កាលពីពេលថ្មីៗនេះ ក្រុមប្រឹក្សាអភិវឌ្ឍន៍កម្ពុជាបានលើកឡើងថា កញ្ចប់លើកទឹកចិត្តកំពុងរង់ចាំអ្នកវិនិយោគដែលមានបំណងចង់ផ្តល់ការបណ្តុះបណ្តាល និងអភិវឌ្ឍជំនាញដល់និយោជិតរបស់ពួកគេនៅកម្ពុជា។
លោក ស សិនិរ៉ា អគ្គលេខាធិការរងគណៈកម្មធិការវិនិយោគកម្ពុជាបានជម្រាបជូន ក្រុមហ៊ុន Pragma Corporation ដែលជាក្រុមហ៊ុនប្រតិបត្តិការលើវិស័យបណ្ដុះបណ្ដាលធនធានមនុស្ស ថាច្បាប់ស្តីពីវិនិយោគនៃព្រះរាជាណាចក្រកម្ពុជា បានបញ្ញត្តិផ្តល់ការលើកទឹកចិត្តដល់វិនិយោគិនទាំងឡាយដែលចំណាយលើការបណ្តុះបណ្តាលជំនាញដល់និយោជិករបស់ខ្លួន។
តំណាងក្រុមហ៊ុន Pragma Corporation ដឹកនាំដោយលោក Henri Stetter ទីប្រឹក្សាជាន់ខ្ពស់នៃការអភិវឌ្ឍន៍វិស័យឯកជន បានមកបំពេញទស្សនកិច្ចនៅព្រះរាជាណាចក្រកម្ពុជា ជាផ្នែកមួយនៃការសិក្សាស្វែងយល់ពីគោលនយោបាយទាក់ទាញវិនិយោគរបស់កម្ពុជា ដើម្បីជាមូលដ្ឋានក្នុងការកំណត់តម្រូវការធនធានមនុស្សរបស់កម្ពុជានាពេលអនាគត និងជាការត្រៀមខ្លួនក្នុងការរៀបចំគម្រោង “Employ” ក្រោមការឧបត្ថម្ភពីមូលនិធិនៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID)។
គម្រោងនេះនឹងផ្តោតលើការអភិវឌ្ឍជំនាញជំនាញក្នុងវិស័យសេដ្ឋកិច្ចសំខាន់ៗ ក៏ដូចជាលើកកម្ពស់និងជំរុញការបណ្តុះបណ្តាលវិជ្ជាជីវៈក្នុងភាពជាដៃគូជិតស្និទ្ធជាមួយវិស័យឯកជន ដើម្បីធានាបាននូវការផ្គូផ្គងប្រកបដោយប្រសិទ្ធភាពនៃតម្រូវការទីផ្សារការងារសម្រាប់និយោជិកដែលមានជំនាញ។
គំនិតផ្តួចផ្តើម “Employ ” របស់ទីភ្នាក់ងារជំនួយអាមេរិក USAID ត្រូវបានរៀបចំឡើងក្នុងគោលបំណងផ្តល់ជំនាញការងារដល់ប្រជាជនកម្ពុជា ស្របតាមវិស័យនានា ដែលជំរុញឱ្យមានកំណើនប្រកបដោយចីរភាព បរិយាបន្ន និងពិពិធកម្មសេដ្ឋកិច្ច។
យោងតាមទីភ្នាក់ងារ USAID តាមរយៈការធ្វើការដោយផ្ទាល់ជាមួយ និងតាមរយៈដៃគូក្នុងស្រុក ដូចជាអាជីវកម្មឯកជន សាកលវិទ្យាល័យ និងស្ថាប័នបណ្តុះបណ្តាលវិជ្ជាជីវៈ គំនិតផ្តួចផ្តើមនេះនឹងជួយរៀបចំ និងពង្រឹងកម្លាំងពលកម្មកម្ពុជាអោយបានរួចស្រេច រួមមានចំណេះដឹងដែលអាចឱ្យពួកគេប្រកួតប្រជែងនៅក្នុងទីផ្សារការងារ។
គម្រោង Employ ដែលរំពឹងថានឹងដាក់ឱ្យដំណើរការក្នុងប្រទេសកម្ពុជានៅចុងខែសីហាឆ្នាំនេះ ក៏នឹងសង្កត់ធ្ងន់ទៅលើការកែលម្អសមត្ថភាពរបស់ស្ត្រី និងយុវជនក្នុងផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ដោយផ្តោតលើវិស័យដូចជា សេដ្ឋកិច្ចបៃតង វិស័យទាក់ទងនឹង STEM ឌីជីថល បច្ចេកវិជ្ជា និងការផលិត ជាដើម។
