រដ្ឋាភិបាលតាមរយៈក្រសួងមហាផ្ទៃ បានចេញផ្សាយសៀវភៅផែនការយុទ្ធសាស្ត្រស្ដីពី ការលើកកម្ពស់ការគ្រប់គ្រងរដ្ឋបាលដែនដី សន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ឆ្នាំ២០២៤-២០២៨ ដើម្បីរួមចំណែកអនុវត្តយុទ្ធសាស្ត្របញ្ចកោណដំណាក់កាលទី១ ឱ្យសម្រេចបានគោលដៅ គោលបំណង និងចក្ខុវិស័យដែលបានកំណត់។
លោក ស សុខា រដ្ឋមន្ត្រីក្រសួងមហាផ្ទៃ បានឱ្យដឹងថា ក្រសួងមហាផ្ទៃ ដើរតួនាទីជាសេនាធិការជូនរដ្ឋាភិបាលក្នុងការដឹកនាំគ្រប់គ្រងរដ្ឋបាលដែនដីគ្រប់ថ្នាក់លើវិស័យនយោបាយរដ្ឋបាល និងដឹកនាំគ្រប់គ្រងនគរបាលជាតិលើវិស័យសន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ដែលចាំបាច់ត្រូវការដឹកនាំ រៀបចំ និងអនុវត្តគោលនយោបាយអាទិភាព និងវិធានការគន្លឹះនានា។
លោកបន្ថែមថា ដើម្បីធានាដល់ការបំពេញតួនាទីនេះ ក្រសួងបានរៀបចំផែនការយុទ្ធសាស្ត្រសម្រាប់ធ្វើជាផែនទីបង្ហាញផ្លូវមួយសម្រាប់អនុវត្តចាប់ពីឆ្នាំ២០២៤ ដល់ឆ្នាំ២០២៨ ដើម្បីរួមចំណែកអនុវត្តយុទ្ធសាស្ត្របញ្ចកោណដំណាក់កាលទី១ ឱ្យសម្រេចបានគោលដៅ គោលបំណង និងចក្ខុវិស័យដែលបានកំណត់។
លោកបន្តថា ផែនការយុទ្ធសាស្ត្រខាងលើនេះ ធ្វើការស្រាវជ្រាវឯកសារពាក់ព័ន្ធ ជាពិសេសច្បាប់ លិខិតបទដ្ឋានគតិយុត្ត កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ កម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ ព្រមទាំងមានការពិគ្រោះយោបល់ និងការប្រមូលធាតុចូលពីគ្រប់អង្គភាពពាក់ព័ន្ធទាំងអស់ចំណុះក្រសួងមហាផ្ទៃ។
លោក ស សុខា បញ្ជាក់ថា យុទ្ធសាស្ត្រនីមួយៗបានកំណត់នូវយន្តការដឹកនាំ គ្រប់គ្រង តាមដាន ត្រួតពិនិត្យ និងវាយតម្លៃដោយបានកំណត់នូវសូចនាករ និងចំណុចដៅសំខាន់ៗដែលជាមូលដ្ឋានសម្រាប់តាមដាន ត្រួតពិនិត្យ និងវាយតម្លៃលើសមិទ្ធផល និងប្រសិទ្ធភាពនៃការបំពេញបេសកកម្មរបស់ក្រសួងមហាផ្ទៃ ក្នុងនីតិកាលទី៧ នៃរដ្ឋសភា។
លោក ឡាំ សុជាតិ នាយកប្រតិបត្តិនៃវិទ្យាស្ថានតស៊ូមតិ និងគោលនយោបាយ (API) បានឱ្យដឹងថា រាល់ការបង្កើតគោលនយោបាយ យុទ្ធសាស្ត្រ ឬវិធានការច្បាប់សម្រាប់អនុវត្តក្នុងសង្គម ទាមទារឱ្យមានការចូលរួមពីភាគីជំនាញពាក់ព័ន្ធ ដើម្បីជាធាតុចូលសម្រាប់ធានាឱ្យផែនការសកម្មភាពប្រព្រឹត្តទៅដោយគុណភាព ប្រសិទ្ធភាព និងកាត់បន្ថយការរិះគន់ពីមហាជន។
លោកបន្ថែមថា បើគ្មានការចូលរួមពីភាគីពាក់ព័ន្ធនោះទេ នៅពេលអនុវត្តផែនការសកម្មភាពរបស់ខ្លួន ភាគច្រើនគ្មានប្រសិទ្ធភាព និងតែងរងការរិះគន់ពីប្រជាពលរដ្ឋនៅតាមមូលដ្ឋាន ដូច្នេះការចូលរួមផ្ដល់មតិយោបល់ពីភាគីរដ្ឋាភិបាល មន្ត្រីរាជការស៊ីវិល អង្គការក្រៅរដ្ឋាភិបាល សមាគម និងដៃគូអភិវឌ្ឍពាក់ព័ន្ធ គឺមានសារៈសំខាន់សម្រាប់បង្កើតវិធានការច្បាប់ ឬគោលនយោបាយ ដើម្បីអនុវត្តឱ្យមានប្រសិទ្ធភាព។
