ក្រសួងបរិស្ថានបានជំរុញស្ថាប័នសារព័ត៌មានជួយផ្សព្វផ្សាយចំណេះដឹងស្ដីពីការប្រែប្រួលអាកាសធាតុដល់ប្រជាពលរដ្ឋ ជាពិសេសប្រជាពលរដ្ឋគោលដៅនៅតាមមូលដ្ឋាន ដើម្បីត្រៀមខ្លួនឆ្លើយតបនឹងបញ្ហាអាកាសធាតុដែលអាចកើតមាន។
ដើម្បីជំរុញការផ្សព្វផ្សាយកាន់តែទូលំទូលាយលើបញ្ហានេះ ក្រសួងបរិស្ថានបានបើកសិក្ខាសាលាពង្រឹងសមត្ថភាពបច្ចេកទេសលើកទី១ សម្រាប់អ្នកសារព័ត៌មានការប្រែប្រួលអាកាសធាតុនៅកម្ពុជា ដែលរៀបចំធ្វើនៅរាជធានីភ្នំពេញកាលពីម្សិលមិញ។
លោក ភាវ សុវុទ្ធី អនុរដ្ឋលេខាធិការក្រសួងបរិស្ថាន បានថ្លែងបើកវគ្គសិក្ខាសាលាថា សិក្ខាសាលានេះរៀបចំឡើងក្នុងគោលបំណងពង្រឹងសមត្ថភាពអ្នកជំនាញ អ្នកសារព័ត៌មាន ដើម្បីផ្សព្វផ្សាយព័ត៌មានស្តីពីការប្រែប្រួលអាកាសធាតុទៅកាន់ក្រុមគោលដៅ រួមមានសហគមន៍មូលដ្ឋាន សហគមន៍ជាតិ-អន្តរជាតិ និងវិស័យពាក់ព័ន្ធនានាប្រកបដោយប្រសិទ្ធភាព។
លោកបន្ថែមថា ក្រសួងកំពុងជំរុញឱ្យមានការផ្សព្វផ្សាយព័ត៌មានស្តីពីការប្រែប្រួលអាកាសធាតុនិងការឆ្លើយតបរបស់រដ្ឋាភិបាលនៅក្នុងប្រព័ន្ធបណ្តាញផ្សព្វផ្សាយនានាឱ្យកាន់តែប្រសើរឡើង។
លោកថា កម្ពុជាជាប្រទេសមួយដែលប្រឈមនឹងភាពងាយរងគ្រោះពីឥទ្ធិពលនៃការប្រែប្រួលអាកាសធាតុ ជាពិសេសនៅលើកពិភពលោកកំពុងតែកើនឡើងកម្ដៅកាន់តែខ្លាំង ព្រមទាំងមានគ្រោះទឹកជំនន់ និងគ្រោះរាំងស្ងួត។
លោកបន្តថា កម្ពុជាតែងតែចិត្តទុកដាក់ខ្ពស់លើការរៀបចំផែនការយុទ្ធសាស្តបន្សំ និងឆ្លើយនឹងការប្រែប្រួលអាកាសធាតុ ព្រមទាំងជំរុញការអនុវត្តនិងការផ្សព្វផ្សាយឱ្យកាន់តែទូលំទូលាយ ទោះធនធានមនុស្ស ហិរញ្ញវត្ថុ និងបច្ចេកវិទ្យារបស់កម្ពុជាក្នុងការឆ្លើយតបនឹងការប្រែប្រួលអាកាសធាតុនៅតែជាកត្តាប្រឈម ដែលទាមទារការចូលរួមគាំទ្រពីគ្រប់ភាគីនិងដៃគូអភិវឌ្ឍន៍នានា។
លោកនិយាយថា ដើម្បីសម្រេចគោលដៅការបន្ស៊ាំ និងកសាងភាពធន់នឹងអាកាសធាតុក្នុងសហគមន៍ គឺទាមទារប្រជាសហគមន៍ត្រូវមានការយល់ដឹងពីយន្តការ យុទ្ធសាស្ត្រនានា ក៏ដូចជាផែនការជាតិបន្ស៊ាំនឹងការប្រែប្រួលអាកាសធាតុ។
