កងយោធពលខេមរភូមិន្ទកម្ពុជា និងកងទ័ពរំដោះប្រជាជនចិន បានបិទសមយុទ្ធរួមគ្នា ដើម្បីបង្កើនកិច្ចសហប្រតិបត្តិការរវាងកងទ័ព និងកងទ័ពលើវិស័យសុខាភិបាល និងសម្រាប់ជួយសង្គ្រោះគ្រោះមហន្តរាយទាំងក្នុងតំបន់ និងសកលលោក។
ការបិទសមយុទ្ធរួមគ្នារវាងកងទ័ពប្រទេសទាំងពីរនេះ ធ្វើឡើងរវាងនាយឧត្តមសេនីយ៍ ទៀ សីហា រដ្ឋមន្ដ្រីក្រសួងការពារជាតិ និងឧត្តមសេនីយ៍ទោ វ៉ាង ស៊ូឈាន (WANG SHUQIAN) ប្រធាននាយកដ្ឋានសុខាភិបាល និងជាគណៈកម្មាធិការយោធាមជ្ឈឹម នៃសាធារណរដ្ឋប្រជាមានិតចិន នៅបញ្ជាការដ្ឋានទ័ពពិសេស កងទ័ពជើងគោកកម្ពុជា កាលពីម្សិលមិញ។
សមយុទ្ធរួមគ្នាលើកដំបូងរវាងកងទ័ពប្រទេសទាំងពីរនេះ មានឈ្មោះថា «ទេវតាសន្តិភាព-ឆ្នាំ២០២៣» ដែលធ្វើឡើងក្រោមប្រធានបទស្ដីពី ប្រតិបត្តិការសង្គ្រោះសុខាភិបាលមនុស្សធម៌អន្តរជាតិ រួមគ្នានៅតំបន់គ្រោះមហន្តរាយ ខ្យល់ព្យុះ និងទឹកជំនន់។
នាយឧត្ដមសេនីយ៍ ទៀ សីហា បានថ្លែងថា កងយោធពលខេមរភូមិន្ទ មានមោទនភាពដែលបានធ្វើជាម្ចាស់ផ្ទះសមយុទ្ធរវាងកងទ័ពកម្ពុជា និងចិន ជាលើកទី១ បានធ្វើឱ្យកងទ័ពប្រទេសទាំងពីរទទួលបានការផ្លាស់ប្តូរចំណេះដឹង ជំនាញ និងបទពិសោធថ្មីៗ ជាពិសេសបង្កើនកិច្ចសហការប្រតិបត្តិការកាន់តែជិតស្និទ្ធ ដើម្បីផ្ដល់ការគាំទ្រដល់សន្តិសុខក្នុងតំបន់ និងសកលលោក។
លោកបន្ថែមថា សមយុទ្ធសុខាភិបាល ដែលទទួលបានជោគជ័យនេះ បានផ្ដើមចេញពីទំនាក់ទំនងជាមិត្តភាព សាមគ្គីភាព និងកិច្ចសហប្រតិបត្តិការលើគ្រប់វិស័យរវាងកម្ពុជា និងចិន ក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ។
លោកបញ្ជាក់ថា សម្រាប់កិច្ចសហប្រតិបត្តិការនេះ ដើម្បីបម្រើឱ្យកិច្ចសហប្រតិបត្តិការ និងទំនាក់ទំនងការទូតយោធា ក៏ដូចជាអនុវត្តយុទ្ធសាស្ត្រគ្រប់ជ្រុងជ្រោយរបស់រដ្ឋាភិបាល និងកងទ័ព ដែលថ្នាក់ដឹកនាំប្រទេសទាំងពីរបានព្រមព្រៀងគ្នានាពេលកន្លងមក។
ឧត្តមសេនីយ៍ទោ វ៉ាង ស៊ូឈាន បានថ្លែងថា សមយុទ្ធសុខាភិបាលនេះ បានអនុវត្តការងាររួមគ្នាលើវិស័យវេជ្ជសាស្ត្រសុខាភិបាល និងការសង្គ្រោះ ដែលចូលរួមពីសំណាក់កងទ័ពជើងអាកាសនៃកងទ័ពរំដោះប្រជាជនចិន។