ក្នុងសៀវភៅផែនការយុទ្ធសាស្ត្រស្ដីពី «ការលើកកម្ពស់ការគ្រប់គ្រងរដ្ឋបាលដែនដី សន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម ឆ្នាំ២០២៤-២០២៨» បញ្ជាក់ថា ក្រសួងមហាផ្ទៃ បានកំណត់យុទ្ធសាស្ត្រសំខាន់ៗចំនួន៦។
ក្នុងនោះយុទ្ធសាស្ត្រទី១ ការពង្រឹងស្ថាប័នរដ្ឋបាលថ្នាក់ក្រោមជាតិ ដែលផ្តោតលើការរៀបចំស្ថាប័នរដ្ឋបាលថ្នាក់ក្រោមជាតិ (រចនាសម្ព័ន្ធ ប្រព័ន្ធគ្រប់គ្រង មុខងារ និងធនធាន) ការអភិវឌ្ឍសមត្ថភាពធនធាន មនុស្ស ការពង្រឹងប្រសិទ្ធភាពនៃការបំពេញការងារ ការធ្វើទំនើបកម្មប្រព័ន្ធគ្រប់គ្រងនិងការផ្តល់សេវាសាធារណៈតាមប្រព័ន្ធឌីជីថល និងពង្រឹងកិច្ចសហប្រតិបត្តិការនិងភាពជាដៃគូជាមួយអង្គការសង្គមស៊ីវិល ដៃគូអភិវឌ្ឍន៍ វិស័យឯកជន។
យុទ្ធសាស្ត្រខាងលើនេះ ដើម្បីលើកកម្ពស់ប្រសិទ្ធភាព និងគុណភាពនៃការផ្តល់សេវាសាធារណៈ និងការអភិវឌ្ឍមូលដ្ឋានឆ្លើយតបនឹងតម្រូវការរបស់ប្រជាពលរដ្ឋស្របតាមគោលនយោបាយវិមជ្ឈការ និងវិសហមជ្ឈការ។
យុទ្ធសាស្ត្រទី២ ការពង្រឹងសន្តិភាព ស្ថិរភាពនយោបាយ សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ដែលផ្តោតលើការពារឱ្យបានដាច់ខាតនូវសន្តិភាព អធិបតេយ្យភាពជាតិ បូរណភាពទឹកដី ស្ថិរភាពនយោបាយ និងការធានាឯករាជ្យ រក្សាសន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ដែលជាបុរេលក្ខខណ្ឌមិនអាចខ្វះបានសម្រាប់លើកកម្ពស់សិទ្ធិ សេរីភាព ប្រជាធិបតេយ្យ និងការអភិវឌ្ឍប្រទេសជាតិ។
យុទ្ធសាស្រ្តទី៣ ការលើកកម្ពស់ការគ្រប់គ្រងពន្ធនាគារ ដោយផ្តោតទៅលើការគ្រប់គ្រងពន្ធនាគារតាមការអភិវឌ្ឍជំនាញវិជ្ជាជីវៈ ទប់ស្កាត់ការប្រព្រឹត្តបទល្មើសសារជាថ្មី និងការអភិវឌ្ឍហេដ្ឋារចនាសម្ព័ន្ធពន្ធនាគារ។
យុទ្ធសាស្រ្តទី៤ ការអភិវឌ្ឍស្ថាប័ននិងធនធានមនុស្ស ផ្តោតលើការកែទម្រង់ស្ថាប័ន និងការអភិវឌ្ឍធនធានមនុស្សតាមរយៈពិនិត្យលើមុខងារ តួនាទី ភារកិច្ចតាមអង្គភាពនីមួយៗ ការអភិវឌ្ឍស្ថាប័នបណ្តុះបណ្តាល ការពង្រឹងការគ្រប់គ្រង ការពង្រឹងអភិបាលកិច្ចក្នុងការគ្រប់គ្រង ចាត់ចែងធនធានហិរញ្ញវត្ថុ និងទ្រព្យសម្បត្តិ ដើម្បីលើកកម្ពស់ប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម ព្រមទាំងលើកកម្ពស់ភាពស្អាតស្អំក្នុងការបំពេញការងារ។
យុទ្ធសាស្រ្តទី៥ ការលើកកផ្តល់ការផ្តល់សេវាសាធារណៈ ដោយពង្រឹង និងកែលម្អយន្តការ នីតិវិធី និងស្ដង់ដានៃការផ្តល់សេវាសាធារណៈឱ្យមានភាពសាមញ្ញ ក្រមសីលធម៌វិជ្ជាជីវៈ គណនេយ្យភាព ភាពជឿទុកចិត្ត និងតម្លាភាព។
យុទ្ធសាស្រ្តទី៦ ការងារបច្ចេកវិទ្យាឌីជីថល ផ្តោតលើការធ្វើបរិវត្តកម្មឌីជីថល ដើម្បីពង្រឹងប្រសិទ្ធភាពការងារ និងប្រសិទ្ធភាពនៃការផ្ដល់សេវាសាធារណៈ៕