប្រជាជនប្រចាំឆ្នាំ បានថយចុះពី ១.៥ភាគរយ ក្នុងចន្លោះឆ្នាំ១៩៩៨ និងឆ្នាំ២០០៨ មកត្រឹម ១.២ភាគរយ ក្នុងចន្លោះឆ្នាំ២០០៨ និងឆ្នាំ២០១៩។ អត្រាកំណើនប្រចាំឆ្នាំរបស់កម្ពុជា ក្នុងទសវត្សចុងក្រោយនេះពិនិត្យឃើញថា ខ្ពស់ជាងអត្រាកំណើនមធ្យមនៅអាស៊ីអាគ្នេយ៍ ដែលមានតែ ១.០ភាគរយ។
រាជធានី-ខេត្ត ដែលមានចំនួនប្រជាជនច្រើនជាងគេ គឺមាននៅរាជធានីភ្នំពេញ ២,១២៩,៣៧១នាក់ ហើយខេត្តកែប ដែលមានប្រជាជនតិចជាងគេ ៤១,៧៩៨នាក់៕