នៅថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា អ្នកសង្កេតការណ៍បរទេស ៣៣៣ នាក់មកពី ៦៥ ប្រទេស និងស្ថាប័នអន្តរជាតិនឹងអញ្ជើញមកកម្ពុជាដើម្បីចូលរួមសង្កេតការណ៍ការបោះឆ្នោតសកលជ្រើសតាំងតំណាងរាស្រ្តនីតិកាលទី ៧ ដែលនឹងប្រព្រឹត្តទៅនៅថ្ងៃអាទិត្យ។
ក្នុងចំណោមនោះ ក៏មានលោក Johari Abdul ប្រធានសភាម៉ាឡេស៊ី និងលោក Nuno Gomes Nabiam នាយករដ្ឋមន្ត្រី Guinea-Bissau ព្រមទាំងអតីតប្រមុខរដ្ឋ រដ្ឋាភិបាល និងសភាចំនួន ១១រូបផងដែរ។
លោកបានបន្តថា កម្ពុជាស្វាគមន៍យ៉ាងកក់ក្តៅចំពោះវត្តមានអ្នកសង្កេតការទាំងអស់ដែលបានចំណាយពេលវេលា ធ្វើដំណើរមកកាន់កម្ពុជា ដើម្បីធ្វើជាសាក្សីនៃដំណើរការប្រជាធិបតេយ្យនៅកម្ពុជា។
គណៈកម្មាធិការជាតិរៀបចំការបោះឆ្នោត (គ.ជ.ប) បាននិយាយថា គណបក្សនយោបាយចំនួន១៨ នឹងចូលរួមប្រកួតប្រជែងក្នុងការបោះឆ្នោតនៅថ្ងៃអាទិត្យសម្រាប់អាសនៈ ១២៥ ក្នុងរដ្ឋសភា ដោយបន្ថែមថា ប្រជាពលរដ្ឋជាង ៩.៧ លាននាក់មានសិទ្ធិបោះឆ្នោត។
នៅក្នុងការបោះឆ្នោតជ្រើសតាំងតំណាងរាស្រ្តចុងក្រោយ ដែលបានធ្វើឡើងកាលពីប្រាំឆ្នាំមុន គណបក្សប្រជាជនកម្ពុជាទទួលបានអាសនៈទាំង១២៥ នៅក្នុងរដ្ឋសភា៕ Xinhua