លោក Wang Yi រដ្ឋមន្ត្រីការបរទេសចិន បានមកបំពេញទស្សនកិច្ចនៅកម្ពុជា ដោយក្នុងឱកាសនោះលោកក៏បានជួបពិភាក្សាការងារជាមួយឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តីចាត់តាំង ដើម្បីពង្រឹងទំនាក់ទំនងរវាងប្រទេសទាំងពីរបន្ថែមទៀត។
ឯកឧត្តមបណ្ឌិត ហ៊ុន ម៉ាណែត នាយករដ្ឋមន្រ្តីចាត់តាំង និងលោកWang Yi បានសន្យាជំរុញកិច្ចសហប្រតិបត្តិការរវាងប្រទេសចិន និងកម្ពុជា ក្នុងអំឡុងពេលជំនួបនៅទីក្រុងភ្នំពេញ។
លោក Wang Yi បានមកដល់ប្រទេសកម្ពុជានៅថ្ងៃទី១២ ខែសីហាដែលជាដំណើរទស្សនកិច្ចលើកដំបូងរបស់លោកបន្ទាប់ពីឯកឧត្តមបណ្ឌិត ហ៊ុន ម៉ាណែត ត្រូវបានចាត់តាំងជានាយករដ្ឋមន្ត្រី។ ដំណើរទស្សនកិច្ចនេះគឺជាផ្នែកមួយនៃដំណើរទស្សនកិច្ចរយៈពេលបីថ្ងៃរបស់លោក Wang Yi នៅតំបន់អាស៊ីអាគ្នេយ៍ ដែលរួមមានប្រទេសសិង្ហបុរីនិងម៉ាឡេស៊ីផងដែរ។ ដំណើរទស្សនកិច្ចនេះត្រូវបានរៀបចំឡើងបន្ទាប់ពីមានភាពតានតឹងរវាងចិន និងហ្វីលីពីនជុំវិញបញ្ហាសមុទ្រចិនខាងត្បូង។
ក្នុងដំណើរទស្សនកិច្ចនេះ លោក Wang Yi ក៏បានចូលជួបសម្តែងការគួរសមជាមួយលោកនាយករដ្ឋមន្រ្តី ហ៊ុន សែន ព្រមទាំងជួបពិភាក្សារកាងារជាមួយឯកឧត្តមបណ្ឌិត ហ៊ុន ម៉ាណែត និងមន្ត្រីជាន់ខ្ពស់កម្ពុជាជាច្រើនរូបទៀត។ ខណៈដែលព្រះករុណា ព្រះមហាក្សត្រ បានចេញព្រះរាជក្រឹត្យចាត់តាំង ឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្រ្តី គណៈរដ្ឋមន្រ្តីថ្មីរបស់លោកត្រូវសុំសេចក្តីអនុម័តទុកចិត្តពីរដ្ឋសភាជាមុនសិនដែលគ្រោងនឹងធ្វើក្នុងពេលឆាប់ៗនេះ។
ឯកឧត្តមបណ្ឌិត ហ៊ុន ម៉ាណែត បានសរសេរលើបណ្តាញ Telegram របស់លោកថា លោក និងលោក Wang Yi បានសន្យាជំរុញកិច្ចសហប្រតិបត្តិការរវាងប្រទេសទាំងពីរ។ ឯកឧត្តមបណ្ឌិតក៏បានបញ្ជាក់ឡើងវិញជាថ្មីនូវការគាំទ្រឥតងាករេរបស់រដ្ឋាភិបាលកម្ពុជាចំពោះគោលនយោបាយ “ចិនតែមួយ” និងធានាថាមិនជ្រៀតជ្រែកកិច្ចការផ្ទៃក្នុងរបស់ចិន។ ឯកឧត្តមបណ្ឌិត ហ៊ុន ម៉ាណែត នឹងអញ្ជើញទៅបំពេញទស្សនកិច្ចនៅប្រទេសចិនក្នុងខែកញ្ញា និងខែតុលា ដើម្បីពង្រឹងទំនាក់ទំនងរវាងប្រទេសទាំងពីរ។
នៅក្នុងជំនួបនោះ លោក Wang Yi ក៏បានបញ្ជាក់ជាថ្មីនូវការប្ដេជ្ញាចិត្តរបស់ចិនក្នុងការគោរពអធិបតេយ្យភាពកម្ពុជា និងបានបង្ហាញពីការគាំទ្ររបស់រដ្ឋាភិបាលចិនចំពោះកម្ពុជា។ ដំណើរទស្សនកិច្ចនេះត្រូវបានធ្វើឡើងបន្ទាប់ពីមានភាពតានតឹងជាថ្មីរវាងចិន និងហ្វីលីពីនជុំវិញបញ្ហាសមុទ្រចិនខាងត្បូង។ ការចូលចតរបស់កងទ័ពជើងទឹកហ្វីលីពីនក្នុងប្រជុំកោះស្ព្រាតលី (Spratly Islands) ដែលចិនបានលើកឡើងថា បានធ្វើឱ្យស្ថានការណ៍កាន់តែមានភាពតឹងតែង។ ចិនបានទាមទារឱ្យដកនាវាចេញពីដែនទឹកដែលមានជម្លោះ ខណៈដែលហ្វីលីពីនបានចោទប្រកាន់ឆ្មាំសមុទ្រចិនថាបានបាញ់កាំភ្លើងទឹកលើនាវារបស់ខ្លួនក្នុងអំឡុងពេលបំពេញបេសកកម្ម។
កម្ពុជា សិង្ហបុរី ម៉ាឡេស៊ី និងហ្វីលីពីនបានចូលរួមក្នុងកិច្ចពិភាក្សាជាមួយប្រទេសចិន ជុំវិញការអនុវត្តក្រមប្រតិបត្តិនៅសមុទ្រចិនខាងត្បូង។ ចិនបានលើកឡើងថាតំបន់ស្ទើរតែទាំងមូលនៅទីនោះជារបស់ខ្លួន ដែលនាំឱ្យមានភាពតានតឹងកាន់តែខ្លាំងជាមួយប្រទេសជិតខាង។
ក្រោមការដឹកនាំរបស់លោកនាយករដ្ឋមន្រ្តី ហ៊ុន សែន កម្ពុជានិងចិនគឺមានទំនាក់ទំនងល្អបំផុត ដោយកម្ពុជាបានទទួលការវិនិយោគពីចិនយ៉ាងច្រើន។ នៅក្នុងការបោះឆ្នោតសកលកាលពីខែកក្កដា គណបក្សប្រជាជនកម្ពុជាទទួលបានអាសនៈស្ទើទាំងអស់នៅក្នុងរដ្ឋសភា។
ក្រោយឈ្នះភ្លូកទឹកភ្លូកដី លោកនាយករដ្ឋមន្រ្តី ហ៊ុន សែន បានប្រកាសថា លោកនឹងប្រគល់អំណាចទៅឲ្យកូនប្រុសច្បងរបស់លោក គឺឯកឧត្តមបណ្ឌិត ហ៊ុន ម៉ាណែត។ បន្ថែមពីនេះ លោកបានបញ្ជាក់ថាលោកនឹងក្លាយជាប្រធានព្រឹទ្ធសភានៅដើមឆ្នាំក្រោយ ហើយបន្តកាន់តំណែងផ្សេងៗរហូតដល់ឆ្នាំ២០៣៣៕