រដ្ឋាភិបាលបានបញ្ជាក់ថាការបន្តដំឡើងប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើងផលិតផលធ្វើដំណើរ និងកាបូប ( GFT ) ដល់កម្មករ-និយោជិត ត្រូវបានធ្វើឡើងជាជំហានៗដើម្បីធានានិងរក្សាភាពប្រកួតប្រជែងរបស់កម្ពុជានៅលើទីផ្សារ។
លោកនាយករដ្ឋមន្ត្រី ហ៊ុន ម៉ាណែត មានប្រសាសន៍ក្នុងពិធីជួបសំណេះសំណាល
ជាមួយកម្មករ-និយោជិតប្រមាណ១៨,០០០នាក់ នៅរាជធានីភ្នំពេញនាព្រឹកថ្ងៃទី ២៩ ខែសីហា ឆ្នាំ
២០២៣ថា ការបន្តដំឡើងប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើងផលិតផលធ្វើដំណើរ និងកាបូប ដល់កម្មករ-និយោជិត គឺជាគោលនយោបាយរបស់រាជរដ្ឋាភិបាលកម្ពុជាដែលនៅតែអនុវត្តដដែល។
លោកថ្លែងថា៖ « ចំពោះការដំឡើងប្រាក់ឈ្នួលដល់កម្មករ-និយោជិតនេះ ត្រូវបានធ្វើឡើងជាជំហានៗដើម្បីធានានិងរក្សាភាពប្រកួតប្រជែង និង កំណើនក្នុងវិស័យកាត់ដេរ»។
នៅក្នុង ២០២៣នេះ ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូប គឺមានចំនួន២០០ដុល្លារក្នុងមួយខែ ពោលគឺកើនឡើងពី ១៩៤ ដុល្លារនៅក្នុងឆ្នាំ ២០២២។
ថ្ងៃទី២៨ ខែសីហា ឆ្នាំ២០២៣នេះ ក្រុមប្រឹក្សាជាតិប្រាក់ឈ្នួលអប្បរមា អាណត្តិទី៣ បានជួបប្រជុំគ្នាជាលើកទី២ ដើម្បីកំណត់ប្រាក់ឈ្នួលអប្បបរមាកម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៤។
កិច្ចប្រជុំចចារប្រាក់ឈ្នួលអប្បបរមាលើកទី២នេះបានដឹកនាំដោយ លោក ហេង សួរ រដ្ឋមន្រ្តីថ្មីនៃក្រសួងការងារ និងបណ្តុះបណ្តាលវិជ្ជាជីវៈ និងមានការចូលរួមលក្ខណៈត្រីភាគីជាមួយភាគីសហជីព តំណាងឲ្យកម្មករនិយោជិត ភាគីនិយោជក រួមនឹងភាគីរដ្ឋាភិបាល។
លោកមានប្រសាសន៍ថា ក្រសួងនឹងខិតខំចេញតួលេខប្រាក់ឈ្នួលអប្បបរមា សម្រាប់ឆ្នាំ២០២៤ ឱ្យបានមុនបុណ្យភ្ជុំបិណ្ឌ ដើម្បីសម្រួលដល់ជីវភាពរស់នៅរបស់បងប្អូនកម្មករ និយោជិត។
គិតត្រឹមមកដល់ខែសីហា ឆ្នាំ២០២៣នេះ កម្ពុជាមានរោងចក្រកាត់ដេរ សម្លៀកបំពាក់ ស្បែកជើង និងផលិតផលធ្វើដំណើរចំនួន
១០៧៧ និងផ្តល់ការងារដល់ប្រជាពលរដ្ឋកម្ពុជាជិត ៨០ម៉ឺននាក់។
វិស័យនេះបានរងផលប៉ះពាល់ដោយសារកំណើនសេដ្ឋកិច្ចយឺតសង្រ្គាមអូសបន្លាយរវាងរុស្សី និង អ៊ុយក្រែន និងកំណើនអតិផរណាខ្ពស់លើពិភពលោក។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករ ការនាំចេញផលិតផល(GFT)ក្នុងរយៈពេល៧ខែឆ្នាំនេះមានចំនួន ៦, ២៧ លានដុល្លារសហរដ្ឋអាមេរិក ពោលគឺធ្លាក់ចុះពីតម្លៃ ៧, ៨៩ លានដុល្លារក្នុងអំឡុងពេលដូចគ្នាកាលពីឆ្នាំទៅ៕
ប្រែសម្រួលដោយ៖ សុ ជាតា