ក្រសួងថាមពល និងធនធានរ៉ែ រួមជាមួយនឹងមជ្ឈមណ្ឌលអាស៊ានសម្រាប់ថាមពល (ACE) បានប្រមូលផ្តុំគ្នាប្រារព្ធពិធីដង្ហែររថយន្តដែលមិនប៉ះពាល់ដល់បរិស្ថានក្នុងតំបន់( ASEAN Green Transport Rally -GTR) ដើម្បីគាំទ្រដល់ការធ្វើជាប្រធានអាស៊ានរបស់ប្រទេសឥណ្ឌូនេស៊ីក្នុងឆ្នាំ២០២៣ និងគោលដៅនៃការបំភាយឧស្ម័នសូន្យរបស់ខ្លួន។
លោក Yudo Dwinanda Priaadi អគ្គនាយកផ្នែកថាមពលថ្មី ថាមពលកកើតឡើងវិញ និងការអភិរក្សថាមពលបាននិយាយកាលពីថ្ងៃអាទិត្យថាពិធីនេះធ្វើឡើងក្រោមប្រធានបទ “ឆ្ពោះទៅរកការបំភាយឧស័ន្មសូន្យ”។
ការដង្ហែរយានយន្តដែលមិនប៉ះពាល់ដល់បរិស្ថាននឹងធ្វើដំណើរពីទីក្រុងហ្សាកាតាទៅកាន់កោះបាលីពីថ្ងៃទី២០ ដល់ថ្ងៃទី២៤ខែសីហា ឆ្នាំ ២០២៣។
យោងតាម លោក Yudo Dwinanda Priaadi ប្រធានបទនៃ ASEAN GTR 2023 បានបង្ហាញពីការប្តេជ្ញាចិត្តយ៉ាងមុតមាំរបស់ប្រទេសសមាជិកអាស៊ានក្នុងការយកឈ្នះលើបញ្ហាប្រឈមក្នុងវិស័យដឹកជញ្ជូនដើម្បីសម្រេចបាននូវគោលដៅកាត់បន្ថយការបំភាយឧស្ម័ន។
ក្នុងចំណោមប្រទេសអាស៊ាន ឥណ្ឌូនេស៊ីបានប្រើប្រាស់ថាមពលខ្ពស់បំផុត ដែលនឹងបន្តកើនឡើងគួរឱ្យកត់សម្គាល់ រួមជាមួយនឹងកំណើនសេដ្ឋកិច្ច និងចំនួនប្រជាជនរបស់ខ្លួន។
ម៉្យាងវិញទៀត ឥណ្ឌូណេស៊ីមានតួនាទីជាយុទ្ធសាស្ត្រក្នុងការអភិវឌ្ឍន៍ថាមពលកកើតឡើងវិញ ដើម្បីគាំទ្រដល់ការអភិវឌ្ឍន៍សេដ្ឋកិច្ច និងទប់ទល់នឹងការប្រែប្រួលអាកាសធាតុ ទន្ទឹមនឹងនោះក៏ខិតខំដើម្បីសម្រេចបាននូវភាពធន់នឹងថាមពល ឯករាជ្យភាព សកលភាវូបនីយកម្ម និងតម្លៃសមរម្យ។
លោកបានបន្តថា “កិច្ចខិតខំប្រឹងប្រែងផ្លាស់ប្តូរថាមពលនៅក្នុងវិស័យដឹកជញ្ជូនជាមួយនឹងការប្រើប្រាស់យានជំនិះដែលមិនប៉ះពាល់ដល់បរិស្ថាននឹងគាំទ្រដល់គោលដៅនៃការបំភាយឧស្ម័នសូន្យ របស់ប្រទេសឥណ្ឌូនេស៊ីក្នុងឆ្នាំ២០៦០ ឬអាចឆាប់ជាងនេះ” ។
ទន្ទឹមនឹងនេះ នាយកប្រតិបត្តិរបស់ ACE លោក Nuki Agya Utama បាននិយាយថា ASEAN GTR 2023 បានលើកទឹកចិត្តឱ្យមានការយល់ដឹងអំពីការប្រើប្រាស់យាន្តជំនិះប្រកបដោយនិរន្តរភាព ដែលមានសារៈសំខាន់សម្រាប់កំណើន និងការអភិវឌ្ឍន៍របស់អាស៊ាន។
ពិធីដង្ហែរនេះត្រូវបានគេរំពឹងថានឹងធ្វើឱ្យប្រសើរឡើងនូវប្រសិទ្ធភាពថាមពល និងជួយផ្សព្វផ្សាយជម្រើសរថយន្តដែលប្រើប្រាស់ប្រភពថាមពល និងបច្ចេកវិទ្យាផ្សេងៗ។
លោកបានបន្ថែមថា “តាមរយៈការរួមបញ្ចូល ASEAN Green Transport Rally ទៅក្នុងវេទិកាធុរកិច្ចថាមពលអាស៊ាន ACE កំពុងផ្តោតយ៉ាងសកម្មលើការដឹកជញ្ជូនប្រកបដោយនិរន្តរភាពនៅក្នុងតំបន់ និងបង្ហាញពីដំណោះស្រាយប្រកបដោយភាពច្នៃប្រឌិតសម្រាប់ការស្វែងរកប្រភពថាមពលជំនួសផ្សេងទៀត” ។
លោកបានលើកឡើងទៀតថាដំណោះស្រាយប្រកបដោយភាពច្នៃប្រឌិតគឺត្រូវការជាចាំបាច់ដើម្បីធានាសុវត្ថិភាពថាមពល ការផ្គត់ផ្គង់ថាមពល និងតម្លៃថោកនៃថាមពលនៅក្នុងវិស័យដឹកជញ្ជូន៕ Antara News