អង្គការអភិវឌ្ឍន៍ឧស្សាហកម្មនៃអង្គការសហប្រជាជាតិ (UNIDO) បានសហការជាមួយសមាគមគ្រាប់ស្វាយចន្ទីកម្ពុជា (CAC) ដើម្បីជំរុញការនាំចេញគ្រាប់ស្វាយចន្ទីឱ្យបាន ១២ភាគរយនៅឆ្នាំ ២០២៥ ដោយផ្តល់ការគាំទ្រផ្នែកបច្ចេកទេស និងប្រព័ន្ធគ្រប់គ្រងដល់ម្ចាស់សហគ្រាសធុនតូច និងមធ្យម(MSMEs)។
ការប្តេជ្ញាចិត្តនេះបានធ្វើឡើងរវាងអង្គការអភិវឌ្ឍន៍ឧស្សាហកម្មនៃអង្គការសហប្រជាជាតិ និងសមាគមគ្រាប់ស្វាយចន្ទីកម្ពុជា ក្នុងវគ្គបណ្តុះបណ្តាលក្រោមប្រធានបទ “សុវត្ថិភាពចំណីអាហារ និងការត្រួតពិនិត្យគុណភាពសម្រាប់សហគ្រាសធុនតូច និងមធ្យម” ដែលធ្វើឡើងនៅសណ្ឋាគារ និងស្ប៉ា Glorious ក្នុងខេត្តកំពង់ធំកាលពីសប្តាហ៍មុន។
កម្មវិធីរយៈពេលបីថ្ងៃមានការចូលរួមពីសហគ្រិនជាង ៦០ នាក់ដែលក្នុងនោះ ៣៨ ភាគរយជាស្ត្រី តំណាងឱ្យសហគ្រាសកែច្នៃម្ហូបអាហារចំនួន ២៧ មកពីខេត្តចំនួន១០ នៅទូទាំងប្រទេស។
វគ្គនេះមានគោលបំណងសំខាន់ពីរ៖ ទី១ ដើម្បីបង្កើនសមត្ថភាពគ្រប់គ្រងគុណភាព និងសុវត្ថិភាពសម្រាប់សហគ្រាសកែច្នៃគ្រាប់ស្វាយចន្ទី ដែលជំរុញសហគ្រាសធុនតូច និងមធ្យម ជំរុញការពង្រីកទីផ្សារ និងត្រៀមខ្លួនជាស្រេចក្នុងការនាំចេញផលិតផលដោយផ្អែកលើគោលការណ៍សរីរាង្គ ក៏ដូចជាផ្តល់ការអភិវឌ្ឍសមត្ថភាពអាជីវកម្មសម្រាប់សហគ្រាសធុនតូច និងមធ្យម។
ទីពីរ ដើម្បីលើកកម្ពស់ផលិតផលគ្រាប់ស្វាយចន្ទីដែលមានតម្លៃបន្ថែមជាមួយនឹងការគ្រប់គ្រងគុណភាពខ្ពស់ និងសុវត្ថិភាព ដែលអាចឱ្យវាប្រកួតប្រជែងជាមួយផលិតផលរបស់ប្រទេសផ្សេងៗដែរ។
របាយការណ៍និយាយថា “រាជរដ្ឋាភិបាលកម្ពុជាបានដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ ដែលមានគោលដៅវាស់វែងជាក់លាក់ ដើម្បីរួមចំណែកដល់ការអភិវឌ្ឍកសិឧស្សាហកម្ម គម្រោងនេះមានគោលបំណងបង្កើនការនាំចេញគ្រាប់ស្វាយចន្ទី គឺត្រឹម១២ភាគរយក្នុងរយៈពេលពីរឆ្នាំខាងមុខ។
របាយការណ៍បន្តថា “តម្លៃបន្ថែមលើផលិតផលកសិកម្មត្រូវបានកំណត់ថាជាសក្តានុពលសម្រាប់ការនាំចេញ។ ទោះយ៉ាងណាក៏ដោយ គ្រាប់ស្វាយចន្ទីជាច្រើនត្រូវបាននាំចេញឆៅ ដែលធ្វើឲ្យតម្លៃបន្ថែមសម្រាប់ផលិតផលកសិកម្មកម្ពុជាបាត់បង់តម្លៃអតិបរមារបស់វា»។
របាយការណ៍បានបន្ថែមថា មានកង្វល់ធំៗបី គឺហេដ្ឋារចនាសម្ព័ន្ធផលិតកម្មមិនល្អ ដែលបណ្តាលឱ្យបាត់បង់ផលិតភាពទាបប្រហែល ១៥ ទៅ២០ ភាគរយ សមត្ថភាពមានកម្រិតក្នុងការទប់ទល់នឹងការប្រែប្រួលអាកាសធាតុ ក៏ដូចជាបរិយាកាសគោលនយោបាយមិនអំណោយផលសម្រាប់ការអភិវឌ្ឍកសិឧស្សាហកម្ម។
លោក អួន សីឡុត ប្រធានសមាគមគ្រាប់ស្វាយចន្ទីកម្ពុជា បានប្រាប់ខ្មែរថាមស៍កាលពីម្សិលមិញថាប្រហែល ៩៥ ភាគរយនៃគ្រាប់ស្វាយចន្ទីឆៅ (RCN) ត្រូវបាននាំចេញទៅប្រទេសវៀតណាមសម្រាប់កែច្នៃ ខណៈដែលមានតែ៥ ភាគរយប៉ុណ្ណោះដែលត្រូវបានកែច្នៃដោយសិប្បកម្មក្នុងស្រុក ដោយសារសមត្ថភាពផលិតមានកម្រិត និងកង្វះចំណេះដឹង និង ជំនាញសម្រាប់ការអភិវឌ្ឍឧស្សាហកម្មសិប្បកម្ម ដល់ការកែច្នៃចំណីអាហារប្រកបដោយស្តង់ដារសុវត្ថិភាពនាំចេញទៅកាន់ទីផ្សារអន្តរជាតិ។
លោកបានបន្ថែមថា ដោយមានការជួយជ្រោមជ្រែងពី UNIDO សមាគមគ្រាប់ស្វាយចន្ទីកម្ពុជាបានរៀបចំវគ្គបណ្តុះបណ្តាលចាប់ពីថ្ងៃទី 3-5 ខែតុលា សម្រាប់ភាគីពាក់ព័ន្ធដើម្បីផ្លាស់ប្តូរទស្សនៈ និងបទពិសោធន៍របស់ពួកគេជាមួយនឹងវិធីសាស្រ្តបណ្តុះបណ្តាលដែលផ្សារភ្ជាប់ទៅនឹងការអនុវត្តជាក់ស្តែង។
តាមសមាគមគ្រាប់ស្វាយចន្ទីកម្ពុជា វិស័យកសិកម្មបានដើរតួនាទីយ៉ាងសំខាន់ក្នុងការទ្រទ្រង់សេដ្ឋកិច្ចជាតិ ដោយបានរួមចំណែកប្រហែល ២២.២ ភាគរយនៃផលិតផលក្នុងស្រុកសរុប។ វាបានផ្តល់នូវអត្ថប្រ
យោជន៍ខ្ពស់ ក៏ដូចជាបង្កើនឱកាសការងារដល់ប្រជាពលរដ្ឋនៅមូលដ្ឋានដែរ៕