រដ្ឋសភាកម្ពុជា ចូលរួមក្នុងកិច្ចប្រជុំកំពូលប្រធានសភាស្ត្រីក្នុងរយៈពេល១០ថ្ងៃ នៅប្រទេសបារាំង ដើម្បីជំរុញបន្ថែមនូវការទូតសភាដែលផ្ដោតលើបញ្ហាស្រ្តី និងក្មេងស្រី ព្រមទាំងលើកកម្ពស់សិទ្ធិស្រ្តីនៅទូទាំងពិភពលោក និងប្រឆាំងរាល់ទម្រង់នៃអំពើហិង្សាលើស្ត្រី។
គណៈប្រតិភូកម្ពុជាដឹកនាំដោយលោកស្រី ឃួន សុដារី ប្រធានរដ្ឋសភា បានទៅបំពេញទស្សនកិច្ចជាផ្លូវការ និងចូលរួមកិច្ចប្រជុំកំពូលប្រធានសភាស្រ្តីនៅប្រទេសបារាំង ចាប់ពីថ្ងៃទី២ ដល់ថ្ងៃទី១១ ខែមីនា ឆ្នាំ២០២៤ តបតាមការអញ្ជើញរបស់លោកស្រី យ៉ាអ៊ែល ប្រូន ពីវេ (Yaël Braun-Pivet) ប្រធានរដ្ឋសភាបារាំង។
លោក កែវ ពិសិទ្ធិ អគ្គលេខាធិការដ្ឋានរដ្ឋសភា បានឱ្យដឹងថា ដំណើរទស្សនកិច្ចរបស់លោកស្រី ឃួន សុដារី ក្នុងគោលបំណងលើកកម្ពស់ទំនាក់ទំនងស្ថាប័ននីតិប្បញ្ញត្តិ និងទំនាក់ទំនាក់ទំនងរវាងប្រជាជននៃប្រទេសកម្ពុជា-បារំាងឱ្យកាន់តែជិតស្និទ្ធ។
លោកបន្តថា ដំណើរទស្សនកិច្ចនេះ ក៏ជាឱកាសមួយដើម្បីពង្រឹងវិស័យការទូតសភាកម្ពុជាជាមួយសភានានានៅលើសកលលោក ជាពិសេសការលើកកម្ពស់សមភាពយេនឌ័រ គោលការណ៍ពហុភាគីនិយម ដើម្បីថែរក្សាការពារសុខសន្តិភាព ស្ថិរភាព និងវិបុលភាពសង្គមប្រកបដោយចីរភាព និងបរិយាបន្ន។
លោកបន្ថែមថា កិច្ចប្រជុំកំពូលប្រធានសភាស្រ្តីឆ្នាំ២០២៤ មានការអញ្ជើញចូលរួមពីប្រធានសភាជាស្រ្តីនៅទូទាំងពិភពលោក ដែលមកពី២៥ប្រទេស ដើម្បីជំរុញបន្ថែមនូវការទូតសភាប្រកបដោយភាពបុរេសកម្ម ដែលគិតគូរពីបញ្ហាស្រ្តីនិងក្មេងស្រី ការលើកកម្ពស់សិទ្ធិស្រ្តីនៅទូទាំងពិភពលោក និងការប្រឆាំងរាល់ទម្រង់នៃអំពើហិង្សាលើស្ត្រី។
លោក កែវ ពិសិទ្ធិ បញ្ជាក់ថា សភាដើរតួនាទីនាំមុខក្នុងការជំរុញឱ្យមានសមភាពរវាងស្ត្រីនិងបុរស តាមរយៈការតាក់តែងនិងអនុម័តច្បាប់ពាក់ព័ន្ធសំខាន់ៗ។
លោកបន្ថែមថា កិច្ចប្រជុំកំពូលខាងលើនេះមានវេទិកាតុមូលសំខាន់ៗ គឺទី១ ការអប់រំប្រកបដោយសមភាព ការប្រយុទ្ធប្រឆាំងនឹងអំពើហិង្សាលើស្ត្រី និងសុខភាពស្ត្រី និងទី២ សមភាពនិងចំនួនស្មើគ្នារវាងស្ត្រីនិងបុរសក្នុងវិស័យនយោបាយ និងការអះអាងអំពីតួនាទីគំរូរបស់ស្ត្រី។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានឱ្យដឹងថា បច្ចុប្បន្នទំនាក់ទំនងរវាងកម្ពុជា-អឺរ៉ុប មានការរីកចម្រើនច្រើន បន្ទាប់ពីកម្ពុជាគាំទ្រសេចក្ដីសម្រេចរបស់អង្គការសហប្រជាជាតិពាក់ព័ន្ធសង្គ្រាមរវាងរុស្ស៊ី-អ៊ុយក្រែន។
