លោកនាយករដ្ឋមន្ត្រី ហ៊ុន ម៉ាណែត ប្តេជ្ញាចិត្តបន្តគោលនយោបាយរដ្ឋាភិបាលអាណត្តិមុន គឺការប្រយុទ្ធប្រឆាំងដាច់ខាតចំពោះសាសនានិងទស្សនៈនយោបាយជ្រុលនិយម។
ការប្ដេជ្ញានេះធ្វើឡើងក្នុងកំលុងពេលលោកស្រោចស្រពព្រះសុគន្ធវារីប្រគេនព្រះមន្ត្រីសង្ឃជាន់ខ្ពស់១១អង្គគង់នៅវត្តមុនីសុវណ្ណហៅវត្តចំពុះក្អែកស្ថិតក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញកាលពីថ្ងៃសុក្រ។
លោកបានលើកឡើងថា មានប្រទេសជាច្រើនណាស់បានដាក់គោលនយោបាយបទឈប់បាញ់ ប៉ុន្តែការបាញ់គ្នានៅតែបន្តកើតមានឡើងដោយសារតែជំនឿជឿទុកចិត្តគ្នាមិនបាន។
លោកថានៅកន្លែងខ្លះត្រូវបានបញ្ចប់ដោយសារតែការកម្ទេចចោលទាំងស្រុងនូវអង្គការចាត់តាំងគ្មានការយោគ យល់ឬដាក់គោលនយោបាយឈ្នះ-ឈ្នះ។ បញ្ហានេះបានបង្កើតនិងបញ្ចប់សង្គ្រាមដោយនៅតែរក្សាចិត្តគុំគួនគ្នា។
លោកបានបន្ថែមថា ក្នុងតំបន់ខ្លះបានព្យាយាមដោះស្រាយតាំងពជាង៣០ឬ៤០ឆ្នាំមកហើយនៅតែមិនទាន់ចប់ដោយសារតែបង្កើតរូបមន្តមិនទុកចិត្តគ្មាន ជាពិសេសការញែកក្នុងជំនឿសាសនា។ ចំណែកនយោបាយឈ្នះ-ឈ្នះបានផ្តល់នូវការយោគយល់ដែលធ្វើឱ្យជឿទុកចិត្តនិងធានានូវសន្តិភាពមួយប្រកបដោយចីរភាព។
លោកបាននិយាយថា៖ «ខ្ញុំមានការសប្បាយរីករាយដែលនៅក្នុងប្រទេសយើងមិនមានជម្លោះសាសនា ដែលជាកត្តាមួយមាននៅក្នុងជម្លោះសហគមន៍។ ហេតុនេះហើយទើបរាជរដ្ឋាភិបាលអាណត្តិទី៧នេះ នឹងបន្តនូវប្រពៃណីនិងគោលនយោបាយ ដែលរាជរដ្ឋាភិបាលអាណត្តិមុន៤០ឆ្នាំជាងមកនេះ ដែលបានគោរពប្រតិបត្តិ ការជំរុញ និងការបើកសិទ្ធិសេរីភាពនៅក្នុងការធានាសិទ្ធិសេរីភាពសាសនាគ្រប់សាសនាទាំងអស់ ហើយការព្យាយាមថែរក្សានូវសុខដុមរមណីយកម្មសាសនា»។
លោកបានបញ្ជាក់ថា៖ «វាជាធាតុមួយដ៏សំខាន់នៅក្នុងការថែរក្សាសុខសន្តិភាព និងលុបបំបាត់ឱ្យអស់នូវគោលនយោបាយឬទស្សនៈជ្រុលនិយមណាមួយដែលប៉ុនប៉ងបំផ្លាញសុខសន្តិភាព។ នេះជាការប្តេជ្ញាចិត្តរបស់រាជរដ្ឋាភិបាលអាណត្តិទី៧»។
ទន្ទឹមនឹងនេះលោក ហ៊ុន ម៉ាណែត បានអំពាវនាវដល់គណៈសង្ឃទាំងពីរគណៈនិងថ្នាក់ដឹកនាំគ្រប់សាសនានៅក្នុងប្រទេសកម្ពុជាបន្តកិច្ចសហការជាមួយក្រសួងធម្មការនិងសាសនា ដើម្បីចូលរួមថែរក្សាសុខដុមរមនាកម្មសាសនានិងលើកកម្ពស់សីលធម៌សង្គមកាន់តែប្រសើរឡើង។
លោកបានជំរុញក្រសួងធម្មការនិងសាសនាបន្តជំរុញការរៀបចំច្បាប់ស្ដីពីសាសនា ដើម្បីធ្វើជាមូលដ្ឋានក្នុងកិច្ចប្រតិបត្តិការងារក្នុងវិស័យសាសនានិងបំពេញបន្ថែមលើលិខិតបទដ្ឋានគតិយុត្តនានាក្រោយច្បាប់ ដើម្បីបំពេញតម្រូវការជាក់ស្ដែងរបស់ក្រសួងសម្រាប់លើកកម្ពស់ព្រះពុទ្ធសាសនា ក៏ដូចជាសាសនាផ្សេងៗទៀតទៅកម្ពុជា។
