ក្រុមប្រឹក្សាជាតិប្រាក់ឈ្នួលអប្បបរមាកាលពីថ្ងៃពុធបានបើកកិច្ចពិភាក្សាពីប្រាក់ឈ្នួលអប្បបរមាសម្រាប់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូប សម្រាប់ឆ្នាំ២០២៤។
កិច្ចប្រជុំនេះបានចាប់ផ្តើម ខណៈដែលដែលតម្រូវការផលិតផលវិស័យកាត់ដេរធ្លាក់ចុះ ដោយសារកំណើនយឺតនៃសេដ្ឋកិច្ចក្នុងទីផ្សារនាំចេញដ៏សំខាន់មួយនេះ។
ក្នុងកិច្ចប្រជុំនោះ មានវត្តមាន រដ្ឋមន្រ្តីក្រសួងការងារ លោក អុិត សំហេង និង លោក ណាង សុធី ជាអនុប្រធាន តំណាងអង្គការវិជ្ជាជីវៈរបស់និយោជក ព្រមទាំងលោក គឹម ចាន់សំណាង ជាអនុប្រធាន តំណាងអង្គការវិជ្ជាជីវៈរបស់កម្មករនិយោជិត។ ភាគីទាំងបីបានបង្ហាញស្ថិតិសំខាន់ៗនៃលក្ខណៈវិនិច្ឆ័យសង្គម និងសេដ្ឋកិច្ចទាំងប្រាំពីរសម្រាប់អ្នកពាក់ព័ន្ធ ជាមូលដ្ឋានសម្រាប់ការចរចាប្រាក់ឈ្នួលអប្បបរមាសម្រាប់ឆ្នាំ ២០២៤។
សេចក្តីប្រកាសព័ត៌មានបានឲ្យដឹងថា ក្នុងកិច្ចប្រជុំបានស្តាប់គោលជំហរពីតំណាងនីមួយៗ ទៅលើបម្រែបម្រួលលក្ខណៈវិនិច្ឆ័យសង្គមនិងសេដ្ឋកិច្ច ប៉ុន្តែភាគីតំណាងនិយោជក និងភាគីតំណាងកម្មករនិយោជិត មិនទាន់អាចបញ្ជាក់បាននូវតួលេខដែលជាគោលជំហរ ផ្លូវការរបស់ខ្លួននៅឡើយ ដោយស្នើសុំប្រជុំផ្ទៃក្នុងរបស់ខ្លួនបន្ថែមទៀត។
លោក អុិត សំហេង មានប្រសាសន៍ថា ភាគីនីមួយមិនទាន់អាចបញ្ជាក់ពីតួរលេខបាននៅឡើយទេ ដោយសារសុំប្រជុំផ្ទៃក្នុងបន្ថែមទៀត។
លោកមានប្រសាសន៍ថា៖ « រដ្ឋាភិបាលនៅក្នុងអាណត្តិទី៦ បានយកចិត្តទុកដាក់ខ្ពស់ក្នុងការកិច្ចពិភាក្សាប្រាក់ឈ្នួលកម្មករ និង រដ្ឋាភិបាលអណត្តិទី៧ថ្មីនេះ ខ្ញុំជឿជាក់ថារដ្ឋាភិបាលថ្មីនឹងបន្តការយកចិត្តទុកដាក់ខ្ពស់បន្ថែមទៀត»។
លោក អាត់ ធន់ ប្រធានសហភាពការងារកម្ពុជា (CLC) បាន បានដាក់ក្តីសង្ឃឹមខ្ពស់ថា ការដំឡើងប្រាក់ឈ្នួលអប្បបរមាសម្រាប់ឆ្នាំក្រោយគួរតែត្រូវបានធ្វើឡើងដោយសារវិស័យកាត់ដេរនៅតែជាកត្តាជំរុញកំណើនសេដ្ឋកិច្ចដ៏ធំបំផុត ហើយការដំឡើងប្រាក់ឈ្នួលអប្បបរមានឹងជួយដល់ជីវភាពរបស់កម្មករ។
លោកមានប្រសាសន៍ថា៖ « ការដំឡើងប្រាក់ឈ្នួលសម្រាប់ឆ្នាំ ២០២៤នេះនឹងមានលទ្ឋភាព ខណៈដែលកម្ពុជានៅតែមានសក្តានុពលនាំចេញ និង ប្រាក់ឈ្នួលក្នុងស្រុកមិនខ្ពស់ជាងប្រទេសក្នុងតំបន់»។
គិតត្រឹមមកដល់ខែសីហា ឆ្នាំ២០២៣នេះ កម្ពុជាមានរោងចក្រកាត់ដេរ សម្លៀកបំពាក់ ស្បែកជើង និងផលិតផលធ្វើដំណើរចំនួន ១០៧៧ និងផ្តល់ការងារដល់ប្រជាពលរដ្ឋកម្ពុជាជិត ៨០ម៉ឺននាក់។
ក្នុងនោះមានរោងចក្រកាត់ដេរចំនួន ៨០២ មានរោងចក្រស្បែកជើង ១៤០ និងរោងចក្រសម្រាប់ផលិតទំនិញធ្វើដំណើរចំនួន ១៣៤ រោងចក្រ។
វិស័យនេះបានរងផលប៉ះពាល់ដោយសារកំណើនសេដ្ឋកិច្ចយឺតដោយសារសង្រ្គាមអូសបន្លាយរវាងរុស្សី និង អ៊ុយក្រែន និងកំណើនអតិផរណាខ្ពស់លើពិភពលោក។
លោក គង់ សាង ប្រធានសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា(TAFTAC) មានប្រសាសន៍ឲ្យដឹងថាការបញ្ជាទិញផលិតផលកាត់ដេរ ត្រូវបានកាត់បន្ថយ ដោយសារបញ្ហាវិបត្តិសេដ្ឋកិច្ច ហេតុនេះហើយពួកគេបង្វែរទៅប្រទេសបង់ក្លាដេសវិញ ព្រោះប្រទេសនេះមានលទ្ធភាពអាចផលិតទំនិញតម្លៃថោកបាន។
លោក គង់ សាង បានមានប្រសាសន៍យ៉ាងដូច្នេះក្នុងវេទិកាធុរកិច្ចកម្ពុជាកាលពីសប្តាហ៍មុន ដោយលោកបានគូសបញ្ជាក់ថា ៖ « ជាមួយនឹងប្រាក់ឈ្នួលខ្ពស់ប្រៀបធៀបនឹងប្រទេសផលិតផលិតកាត់ដេរ ពលករជំនាញត្រូវការជាចាំបាត់ក្នុងការប្រកួតប្រជែងសម្រាប់កម្ពុជាលើវិស័យការកាត់ដេរនៅក្នុងទីផ្សារ»។
ក្រុមប្រឹក្សាជាតិប្រាក់ឈ្នួលអប្បបរមាអាណត្តិទី៣ នឹងប្រកាសលទ្ឋផលនៅថ្ងៃទី ២ តុលា ក្រោយការរៀបចំកិច្ចប្រជុំបន្ទាប់ នៅព្រឹកថ្ងៃទី២៨ ខែសីហា; ថ្ងៃទី៤; ថ្ងៃទី១១; ថ្ងៃទី១៨; ថ្ងៃទី២៥ ខែកញ្ញា។
នៅក្នុង ២០២៣នេះ ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូប គឺមានចំនួន២០០ដុល្លារក្នុងមួយខែ ពោលគឺកើនឡើងពី ១៩៤ ដុល្លារនៅក្នុងឆ្នាំ ២០២២៕ ប្រែសម្រួលដោយ៖ សុ ជាតា