លោកបន្ថែមថា ការគាំទ្រសេចក្ដីសម្រេចរបស់អង្គការសហប្រជាតិ បានធ្វើឱ្យបណ្ដាប្រទេសស្ថិតក្នុងតំបន់អឺរ៉ុប ផ្លាស់ប្ដូរឥរិយាបថជាច្រើនដែលធ្វើឱ្យទំនាក់ទំនងរវាងកម្ពុជា-បារាំង មានការរីកចម្រើន និងមានមតិយល់ស្របគ្នាច្រើន។
លោកបន្តថា កន្លងមកសង្កេតឃើញគណៈប្រតិភូរបស់រដ្ឋាភិបាលបារាំង បានមកបំពេញទស្សនកិច្ចនៅកម្ពុជាញឹកញាប់ ដែលសកម្មភាពទាំងនេះជាសញ្ញាណមួយដ៏ល្អសម្រាប់កម្ពុជាអាចពង្រីកទំនាក់ទំនងរបស់ខ្លួនជាមួយបណ្ដាប្រទេសអឺរ៉ុប ឱ្យកាន់តែស្អិតរមួតបន្ថែមទៀត។
លោក គិន ភា បញ្ជាក់ថា កន្លងមកបារាំង បានរួមចំណែកយ៉ាងសំខាន់សម្រាប់អភិវឌ្ឍធនធានមនុស្ស និងលើកកម្ពស់វិស័យជាច្រើននៅកម្ពុជា។
កាលពីថ្ងៃព្រហស្បតិ៍ រដ្ឋសភាកម្ពុជា ប្រកាសព័ត៌មានថា ក្នុងកំឡុងទស្សនកិច្ចជាផ្លូវការនៅបារាំង លោកស្រី ឃួន សុដារី នឹងមានជំនួបពិភាក្សាការងារជាមួយប្រធានរដ្ឋសភាបារាំង ប្រធានរដ្ឋសភាឥណ្ឌូនេស៊ី ប្រធានរដ្ឋសភាអាល្លឺម៉ង់ ប្រធានរដ្ឋសភាប៊ែលហ្ស៊ីក និងប្រធានរដ្ឋសភាតង់ហ្សានី ព្រមទាំងចូលរួមពិធីសម្ពោធការតាំងពិព័រណ៍ដែលឧទ្ទិសដល់សិទ្ធិនយោបាយរបស់ស្រ្តីនៅលើពិភពលោក។
ក្រៅពីជំនួបពិភាក្សាការងារជាមួយប្រធានសភាជាស្រ្តី គណៈប្រតិភូនៃរដ្ឋសភាកម្ពុជា ក៏នឹងមានជំនួបសម្តែងការគួរសម និងពិភាក្សាការងារជាមួយប្រតិភូនៃសភានិយាយភាសាបារាំង (APF) ដើម្បីជំរុញបន្ថែមវឌ្ឍនភាពនៃទំនាក់ទំនង និងកិច្ចសហប្រតិបត្តិការរវាង APF និងសភាកម្ពុជា។
រដ្ឋសភាកម្ពុជាបញ្ជាក់ថា រដ្ឋសភាក៏នឹងមានជំនួបដាច់ដោយឡែកជាមួយក្រុមមិត្តភាពសភាកម្ពុជា-បារាំង គណៈកម្មការសង្គមកិច្ចនៃរដ្ឋសភាបារាំង និងជំនួបរវាងអគ្គលេខាធិការនៃរដ្ឋសភាកម្ពុជា និងរដ្ឋសភាបារាំងផងដែរ។
គួររម្លឹកថា កាលពីខែមករា លោកនាយករដ្ឋមន្ត្រី ហ៊ុន ម៉ាណែត បានបំពេញទស្សនកិច្ចជាផ្លូវការនៅប្រទេសបារាំង លើកដំបូងក្នុងនាមជាប្រទេសអឺរ៉ុប ដើម្បីលើកកម្ពស់ទំនាក់ទំនងជាប្រពៃណី និងពង្រីកកិច្ចសហប្រតិបត្តិការក្នុងក្របខ័ណ្ឌទ្វេភាគី និងពហុភាគី ជាពិសេសដោះស្រាយបញ្ហាប្រឈមសកល និងរក្សាសណ្ដាប់ធ្នាប់ពិភពលោកដែលផ្អែកលើច្បាប់។
ក្នុងដំណើរបំពេញទស្សនកិច្ចនៅបារាំង លោក ហ៊ុន ម៉ាណែត ក៏បានជំរុញកិច្ចសហប្រតិបត្តិការសេដ្ឋកិច្ច និងវិនិយោគរវាងកម្ពុជា និងបារាំង ព្រមទាំងចុះហត្ថលេខាលើឯកសារមួយចំនួនស្តីពី ការចូលរួមរបស់សភាពាណិជ្ជកម្មកម្ពុជាក្នុងសម្ព័ន្ធភាពដៃគូហ្វ្រង់កូហ្វូនី (APF) ផងដែរ៕