លោកនាយករដ្ឋមន្ត្រី ហ៊ុន ម៉ាណែត ពីម្សិលមិញបាននិយាយថា រដ្ឋាភិបាលបានផ្តល់ការទទួលខុសត្រូវនិងកាតព្វកិច្ចយ៉ាងច្បាស់លាស់ដល់ស្ថាប័នទាំងអស់ ដើម្បីដោះស្រាយបញ្ហាដែលកើតឡើងក្រោមដែនសមត្ថកិច្ចរបស់ខ្លួន។ លោកនឹងមិនបកស្រាយគ្រប់បញា្ហ ឬចេញសារជាសំឡេងដើម្បីធ្វើអន្តរាគមន៍ឡើយ។
លោកនាយករដ្ឋមន្ត្រី ហ៊ុន ម៉ាណែត បានថ្លែងបែបនេះនៅក្នុងពិធីសំណេះសំណាលជាមួយកម្មករនិយោជិត ចំនួន ១៨ ០៩៩នាក់មកពីបណ្តារោងចក្រសហគ្រាសដែលមានមូលដ្ឋានក្នុងខណ្ឌមានជ័យនិងខណ្ឌដង្កោកាលពីម្សិលមិញ។
លោកបានកត់សម្គាល់ឃើញថា នៅក្នុងខែនេះមានបញ្ហាជាច្រើនបានកើតឡើង ប៉ុន្តែការងារមួយចំនួន គឺលោកដោះស្រាយដោយខ្លួនឯង និងបញ្ហាចំនួនទៀត គឺលោកបញ្ជាទៅអង្គភាពជំនាញពិនិត្យ ពន្យល់ បកស្រាយ និងដោះស្រាយជូនប្រជាពលរដ្ឋ។ ជាក់ស្ដែងពាក់ព័ន្ធនឹងករណីស្ត្រីខ្មែរ៧នាក់ដែលត្រូវជនខិលខូចជួញដូរទៅធ្វើការនៅប្រទេសឡាវកាលពីចុងខែកញ្ញា គឺលោកបានចេញបញ្ជាទៅក្រសួងការបរទេសនិងសហប្រតិបត្តិការអន្តរជាតិសហការជាមួយស្ថានឯកអគ្គរាជទូតកម្ពុជាប្រចាំនៅប្រទេសឡាវដោះស្រាយនេះ ដើម្បីសង្គ្រោះជនរងគ្រោះទាំងនេះបានត្រឡប់មកកម្ពុជាវិញ។
លោកបានបញ្ជាក់ថា នៅមានបញ្ហាជាច្រើនទៀត ដែលលោកបានបញ្ជាទៅអង្គភាពជំនាញពិនិត្យ ពន្យល់ បកស្រាយ និងដោះស្រាយបញ្ហារបស់ប្រជាពលរដ្ឋ។
លោកថា៖ «បញ្ហាជាក់ស្ដែងខ្ញុំដាក់វិធានការនិងបញ្ជូនសារដោយផ្ទាល់ ប៉ុន្តែបញ្ហាដែលកើតឡើងតាមបណ្ដាសង្គម គឺខ្ញុំប្រគល់ភារកិច្ចទៅឱ្យអ្នកដែលពាក់ព័ន្ធដោះស្រាយ»។
លោកបានពន្យល់ថា លោកមិនអាចចេញមកបកស្រាយគ្រប់បញ្ហាជំនួសមន្ត្រីជំនាញទាំងស្រុងនោះទេ ព្រោះកិច្ចការងារខ្លះត្រូវការមន្ត្រីជំនាញបកស្រាយទើបវាល្អជាងលោកបកស្រាយ។ ដូច្នេះមិនមែនបញ្ហាគ្រប់យ៉ាងពឹងលើនាយករដ្ឋមន្ត្រីតែម្នាក់ ដើម្បីដោះស្រាយនោះទេ។
លោកបញ្ជាក់ថា៖ «នាយករដ្ឋមន្ត្រីចេញមុខបកស្រាយពាក់ព័ន្ធនឹងបញ្ហាធំៗរបស់ជាតិ ប៉ុន្តែចំពោះបញ្ហានានាដែលកើតឡើងគួរឱ្យក្រសួង ស្ថាប័ន និងអាជ្ញាធរពាក់ព័ន្ធ ជាអ្នកទទួលខុសត្រូវដោះស្រាយ»។
លោកបន្តថា៖ «ពាក់ព័ន្ធនឹងកង្វល់ប្រជាជន គឺខ្ញុំយកចិត្តទុកដាក់ទាំងអស់ គ្រាន់តែថាការដាក់វិធានការនិងការផ្សព្វផ្សាយជូនសាធារណជនមានរបៀបផ្សេងគ្នា។ កិច្ចការខ្លះខ្ញុំដោះស្រាយដោយផ្ទាល់ និងកិច្ចការខ្លះខ្ញុំប្រគល់ភារកិច្ចដល់ក្រសួងស្ថាប័នពាក់ព័ន្ធ អាជ្ញាធរពាក់ព័ន្ធ ជាអ្នកចាត់វិធានការដោះស្រាយ ហើយពន្យល់ទៅកាន់សាធារណៈអំពីបញ្ហានោះ។ នេះជាវិធានការដែលខ្ញុំធ្វើ»។