លោកថា ការធ្វើសមយុទ្ធរវាងយោធាប្រទេសទាំងពីរនេះ នឹងក្លាយជាគំរូសម្រាប់ទំនាក់ទំនងអន្តរជាតិជាថ្មីក្នុងប្រវត្តិសាស្ត្រ។
ឧត្តមសេនីយ៍ទោ ថោង សូលីម៉ូ អ្នកនាំពាក្យអគ្គបញ្ជាការដ្ឋាន នៃក្រសួងការពារជាតិ ប្រាប់កាសែតខ្មែរថាមស៍ កាលពីម្សិលមិញថា កងយោធពលខេមរភូមិន្ទ នៅតែចាត់ទុកការងារហ្វឹកហ្វឺន គឺជាកត្តាគន្លឹះដ៏សំខាន់សម្រាប់អភិវឌ្ឍសមត្ថភាពធនធានមនុស្សទាំងបច្ចុប្បន្ន និងអនាគត ដែលជាជ្រុងអាទិភាពមួយក្នុងយុទ្ធសាស្ត្របញ្ចកោណ ដំណាក់កាលទី១ របស់រដ្ឋាភិបាល។
លោកបន្ថែមថា ផែនការកែទម្រង់កងយោធពលខេមរភូមិន្ទ សំដៅធ្វើទំនើបកម្ម និងបង្កើនសមត្ថភាពវិជ្ជាជីវៈ ដល់កងកម្លាំងប្រដាប់អាវុធគ្រប់ភេទ ដើម្បីបន្តធានាកិច្ចការពារអធិបតេយ្យភាពជាតិ បូរណភាព ទឹកដី សន្តិសុខ សុវត្ថិភាព និងសណ្ដាប់ធ្នាប់សង្គមប្រកបដោយប្រសិទ្ធភាព។
លោកបន្ថែមថា គ្រប់កងឯកភាព និងស្ថាប័នពាក់ព័ន្ធទាំងអស់ក្នុងកងយោធពលខេមរភូមិន្ទ បន្តលើកកម្ពស់កិច្ចសហប្រតិបត្តិការជាមួយកងទ័ពចិន ដើម្បីធ្វើឱ្យសមយុទ្ធទេវតាសន្តិភាព នៅលើកក្រោយៗទៀតក្លាយជាយន្តការដ៏សំខាន់សម្រាប់ទំនាក់ទំនង និងធ្វើជាបទពិសោធសម្រាប់អភិវឌ្ឍយោធាឱ្យកាន់តែមានប្រសិទ្ធភាព។
អ្នកនាំពាក្យបញ្ជាក់ថា៖ «ឆ្នាំ២០២៣ គឺជាសមយុទ្ធមួយដែលកងយោធពលខេមរភូមិន្ទ និងកងទ័ពរំដោះប្រជាជនចិន បានបន្សល់ទុកនូវនិមិត្តសញ្ញាមួយដ៏រឹងមាំសម្រាប់កត់ត្រាទុកក្នុងប្រវត្តិសាស្ត្រយោធា នៃកិច្ចសហប្រតិបត្តិការមិត្តភាពរវាងប្រទេសទាំងពីរ»។
គួររម្លឹកថា សមយុទ្ធសុខាភិបាលនេះ ភាគីចិនមានចំនួនសរុប១២៦នាក់។
ចិនដឹកសម្ភារៈតាមយន្តហោះ ៤គ្រឿង គឺ Y-19 មួយគ្រឿង និង Y-20 បីគ្រឿង។ ក្នុងនោះក៏មានរថយន្តសង្គ្រោះ ៣គ្រឿង រួមនឹងសម្ភារបរិក្ខារសុខាភិបាល និងសម្ភារសង្គ្រោះចំនួន ១ ០០០ឈុតជាដើម។
ភាគីកម្ពុជាមានចំនួនសរុប ៥៩៥នាក់។
កម្ពុជាប្រើឧទ្ធម្ភាគចក្រប្រភេទ Mi-17 ចំនួន ២គ្រឿង ឧទ្ធម្ភាគចក្រ ប្រភេទ Z-9 ចំនួន ២គ្រឿង រថយន្តសង្គ្រោះ ៦គ្រឿង ព្រមទាំងបរិក្ខាររសុខាភិបាល និងសង្គ្រោះមួយចំនួនទៀត៕