កម្ពុជា និងចិនបានធ្វើកិច្ចសហប្រតិបត្តិការនវានុវត្តន៍ហិរញ្ញវត្ថុ និងប្រព័ន្ធទូទាត់សងប្រាក់ ដើម្បីជួយសម្រួលដល់ប្រតិបត្តិការទូទាត់ឆ្លងដែនប្រកបដោយប្រសិទ្ធភាព និងសុវត្ថិភាពរវាងប្រទេសទាំងពីរ។
អនុស្សរណៈនៃការយោគយល់គ្នាចំនួន២រវាងធនាគារជាតិនៃកម្ពុជានិង ធនាគារកណ្តាលចិនស្តីពី (១)កិច្ចសហប្រតិបត្តិការនវានុវត្តន៍ហិរញ្ញវត្ថុ និងប្រព័ន្ធទូទាត់សងប្រាក់ (២) និងការបង្កើតកិច្ចសម្របសម្រួលក្នុងការទូទាត់និងផាត់ទាត់នៅកម្ពុជាត្រូវបានចុះហត្ថលេខានៅថ្ងៃទី២១ ខែវិច្ឆិកា ឆ្នាំ២០២៣ នៅទីក្រុងប៉េកាំង ប្រទេសចិន។
លោកជំទាវបណ្ឌិត ជា សិរី ទេសាភិបាលនៃធនាគារជាតិនៃកម្ពុជានិងលោកបណ្ឌិត Pan Gongshengទេសាភិបាលធនាគារកណ្តាលចិនបានចុះហត្ថលេខាលើអនុស្សរណៈនៃការយោគយល់គ្នានេះ។
យោងតាមធនាគារជាតិនៃកម្ពុជាអនុស្សរណៈយោគយល់គ្នាស្តីពីច្ចសហប្រតិបត្តិការនវានុវត្តន៍ហិរញ្ញវត្ថុ និងប្រព័ន្ធទូទាត់សងប្រាក់មានគោលបំណង ជំរុញនវានុវត្តន៍ក្នុងវិស័យធនាគារនិងប្រព័ន្ធទូទាត់សងប្រាក់ លើកកម្ពស់សុវត្ថិភាព និងប្រសិទ្ធភាពប្រតិបត្តិការទូទាត់ឆ្លងដែនរវាងកម្ពុជា និងចិន និងការទទួលប្រើប្រាស់បច្ចេកវិទ្យាហិរញ្ញវត្ថុក្នុងវិស័យធនាគារ និងសេវាកម្មហិរញ្ញវត្ថុ។
កិច្ចសហប្រតិបត្តិការនេះនឹងលើកកម្ពស់ទំនុកចិត្ត សន្តិសុខ ប្រសិទ្ធភាព ស្ថិរភាព និងបរិយាប័ន្នក្នុងវិស័យនេះ ព្រមទាំងគាំទ្រដល់គោលនយោបាយរបស់រាជរដ្ឋាភិបាលកម្ពុជាក្នុងការអភិវឌ្ឍន៍សេដ្ឋកិច្ច និងសង្គមឌីជីថល។
សម្រាប់អនុស្សរណៈនៃការយោគយល់គ្នាស្តីពីការបង្កើតកិច្ចសម្របសម្រួលក្នុងការទូទាត់និងផាត់ទាត់នៅកម្ពុជាគឺដើម្បីពង្រឹងសមត្ថភាពនៃវិស័យធនាគារកម្ពុជា និងឆ្លើយតបទៅនឹងកំណើននៃពាណិជ្ជកម្ម ការវិនិយោគ និងលំហូរហិរញ្ញវត្ថុទ្វេភាគីរវាងប្រទេសចិននិងកម្ពុជា។
តាមរយៈនុវានុត្តន៍ផលិតផល និងសេវាកម្មហិរញ្ញវត្ថុដែលផ្តល់ដោយធនាគារកម្ពុជាដល់វិនិយោគិនចិន អនុស្សរណៈនៃការយោគយល់គ្នាទាំងពីរនេះនឹងរួមចំណែកក្នុងការលើកកម្ពស់ការប្រកួតប្រជែង និងភាពទាក់ទាញរបស់កម្ពុជា ដែលជាគោលដៅវិនិយោគ។AKP