លោកថា៖ «ប្រព័ន្ធផ្សព្វផ្សាយនិងអ្នកសារព័ត៌មានដើរតួនាទីយ៉ាងសំខាន់ក្នុងការចូលរួមផ្សព្វផ្សាយព័ត៌មាន និងលើកកម្ពស់ការយល់ដឹងដល់សហគមន៍ ជាពិសេសការសរសេរបកស្រាយនូវព័ត៌មាន ទិន្នន័យបែបវិទ្យាសាស្ត្ររូបសាស្ត្រទាក់ទងការប្រែប្រួលអាកាសធាតុឱ្យស្របទៅតាមគោលនយោបាយ និងយុទ្ធសាស្ត្រជាតិ ក្រុមគោលដៅនិងក្រុមងាយរងគ្រោះ ឬស្ថាប័នជាតិ-អន្តរជាតិ និងទៅតាមស្ថានភាពជាក់ស្ដែងនៃសង្គមកម្ពុជា»។
របាយការណ៍សិក្សាលើកទី៣ស្ដីពី “ការស្វែងយល់ពីទស្សនៈសាធារណជនចំពោះការប្រែប្រួលអាកាសធាតុនៅកម្ពុជា៖ ចំណេះដឹង ឥរិយាបថ និងការអនុវត្ត (KAP3)” រៀបចំឡើងដោយក្រុមប្រឹក្សាជាតិអភិវឌ្ឍន៍ដោយចីរភាពនៃក្រសួងបរិស្ថានក្នុងឆ្នាំ២០២០ បានឱ្យដឹងថា ប្រជាជនកម្ពុជាប្រមាណតែ៥៦ភាគរយប៉ុណ្ណោះដែលយល់ថាពួកគេបានត្រៀមខ្លួនគ្រប់គ្រាន់ឆ្លើយតបទៅនឹងបញ្ហាអាកាសធាតុដែលអាចកើតមាន។
ដោយឡែកប្រជាជន៤៤ភាគរយផ្សេងទៀតយល់ថា ពួកគេមិនបានត្រៀមខ្លួនគ្រប់គ្រាន់សម្រាប់ករណីមានបញ្ហាអាកាសធាតុណាមួយកើតឡើងនេះទេ។
របាយការណ៍នេះក៏បានបញ្ជាក់ផងដែរពីសារសំខាន់នៃបណ្តាញផ្សព្វផ្សាយមានដូចជា ទូរទស្សន៍ វិទ្យុ និងបណ្តាញសង្គម ដែលគ្រប់ដណ្តប់ប្រមាណ៥០ភាគរយនៃប្រភពទទួលបានព័ត៌មានស្តីពីការប្រែប្រួលអាកាសធាតុ ដែលប្រជាជនទទួលបាន។ នេះបង្ហាញឱ្យឃើញពីតួនាទីសំខាន់នៃបណ្តាយផ្សព្វផ្សាយអ្នកសារព័ត៌មាន ក្នុងការលើកកម្ពស់ការយល់ដឹង និងឆ្លើយតបនឹងការប្រែប្រួលអាកាសធាតុ។
លោក នង មុនិន្ទ អ្នកស្រាវជ្រាវនៃវិទ្យាស្ថានបណ្ដុះបណ្ដាលនិងស្រាវជ្រាវដើម្បីអភិវឌ្ឍន៍កម្ពុជា បានលើកឡើងថា កម្ពុជាជាប្រទេសមួយងាយរងគ្រោះជាងគេ បើធៀបទៅនឹងបណ្ដាប្រទេសនានានៅក្នុងតំបន់ ដោយសារតែសមត្ថភាពបន្ស៊ាំការប្រែប្រួលអាកាសធាតុរបស់កម្ពុជានៅមានកម្រិតនៅឡើយ ជាពិសេសពាក់ព័ន្ធនឹងចំណេះដឹងនិងការទទួលយកព័ត៌មានស្ដីពីការប្រែប្រួលអាកាសធាតុ៕
Related Posts
- September 5, 2023
- January 10, 2023
- January 20, 2023
- December 19, 2022
