កិច្ចប្រជុំដ៏សំខាន់មួយត្រូវបានធ្វើឡើងនៅក្នុងទីក្រុងសៀងហៃភាគខាងកើតនៃប្រទេសចិនដែលមានភាពអ៊ូអរកាលពីថ្ងៃពុធសប្តាហ៍មុន ដើម្បីចែករំលែកព័ត៌មានសេដ្ឋកិច្ច ដោយផ្តោតលើការពង្រឹងកិច្ចខិតខំប្រឹងប្រែងដែលកំពុងបន្តនៃគំនិតផ្តួចផ្តើមខ្សែក្រវ៉ាត់ និងផ្លូវ (BRI)។ ដោយមានការចូលរួមពីគណៈប្រតិភូជិត៣០០ នាក់ដែលតំណាងឱ្យវិស័យផ្សេងៗ រួមទាំងអង្គភាពរដ្ឋាភិបាល សមាគមឧស្សាហកម្ម បណ្តាញផ្សព្វផ្សាយ និងក្រុមហ៊ុននានា សន្និសីទនេះមានគោលបំណងរិះរកមធ្យោបាយដើម្បីបង្កើនការអភិវឌ្ឍន៍ គំនិតផ្តួចផ្តើមខ្សែក្រវ៉ាត់និងផ្លូវ។

សន្និសីទប្រចាំឆ្នាំលើកទី២ នៃភាពជាដៃគូព័ត៌មានសេដ្ឋកិច្ចខ្សែក្រវ៉ាត់ និងផ្លូវ និងសន្និសិទសហគ្រិនសៀងហៃឆ្នាំ២០២៣ សម្រាប់ការអភិវឌ្ឍន៍គុណភាពខ្ពស់ខ្សែក្រវ៉ាត់និងផ្លូវ បានបម្រើជាចំណុចសំខាន់នៃការជួបប្រជុំគ្នា។ វាគ្មិនសំខាន់ លោក ហ៊្វូ ហ័រ (Fu Hua) ប្រធានទីភ្នាក់ងារព័ត៌មានឈានមុខ បានគូសបញ្ជាក់ពីការប្តេជ្ញាចិត្តរបស់ពួកគេក្នុងការរាយការណ៍អំពីកិច្ចខិតខំប្រឹងប្រែងស្ថាបនាគំនិតផ្តួចផ្តើមខ្សែក្រវ៉ាត់និងផ្លូវ និងបានប្រកាសពីផែនការពង្រឹងបណ្តាញចែករំលែក និងបង្កើនតួនាទីរបស់ពួកគេក្នុងនាមជាស្ថាប័នស្រាវជ្រាវ(think tank) កម្រិតខ្ពស់ថ្នាក់ជាតិក្នុងការគាំទ្រគំនិតផ្តួចផ្តើមនេះ។ យោងតាមលោក ហ៊្វូ ហ័រ បានឱ្យដឹងថា គោលបំណងចម្បងរបស់ទីភ្នាក់ងារគឺផ្តល់សេវាកម្មព័ត៌មានកម្រិតខ្ពស់ និងការគាំទ្រផ្នែកបញ្ញាសម្រាប់ការកសាងគំនិតផ្តួចផ្តើមខ្សែក្រវ៉ាត់និងផ្លូវ។

ទោះជាយ៉ាងណាក៏ដោយ សន្និសីទនេះ គឺលើសពីសុន្ទរកថា និងការប្តេជ្ញាចិត្ត។ គណៈប្រតិភូបានចូលរួមក្នុងកិច្ចសន្ទនាដ៏រស់រវើកលើទិដ្ឋភាពផ្សេងៗនៃ BRI ដែលគ្របដណ្តប់លើប្រធានបទនានាដូចជា ការគាំទ្រផ្នែកហិរញ្ញវត្ថុសម្រាប់សកម្មភាពដែលទាក់ទងនឹង BRI និងសារៈសំខាន់នៃការអភិវឌ្ឍន៍បៃតងប្រកបដោយនិរន្តរភាព។ កិច្ចពិភាក្សាទាំងនេះបានផ្តល់ការយល់ដឹងដ៏មានតម្លៃចំពោះបញ្ហាប្រឈម និងឱកាសដែលប្រទេសពាក់ព័ន្ធជាមួយគំនិតផ្តួចផ្តើមខ្សែក្រវ៉ាត់ និងផ្លូវ។

ភាពជាដៃគូព័ត៌មានសេដ្ឋកិច្ចខ្សែក្រវ៉ាត់ និងផ្លូវ ដែលបង្កើតឡើងរួមគ្នាដោយដៃគូក្នុងស្រុក និងអន្តរជាតិក្នុងឆ្នាំ២០១៩ បានដើរតួនាទីយ៉ាងសំខាន់ក្នុងការផ្តល់ព័ត៌មានសេដ្ឋកិច្ចដ៏មានតម្លៃដល់រដ្ឋាភិបាល និងសហគ្រាសនៃប្រទេស BRI ។ ដំបូងឡើយមានសមាជិកចំនួន៣៣ ហើយភាពជាដៃគូនេះមានភាពរីកចម្រើនគួរឱ្យកត់សម្គាល់ ហើយឥឡូវនេះមានសមាជិកចំនួន៥៦ រួមទាំងទីភ្នាក់ងារសារព័ត៌មាន វិទ្យាស្ថានស្រាវជ្រាវ និងសមាគមធុរកិច្ចមកពីប្រទេស និងតំបន់ចំនួន៣៧។

លោក ហ៊្វូ ហ័រ ប្រធានសារព័ត៌មានស៊ីនហួ បាននិយាយថា “មានតម្រូវការសម្រាប់ការចែករំលែកព័ត៌មានសេដ្ឋកិច្ចយ៉ាងទូលំទូលាយ និងទាន់ពេលវេលា ដើម្បីធានាឱ្យការអនុវត្តប្រកបដោយជោគជ័យនៃគំនិតផ្តួចផ្តើមខ្សែក្រវ៉ាត់ និងផ្លូវ។ តាមរយៈការពង្រឹងបណ្តាញ និងការផ្តល់ការគាំទ្រផ្នែកបញ្ញា យើងអាចរួមចំណែកដល់ការអភិវឌ្ឍន៍ប្រកបដោយគុណភាពខ្ពស់នៃគំនិតផ្តួចផ្តើមនេះ” ។