កម្ពុជាបានយល់ព្រមផ្គត់ផ្គង់អង្ករប្រមាណ ២៥ម៉ឺនតោនក្នុងមួយឆ្នាំ ដល់ប្រទេសឥណ្ឌូនេស៊ី ដើម្បីរក្សាបាននូវសុវត្ថិភាពស្បៀង និងការប្រើប្រាស់ក្នុងប្រទេសនេះ។
លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មមានប្រសាសន៍ថា
ការព្រមព្រៀងផ្គត់ផ្គង់អង្ករប្រមាណ ២៥ម៉ឺនតោនក្នុងមួយឆ្នាំដល់ឥណ្ឌនេស៊ី គឺមានរយៈពេល៤ឆ្នាំ ដែលនឹងចាប់ផ្តើមអនុវត្តចាប់ពីឆ្នាំ២០២៤តទៅ។
ក្នុងជំនួបរវាងលោក ចូកូ វីដូដូ ប្រធានាធិបតីឥណ្ឌូនេស៊ី និងលោកនាយករដ្ឋមន្រ្តី ហ៊ុន ម៉ាណែត នៅទីក្រុងហ្សាកាតា លោក ចូកូ វីដូដូ បានបង្ហាញការពេញចិត្តដែលកម្ពុជា បានព្រមព្រៀងផ្គត់ផ្គង់អង្ករដល់ឥណ្ឌូនេស៊ីចំនួន ២៥ម៉ឺនក្នុងមួយឆ្នាំ។ ជាមួយគ្នានេះឥណ្ឌូនេស៊ី នឹងគាំទ្រកម្មវិធីសន្តិសុខស្បៀងរបស់កម្ពុជាវិញ តាមរយៈការផ្គត់ផ្គង់ជីកសិកម្ម។
លោក ចូកូ វីដូដូ បានលើកឡើងយ៉ាងដូច្នេះថា «ខ្ញុំពេញចិត្តចំពោះការឆ្លើយតបជាវិជ្ជមានពីកម្ពុជា ពាក់ព័ន្ធនឹងការនាំចូលអង្ករ ២៥០,០០០ តោនពីប្រទេសជិតខាងរបស់យើង»។
លោកបន្តថា ក្នុងកាយវិការទៅវិញទៅមក ឥណ្ឌូណេស៊ីនឹងគាំទ្រកម្មវិធីសន្តិសុខស្បៀងរបស់កម្ពុជា តាមរយៈការផ្គត់ផ្គង់ជី។
កម្ពុជា និងឥណ្ឌូណេស៊ី បានព្រមព្រៀងបន្តអនុស្សរណៈនៃការយោគយល់គ្នា ដែលចុះហត្ថលេខាលើកដំបូងក្នុងឆ្នាំ ២០១២ រវាងក្រសួងពាណិជ្ជកម្មកម្ពុជា និងក្រសួងពាណិជ្ជកម្មឥណ្ឌូណេស៊ី ។ លោក សុវិជាតិ សំអាងថា តម្លៃគឺកំណត់ទៅតាមទីផ្សារ។
បន្ថែមពីលើនេះ កម្ពុជា និងឥណ្ឌូនេស៊ី
ក៏បានព្រមព្រៀងលើកិច្ចព្រមព្រៀងអង្ករមួយទៀតចំនួន ១២៥,០០០ តោន ដែលនឹងត្រូវអនុវត្តភ្លាមៗនៅឆ្នាំ ២០២៣ ដោយវិស័យឯកជននៃប្រទេសទាំងពីរ ។
ក្រសួងក៏បានលើកទឹកចិត្តអ្នកវិនិយោគឥណ្ឌូណេស៊ី មកបណ្តាក់ទុនក្នុងរោងម៉ាស៊ីនកិនស្រូវនៅកម្ពុជា តាមស្តង់ដារសម្រាប់ការនាំចេញ។
កម្ពុជាបាននាំចេញអង្ករចំនួន ៣២៩,៦៣៣ តោនក្នុងឆមាសទី ១ ឆ្នាំនេះ ដោយរកចំណូលបានប្រមាណ ២២៩ លានដុល្លារ។
កម្ពុជានាំចេញអង្ករទៅកាន់ប្រទេសចំនួន
៥២ ជុំវិញពិភពលោក អង្ករដែលនាំចេញរួម
មាន អង្ករក្រអូប អង្ករសគ្រាប់វែង អង្ករសម្រូប និងអង្ករសរីរាង្គជាដើម។
ប្រែសម្រួលដោយ៖ សុ ជាតា