លោក សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានណែនាំដល់ភាគីពាក់ព័ន្ធចូលរួមការពារទីតាំងដីភូមិចាស់របស់ពលរដ្ឋនៅក្នុងតំបន់រមណីយដ្ឋានអង្គរ បន្ទាប់ពីពួកគេស្ម័គ្រចាកចេញទៅរស់នៅទីតាំងថ្មីដែលរៀបចំដោយរដ្ឋាភិបាលនៅតំបន់អភិវឌ្ឍភូមិរុនតាឯកស្ថិតក្នុងស្រុកបន្ទាយស្រី និងតំបន់អភិវឌ្ឍភូមិពាក់ស្នែងស្ថិតនៅស្រុកអង្គរធំ នៃខេត្តសៀមរាប។
ការណែនាំនេះធ្វើឡើងនៅក្នុងកិច្ចប្រជុំអន្តរក្រសួងស្ដីពីការអភិវឌ្ឍតំបន់ភូមិរុនតាឯកនិងភូមិពាក់ស្នែងនៅខេត្តសៀមរាបកាលពីថ្ងៃពុធ។
លោក សាយ សំអាល់ រដ្ឋមន្ត្រីក្រសួងរៀបចំដែនដី គនរូបនីយកម្ម និងសំណង់ បានណែនាំដល់រដ្ឋបាលខេត្តសៀមរាប ក្រសួងវប្បធម៌និងវិចិត្រសិល្បៈ និងអាជ្ញាធរជាតិអប្សរា ត្រូវការពារដីដែលពលរដ្ឋស្ម័គ្ររុះរើទៅនៅទីតាំងថ្មី ហើយត្រូវទប់ស្កាត់ការចូលមកតាំងទីលំនៅថ្មីក្នុងតំបន់រមណីយដ្ឋានអង្គរ។
លោកបានស្នើក្រសួងបរិស្ថានដាំកូនឈើឡើងវិញនៅទីតាំងដែលពលរដ្ឋស្ម័គ្រចាកចេញពីតំបន់រមណីយដ្ឋានអង្គរទៅនៅតំបន់អភិវឌ្ឍភូមិរុនតាឯកនិងពាក់ស្នែង។
ទន្ទឹមនេះលោក សាយ សំអាល់ បានជំរុញឱ្យពន្លឿនការចេញបណ្ណកម្មសិទ្ធិជូនពលរដ្ឋដែលបានស្ម័គ្រចាកចេញទៅនៅក្នុងតំបន់អភិវឌ្ឍន៍ភូមិរុនតាឯកនិងតំបន់អភិវឌ្ឍន៍ភូមិពាក់ស្នែង ហើយមិនអនុញ្ញាតឱ្យមានចរន្តលក់ដូរទីតាំងដីនោះជាដាច់ខាត។
លោក លី វណ្ណៈ នាយករដ្ឋបាលខេត្តសៀមរាប បាននិយាយថា៖ «គាត់បានណែនាំដល់អាជ្ញាធរសហការគ្នាទប់ស្កាត់ការចូលមកតាំងទីលំនៅថ្មីលើភូមិចាស់ដែលពលរដ្ឋស្ម័គ្រចិត្តចាកចេញពីតំបន់រមណីយដ្ឋានអង្គរ និងតំបន់ផ្សេងៗទៀតដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា»។
លោកបន្តថា៖ «តាមពិត រាល់ថ្ងៃយើងបានទប់ស្កាត់ការចូលមកតាំងទីលំនៅថ្មី។ ដូចយើងដឹងស្រាប់ហើយ គឺមិនអនុញ្ញាតឱ្យនរណាម្នាក់សង់ទីលំនៅឋានក្នុងតំបន់ដែលគ្រប់គ្រងរបស់អាជ្ញាធរជាតិអប្សរាឡើយ»។
កាលពីពេលកន្លងមក រដ្ឋាភិបាលបានដាក់ចេញគោលនយោបាយផ្ដល់ដីលំនៅឋាននៅតំបន់អភិវឌ្ឍន៍ភូមិរុនតាឯកក្នុងស្រុកបន្ទាយស្រី និងតំបន់អភិវឌ្ឍន៍ភូមិពាក់ស្នែងក្នុងស្រុងអង្គរធំ ខេត្តសៀមរាប ជាថ្នូរនឹងការណ៍ដែលពលរដ្ឋស្ម័គ្ររុះរើទីលំនៅឋានដែលខុសច្បាប់ចេញពីតំបន់រមណីយដ្ឋានអង្គរ។