ចំណែកសង្ឃក្នុងព្រះពុទ្ធសាសនាបន្តការជំរុញលើកកម្ពស់ការប្រតិបត្តិធម៌វិន័យតាមពុទ្ធដិកា ដើម្បីជាយានសម្រាប់ចម្លង ជាស្រែបុណ្យប្រកបដោយសម្មាតិធិ និងជាការសន្សំបុណ្យកុសលសម្រាប់ព្រះសង្ឃគ្រប់ៗអង្គ។
បន្ថែមលើសពីនេះ គឺបន្តជួយដល់សង្គមជាតិលើការលើកកម្ពស់គុណធម៌ សីលធម៌ សុជីវធម៌ ការថែរក្សាវប្បធម៌អរិយធម៌ប្រពៃណីទំនៀមទម្លាប់របស់ជាតិតាមរយៈការសម្ដែងធម្មទេសនានៅគ្រប់ទីកន្លែងនិងការផ្សព្វផ្សាយតាមបណ្ដាញសង្គម។
លោក ប៉ែន បូណា ប្រធានអង្គភាពអ្នកនាំពាក្យរដ្ឋាភិបាល បានបញ្ជក់ថា ប្រទេសកម្ពុជាមានសំណាងខ្លាំងដែលមានសន្តិភាពនិងសុខុដមនីយកម្មសាសនា។ ទាំងពីរនេះត្រូវបានចាត់ទុកថា ជាទ្រព្យព្រេងសំណាងរបស់ប្រទេសនិងប្រជាជន។
លោកបានកត់សម្គាល់ឃើញថា នៅលើពិភពលោកសព្វថ្ងៃនេះមានសង្គ្រាមនិងអំពើហិង្សាផ្សេងៗបានកើតមានឡើងដោយសារចលនាជ្រុលនិយម។ ទស្សនវិជ្ជាជ្រុលនិយមអាចបង្កប់ក្នុងនយោបាយនិងក្នុងសាសនា ហើយក្នុងសហគមន៍មួយដែលមានករណីនេះកើតមានឡើង គឺនៅក្នុងសហគមន៍នោះមិនមានសេចក្ដីសុខឡើយ។
លោកបានលើកឡើងថា៖ «នៅកម្ពុជាយើងមិនមានករណីហ្នឹងកើតឡើងទេ។ ដោយសារថ្នាក់ដឹកនាំយើងរកវិធីដើម្បីសម្របសម្រួលឱ្យសហគមន៍សាសនាទាំងអស់អាចធ្វើការជាមួយគ្នាបានដោយសុខស្រួល»។
លោកបានបញ្ជាក់ថា៖ «រដ្ឋាភិបាលថ្មីបានប្ដេជ្ញាចិត្តបន្តគោលនយោបាយចាស់រដ្ឋាភិបាលអាណត្តិកន្លងមក ដើម្បីប្រឆាំងដាច់ខាតចំពោះគោលនយោបាយនិងសាសនានិយម ពីព្រោះវាជាប្រភពនៃសង្គ្រាម ជាប្រភពជម្លោះប្រដាប់អាវុធ និងជាប្រភពនៃហិង្សារ»។
លោក សេង សុមុនី អ្នកនាំពាក្យក្រសួងធម្មការនិងសាសនាបានបញ្ជាក់ដោយខ្លីថា ប្រទេសកម្ពុជានាំពេលបច្ចុប្បន្នគ្មានជម្លោះសាសនាទេ។
លោកនិយាយថា៖ «យើងមានសុខុដមនីយកម្មសាសនាហើយ»។
នៅក្នុងរដ្ឋធម្មនុញ្ញកម្ពុជា ឆ្នាំ១៩៩៣ មាត្រា៤៣ បានចែងថា ព្រះពុទ្ធសាសនាជាសាសនារបស់រដ្ឋ ហើយប្រជាពលរដ្ឋទាំងពីរភេទមានសិទ្ធិពេញទីខាងជំនឿសាសនា។
រដ្ឋធម្មនុញ្ញបន្តថា សេរីភាពខាងជំនឿនិងការប្រតិបត្តិខាងផ្លូវសាសនាត្រូវបានរដ្ឋធានាក្នុងលក្ខខណ្ឌ ដែលមិនអាចប៉ះពាល់ជំនឿឬសាសនាដទៃទៀតដល់សណ្ដាប់ធ្នាប់និងសន្តិសុខសាធារណៈ។
លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតនិងការស្រាវជ្រាវ យល់ឃើញថា រដ្ឋាភិបាលដើរតួនាទីជាអ្នកកម្ចាត់លើបញ្ហាជ្រុលនិយមនៅក្នុងសង្គមជាការត្រឹមត្រូវហើយ ប៉ុន្តែធ្វើយ៉ាងណាក៏ដោយកុំរំលោភបំពានលើរដ្ឋធម្មនុញ្ញ។
លោកថា ការបង្ក្រាបអ្នកជ្រុលនិយមទាំងផ្នែកសាសនានិងនយោបាយ ដើម្បីការពារផលប្រយោជន៍និងអំណាចនយោបាយរបស់ខ្លួន ហើយប្រាសចាកពីរដ្ឋធម្មនុញ្ញគួរតែពិចារណាឡើយវិញនិងមិនគួរធ្វើឱ្យមានភាពសង្ស័យដែលអាចក្លាយជាបញ្ហាសម្រាប់សាធារណជនទូទៅរិះគន់ចំពោះទង្វើមិនប្រក្រតីរបស់ខ្លួន៕