ពិព័រណ៍ការងារ និងផលិតភាពជាតិឆ្នាំ២០២៣ ដែលគ្រោងធ្វើនៅថ្ងៃទី១០ និងថ្ងៃទី១១ ខែវិច្ឆិកា នឹងផ្តល់ឱកាសការងារជាង ២០,០០០កន្លែង សម្រាប់យុវជនដែលមានសក្តានុពល និងកម្មករដែលចាប់អារម្មណ៍។
ដោយចាប់ផ្តើមពីម៉ោង ៨ព្រឹក ដល់ ៨យប់ នៅមជ្ឈមណ្ឌលសន្និបាត និងពិព័រណ៌កោះពេជ្រ ព្រឹត្តិការណ៍រយៈពេលពីរថ្ងៃនេះ ត្រូវបានរៀបចំដោយទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយសហភាពសហព័ន្ធយុវជនកម្ពុជា (UYFC) នៅរាជធានីភ្នំពេញ សមាគមវាយនភណ្ឌ
សំលៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) អង្គការអន្តរជាតិខាងការងារ (ILO) និងអង្គការ People in Need Cambodia Organization ដោយមានការគាំទ្រពីដៃគូជាច្រើនទៀត។
នៅក្នុងសន្និសីទសារព័ត៌មានកាលពីម្សិលមិញនេះ លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា ស្តង់ជាង ១៨០ មកពីក្រុមហ៊ុន សហគ្រាស ក្រសួង ស្ថាប័ន និងគ្រឹះស្ថានអប់រំ និងបណ្តុះបណ្តាលជាង១៨០ នឹងចូលរួមពិព័រណ៍ប្រចាំឆ្នាំនេះ ដោយផ្តល់ឱកាសការងារជាង ២០,០០០កន្លែង។
មនុស្សជាង ៣០,០០០នាក់ ត្រូវបានគេរំពឹងថានឹងមកទស្សនាពិព័រណ៍ការងារ និងផលិតភាពជាតិនៅឆ្នាំនេះ។
បេក្ខជនដែលមានចំណាប់អារម្មណ៍អាចស្វែងរកព័ត៌មានលម្អិតបន្ថែមអំពីឱកាសការងារ និងដាក់ពាក្យស្នើសុំការងារដែលពួកគេចាប់អារម្មណ៍នៅនឹងកន្លែង។
ក្រៅពីនេះ នឹងមានសិក្ខាសាលាថ្នាក់ជាតិស្តីពីផលិតភាព ដើម្បីលើកកម្ពស់ការយល់ដឹងរបស់ប្រជាជនអំពីផលិតភាព តាមរយៈចំណេះដឹង និងការចែករំលែកបទពិសោធន៍ល្អៗពីអ្នកជំនាញ។
ពិព័រណ៍ការងារ និងផលិតភាពជាតិឆ្នាំ២០២៣ ក៏នឹងត្រូវបានរៀបចំតាមអនឡាញផងដែរ ដែលអ្នកស្វែងរកការងារធ្វើនៅទូទាំងប្រទេសអាចដាក់ពាក្យសុំការងារអនឡាញតាមរយៈគេហទំព័រ៖ http://careerfair.nea.gov.kh/។