លោកបន្ថែមថា៖ «ទោះបីជាខ្ញុំមិនចេញឆ្លើយដោយខ្លួនឯង ប៉ុន្តែគឺខ្ញុំតាមដានជាប់ជាកិច្ច ដែលក្រសួង ស្ថាប័ន និងអាជ្ញាធរពាក់ព័ន្ធមិនអាចអត់ធ្វើតាមនោះទេ»។
លោក ហ៊ុន ម៉ាណែត បានប្រាប់ឱ្យមន្ត្រីជំនាញទាំងអស់ចេញបកស្រាយរាល់បញ្ហាដែលបានផ្ទុះឡើងក្នុងដែនសមត្ថកិច្ចរបស់ខ្លួនមុននឹងលោកចេញមកបកស្រាយឬចាត់វិធានការ។
រដ្ឋាភិបាលថ្មីក្នុងអាណត្ដិទី៧ បានចេញសេចក្តីសម្រេចកំណត់របៀបរបបការងារនិងការបែងចែកភារកិច្ចសម្រាប់ថ្នាក់ដឹកនាំប្រទេសកាលពីថ្ងៃកំលុងខែសីហា ដើម្បីធានាការអនុវត្តច្បាប់និងដឹកនាំកិច្ចការទូទៅរបស់រដ្ឋ។
ការកំណត់របៀបរបបការងារនិងការបែងចែកភារកិច្ចដឹកនាំរដ្ឋាភិបាលធ្វើឡើងបន្ទាប់ពីព្រះមហាក្សត្រចេញព្រះរាជក្រឹត្យតែងតាំងរដ្ឋាភិបាលថ្មីដែលមានលោក ហ៊ុន ម៉ាណែត ជានាយករដ្ឋមន្ត្រី និងឧបនាយករដ្ឋមន្ត្រីចំនួន១០រូប ទេសរដ្ឋមន្ត្រីចំនួន២១រូប ព្រមទាំងរដ្ឋមន្ត្រីចំនួន៣០រូប។
លោក សេក សុជាតិ នាយកប្រតិបត្តិអង្គការអភិវឌ្ឍន៍ផ្នត់គំនិត បានលើកឡើងថា វាជារឿងត្រឹមហើយដែលក្រសួងស្ថាប័ននីមួយៗត្រូវចេះទទួលខុសចំពោះការអនុវត្តការងារនៃជំនាញរបស់ពួកគេឱ្យមានប្រសិទ្ធភាព ដែលអាចបម្រើនិងផ្ដល់ទំនុកចិត្តដល់ប្រជាពលរដ្ឋ។ ដូច្នេះចំណាត់ការរបស់លោកនាយករដ្ឋមន្ត្រី គឺជារឿងល្អ។
លោកបន្តថា ប្រសិនបើគេក្រឡេកមើលពីតួនាទី ភារកិច្ច ហើយនិងការទទួលខុសត្រូវរបស់ថ្នាក់ដឹកនាំក្រសួងជំនាញនីមួយៗមានរដ្ឋលេខាធិការនិងអនុរដ្ឋលេខាមានច្រើនយ៉ាងសន្ធឹកសន្ធប់ដូចសុភាសិតខ្មែរថា “គ្នាច្រើនអន្សមខ្លោច“។
លោកបន្ថែមថា បញ្ហានេះមានហានិភ័យខ្ពស់ណាស់សម្រាប់ប្រជាពលរដ្ឋដែលមើលឃើញរដ្ឋាភិបាលដែល មានចំនួនថ្នាក់ដឹកនាំកាន់តែច្រើន ប៉ុន្តែបែរជាគ្មានគុណភាពការងារ។ ដូច្នេះវាជះឥទ្ធិពលខ្លាំង ដែលធ្វើឱ្យប៉ះពាល់ដល់កិត្តិយសរបស់រដ្ឋាភិបាលអាណត្តិទី៧នេះខ្លាំង។
លោក សេក សុជាតិ យល់ឃើញថា៖ «រដ្ឋាភិបាលគួរតែមានចំណាត់ការបន្ថែមពីលើការងារដែលរដ្ឋាមន្ត្រី ក៏ដូចជាថ្នាក់ដឹកនាំទទួលបន្ទុក។ ពោលឱ្យខ្លី គឺគួរតែទុកពេលបីខែ ឬប្រាំមួយខែប្រសិនបើក្នុងករណីដោះស្រាយបញ្ហាមិនបាន ឬបញ្ហាដដែលផ្ទុះឡើងវិញ តួនាទីរបស់រដ្ឋមន្ត្រីឬថ្នាក់ដឹកនាំស្ថាប័ននោះត្រូវតែមានចំណាត់ការភ្លាមៗឬក៏អាចដោះដូរដោយគ្មានការយោគយល់ទើបការងារមានប្រសិទ្ធភាព»។
លោកបន្ថែមថា៖ «បើសិនគ្រាន់តែនិយាយ ឬគ្រាន់តែដាក់ចេញនូវវិធានការដោយមិនមានចំណាត់ការច្បាស់លាស់ក្នុងការពង្រឹងប្រសិទ្ធភាពការអនុវត្តច្បាប់របស់មន្ត្រី ក៏ដូចជារបស់ថ្នាក់ដឹកនាំស្ថាប័ន ខ្ញុំយល់ថាវិធានការនោះមិនមានប្រសិទ្ធប៉ុន្មានទេ»៕