តាមគោលការណ៍ ពលរដ្ឋមួយគ្រួសារត្រូវទទួលបានដីទំហំ២០ម៉ែត្រx៣០ម៉ែត្រសម្រាប់សង់លំនៅឋានជាមួយនឹងការសាសង់ហេដ្ឋរចនាសម្ព័ន្ធនានា ដូចជាប្រព័ន្ធអគ្គិសនី ប្រព័ន្ធទឹកស្អាត ប្រព័ន្ធលូ ផ្លូវថ្នល់ ផ្សារ មន្ទីរពេទ្យ និងសាលារៀនជាដើមនៅក្នុងតំបន់អភិវឌ្ឍន៍ទាំងពីរ ដើម្បីសម្រួលដល់ពលរដ្ឋដែលទើបតែផ្លាស់ប្តូរទីលំនៅទៅរស់នៅក្នុងភូមិថ្មីនោះ។
លោក លី វណ្ណៈ នាយករដ្ឋបាលខេត្តសៀមរាប បានឱ្យដឹងថា គិតមកដល់ពេលនេះ ពលរដ្ឋដែលស្ម័គ្រចិត្តចាកចេញពីតំបន់រមណីយដ្ឋានអង្គរចំនួន ៩ ៨៨៩នាក់ដែលបានចាប់ឆ្នោតជ្រើសរើសយកដីឡូតិ៍ទំហំ២០ម៉ែត្រx៣០ម៉ែត្រនៅតំបន់អភិវឌ្ឍន៍ភូមិរុនតាឯកនិងតំបន់អភិវឌ្ឍន៍ភូមិពាក់ស្នែង។
លោកបន្តថា ក្នុងនោះមានពលរដ្ឋចំនួន ៥ ៨៦៥គ្រួសារបានស្ម័គ្រចិត្តទៅតំបន់អភិវឌ្ឍន៍ភូមិរុនតាឯកក្នុងស្រុកបន្ទាយស្រី និងពលរដ្ឋចំនួន ៤ ០២៤គ្រួសារបានស្ម័គ្រចិត្តទៅតំបន់អភិវឌ្ឍន៍ពាក់ស្នែងក្នុងស្រុកអង្គរធំ ខេត្តសៀមរាប។
ក្រោយពីប្រជាពលរដ្ឋទាំងនេះបានស្ម័គ្រចិត្តចាកចេញពីតំបន់រមណីយដ្ឋានអង្គរទៅតាំងទីលំនៅថ្មី អាជ្ញាធរជាតិអប្សរាបានចាប់ផ្ដើមយុទ្ធនាការដាំស្មៅនិងដើមឈើចម្រុះនៅលើទីតាំងភូមិចាស់ទាំងនោះ ដើម្បីកែលម្អវាក្លាយជាតំបន់ពណ៌បៃតងដោយដើមឈើនិងស្មៅដែលជាទ្រនាប់ការពារដ៏សំខាន់ដល់ប្រាសាទបុរាណ។
លោក ឡុង កុសល អ្នកនាំពាក្យអាជ្ញាធរជាតិអប្សរា ធ្លាប់ប្រាប់ខ្មែរថាមស៍ថា ក្នុងដំណាក់កាលដំបូងនៃយុទ្ធនាការដាំដើមឈើ គឺអាជ្ញាធរជាតិអប្សរាបានសហការជាមួយនឹងស្ថាប័នរដ្ឋនិងឯកជន ដើម្បីដាំស្មៅនិងដើមឈើលើផ្ទៃជិត២ហិកតានៅបរិវេណខាងលិចរមណីដ្ឋានអង្គរ ដើម្បីប្រែក្លាយតំបន់នោះជាតំបន់មានទេសភាពបៃតង។
លោកបន្ថែមថា ដើមឈើដែលត្រូវយកមកដាំលើទីតាំងភូមិចាស់ក្នុងតំបន់រមណីយដ្ឋានអង្គរដែលពលរដ្ឋបានចាកចេញនោះ ជាកូនឈើបណ្ដុះឡើងដោយអាជ្ញាធរជាតិអប្សរា ខណៈស្មៅដែលត្រូវដាំលម្អដែរនោះ គឺត្រូវការចំណាយថវិកាទិញពីទីផ្សារ។
លោកនិយាយថា៖ «ពលរដ្ឋយើងបានចាកចេញពីភូមិមួយចំនួន ដូចជាភូមិទក្សិណត្បូង ភូមិវាល ភូមិត្រពាំងសេះ ភូមិមណ្ឌលបី ភូមិខ្វៀន ដែលស្ថិតនៅក្នុងតំបន់អង្គរ។ ពួកគេនៅតែបន្តស្ម័គ្រចាកចេញទៅរស់នៅទីតាំងដែលរដ្ឋាភិបាលរៀបចំជូនពួកគេ»។
លោកបន្តថា៖ «យើងមិនបានកំណត់ចំនួនគ្រួសារក្នុងការចាកចេញទេ ប៉ុន្តែយើងបានជជែកគ្នាជាមួយពួកគាត់ពាក់ព័ន្ធនឹងទីតាំងមួយចំនួនដែលប៉ះពាល់ដល់ហេដ្ឋារចនាសម្ព័ន្ធបុរាណ ប៉ះពាល់តម្លៃស្នូលនៃរមណីដ្ឋានអង្គរ។ យើងឃើញថាពួកគាត់បានស្ម័គ្រចិត្តចាកចេញពីទីតាំងសំខាន់ៗទាំងនោះ»៕