ជាមួយគ្នានេះ លោកនាយករដ្ឋមន្ត្រី ហ៊ុន ម៉ាណែត បានមានប្រសាសន៍ថា ក្នុងរយៈពេល៦ខែរបស់រាជរដ្ឋាភិបាលថ្មីនេះ មានគម្រោងវិនិយោគចំនួន ១៧៣ ត្រូវបានចុះបញ្ជីជាមួយក្រុមប្រឹក្សាអភិវឌ្ឍន៍កម្ពុជា ដែលមានទុនវិនិយោគសរុបចំនួន ៤,១៥ ពាន់លានដុល្លារ បង្កើតការងារបានជាង ១៧ ម៉ឺនកន្លែង។
លោកបានលើកឡើងដូច្នេះក្នុងឱកាសអញ្ជើញជាអធិបតីក្នុងកិច្ចប្រជុំពេញអង្គនៃទីស្តីការគណៈរដ្ឋមន្ត្រីនៅវិមានសន្តិភាពកាលពីថ្ងៃសុក្រកន្លងទៅ។
លោកបានកត់សម្គាល់ថា រាជរដ្ឋាភិបាលកំពុងខិតខំប្រឹងប្រែងការកែលម្អបរិយាកាសវិនិយោគ និងការលើកទឹកចិត្តក្នុងការជំរុញសកម្មភាពសេដ្ឋកិច្ច-សង្គម និងបង្កើនឱកាសការងារ។
លោកបានបន្ថែមថា វិនិយោគិនបរទេសភាគច្រើនបានទទួលស្គាល់ពីសក្តានុពលរបស់កម្ពុជា ហើយពេញចិត្តក្នុងការវិនិយោគនៅកម្ពុជា។
គួររំឮកផងដែរថា កម្ពុជាបានចាប់ផ្តើមអនុវត្តគំនិតផ្តួចផ្តើមបណ្តុះបណ្តាលជំនាញដ៏ធំមួយ ក្នុងគោលបំណងបង្កើនជំនាញដល់យុវជនចំនួន ១,៥ លាននាក់ មកពីគ្រួសារក្រីក្រ និងងាយរងគ្រោះ ដើម្បីធ្វើឱ្យជីវភាពរបស់ពួកគេមានភាពប្រសើរឡើង។
យោងតាមធនាគារអភិវឌ្ឍន៍អាស៊ី (ADB) កម្រិតនៃអ្នកដែលចេះជំនាញបច្ចេកទេសកម្រិតមធ្យម និងខ្ពស់ជាងនេះនៅកម្ពុជាមានត្រឹមតែ ១០,៧ ភាគរយនៃកម្លាំងពលកម្មសរុបនៅក្នុងប្រទេស។ នេះបង្ហាញពីភាពកង្វះខាតនៃកម្លាំងពលកម្មក្នុងស្រុកដែលមានជំនាញ ដែលធ្វើអោយឧស្សាហកម្មមួយចំនួន និងពឹងផ្អែកលើអ្នកជំនាញបរទេសដើម្បីបំពេញមុខតំណែងទាំងនោះ។
រដ្ឋាភិបាលបានដឹងយ៉ាងច្បាស់អំពីតម្រូវការក្នុងការដោះស្រាយនូវបញ្ហានេះ ហើយឥឡូវនេះកំពុងចាត់ចែងដោះស្រាយបញ្ហានេះ ដោយមានកិច្ចសហប្រតិបត្តិការពីវិស័យរដ្ឋ និងឯកជន។
ឯកសារទស្សនទានរបស់ ADB បានបង្ហាញថា កម្ពុជាមានប្រជាជនចំនួន ១៦,៧ លាននាក់ ដែល៦៥ ភាគរយនៃពួកគេមានអាយុតិចជាង៣០ ឆ្នាំ។ អត្រាបញ្ចប់ការសិក្សានៅតែមានកម្រិតទាប ដោយមានកម្លាំងពលកម្មត្រឹមតែ ៧,៤ ភាគរយប៉ុណ្ណោះដែលបានបញ្ចប់ការអប់រំក្រោយថ្នាក់មធ្យមសិក្សា។
តម្លៃកម្លាំងពលកម្មនៅកម្ពុជាគឺ ៣,៦ ដុល្លារក្នុងមួយម៉ោងទាបជាងប្រទេសមួយចំនួនទៀតនៅក្នុងតំបន់អាស៊ីអាគ្នេយ៍ ដូចជាវៀតណាម (៧,៣ ដុល្លារ) និងឥណ្ឌូនេស៊ី (១៣,១ ដុល្លារ)។ តម្លៃពលកម្មទាបនេះអាចបណ្តាលមកពីការខ្វះជំនាញ។