វិទ្យាស្ថានពហុបច្ចេកទេសខេត្តពោធិ៍សាត់ ប្រកាសជ្រើសរើសយុវជនមកពីគ្រួសារក្រីក្រ និងគ្រួសារងាយរងហានិភ័យជិត ៣០០នាក់ ដើម្បីសិក្សាលើជំនាញវិជ្ជាជីវៈ និងបច្ចេកទេស កម្រិតសញ្ញាបត្របច្ចេកទេស និងវិជ្ជាជីវៈ១ (C1)។
ក្នុងសេចក្ដីជូនដំណឹងរបស់វិទ្យាស្ថានពហុបច្ចេកទេសខេត្តពោធិ៍សាត់ កាលពីថ្ងៃចន្ទ បានឱ្យដឹងថា ការជ្រើសយុវជនសម្រាប់បណ្ដុះបណ្ដាលជំនាញវិជ្ជាជីវៈ និងបច្ចេកទេសនេះ គឺស្របតាមយុទ្ធសាស្ត្របញ្ចកោណរបស់រដ្ឋាភិបាលអាណត្តិទី៧ ដំណាក់កាលទី១ ស្តីពីការបណ្តុះបណ្តាលបច្ចេកទេស និងវិជ្ជាជីវៈ ជូនប្រជាពលរដ្ឋមកពីគ្រួសារក្រីក្រ និងគ្រួសារងាយរងហានិភ័យទូទាំងប្រទេស ១,៥លាននាក់ ដោយឥតបង់ថ្លៃ។
វិទ្យាស្ថានពហុបច្ចេកទេសខេត្តពោធិ៍សាត់ បញ្ជាក់ថា ការបណ្តុះបណ្តាលបច្ចេកទេស និងវិជ្ជាជីវៈ គឺមានចំនួន ៩មុខជំនាញដូចជា ការងារកំបោរ ៣០នាក់ ការដំឡើងបណ្តាញអគ្គិសនីក្នុងអគារ ៣០នាក់ និងការដំឡើងប្រព័ន្ធបញ្ជាម៉ូទ័រអគ្គិសនី ៣០នាក់។
ការផ្សាអគ្គិសនី ៣០នាក់ ការថែទាំនិងជួសជុលរថយន្ត ៣០នាក់ ការរចនាក្រាហ្វិកដោយកុំព្យូទ័រ ៣០នាក់ សេវាកម្មកុំព្យូទ័រ ៣០នាក់ សេវាកម្មសម្អាងកាយ ៣០នាក់ និងសេវាកម្មបរិក្ខារត្រជាក់ក្នុងគេហដ្ឋាន ៣០នាក់។
ក្នុងលិខិតបន្ថែមថា លក្ខខណ្ឌចុះឈ្មោះ គឺយុវជនមានអាយុចាប់ពី ១៥ឆ្នាំ ដល់ ៤៥ឆ្នាំ ដែលមានបណ្ណសមធម៌(ក្រ១ ឬ ក្រ២) ឬបណ្ណសម្គាល់គ្រួសារងាយរងហានិភ័យ។
កាលបរិច្ឆេទទទួលពាក្យចាប់ពីថ្ងៃផ្សាយដំណឹងនេះតទៅ រហូតដល់ថ្ងៃទី១ ខែធ្នូ ឆ្នាំ២០២៣។
សិស្សដែលមកពីគ្រួសារក្រីក្រ និងងាយរង នឹងទទួលបានប្រាក់ឧបត្ថម្ភចំនួន ២៨០,០០០រៀល ក្នុង១ខែ ដោយសិក្សាពេញម៉ោងចាប់ពីថ្ងៃចន្ទ-សុក្រ និងថ្ងៃសៅរ៍-អាទិត្យ។
លោក កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា យុវជនដែលពុំទាន់មានជំនាញច្បាស់លាស់ គួរចាប់យកឱកាសចូលរៀនវគ្គជំនាញខ្លីដែលរដ្ឋាភិបាលផ្តល់ជូន តាមរយៈកម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស។
លោកបន្តថា យុវជនម្នាក់គួរមានជំនាញមួយច្បាស់លាស់ប្រចាំជីវិត ដើម្បីមានចំណេះដឹងមួយច្បាស់លាស់សម្រាប់ចិញ្ចឹមជីវិតខ្លួនឯង ជួយគ្រួសារ និងសង្គមជាតិ។
លោកថា ការបណ្ដុះបណ្ដាលជំនាញ គឺជាស្ពានអាចឱ្យយុវជនរកចំណូលបានសម្រាប់ខ្លួនឯង និងអាចមានលទ្ធភាពបន្តការសិក្សារហូតដល់ថ្នាក់ឧត្ដមសិក្សាទៀតផង។
លោកបញ្ជាក់ថា យុវជនមកពីគ្រួសារក្រីក្រ និងគ្រួសារងាយរងហានិភ័យ នឹងទទួលបានថវិកាឧបត្ថម្ភបន្ថែមចំនួន ២៨ម៉ឺនរៀល ក្នុង១ខែ ប៉ុន្តែយុវជនមកពីសេដ្ឋកិច្ចក្នុង ឬក្រៅប្រព័ន្ធ ឬកម្មករ និយោជិតដែលមានបំណងរៀនជំនាញបន្ថែម ក៏អាចចុះឈ្មោះចូលរៀនដោយឥតគិតថ្លៃផងដែរ តែមិនទទួលបានប្រាក់ឧបត្ថម្ភដូចយុវជនគ្រួសារក្រីក្រ និងងាយរងហានិភ័យនោះទេ។
អ្នកនាំពាក្យបន្ថែមថា មុខជំនាញសម្រាប់ជំហានដំបូងមាននៅក្នុងវិស័យអាទិភាពដូចជា វិស័យសំណង់ អគ្គិសនីនិងថាមពល អេឡិចត្រូនិក បរិក្ខារត្រជាក់និងកម្ដៅ កម្មន្តសាល មេកានិកទូទៅ ជួសជុលរថយន្ត ទេសចរណ៍ សេវាកម្ម កសិកម្ម និងកសិ-ឧស្សាហកម្ម ធុរកិច្ច និងព័ត៌មាន។
យុវជន ហំ រដ្ឋា មកពីគ្រួសារក្រីក្ររស់នៅក្នុងខេត្តពោធិ៍សាត់ បានឱ្យដឹងថា លោករីករាយខ្លាំងណាស់ ដែលរដ្ឋាភិបាល ផ្ដល់ឱកាសឱ្យសិក្សាជំនាញមួយ ដើម្បីងាយស្រួលក្នុងការប្រកបមុខរបរ ក៏ដូចរកប្រាក់ចំណូលប្រចាំថ្ងៃ ក្រោយពីសិក្សាជំនាញមួយច្បាស់លាស់។
លោកបន្ថែមថា៖ «ខ្ញុំនឹងចុះឈ្មោះចូលរៀនជំនាញជួសជុលគ្រឿងអេឡិចត្រូនិក ព្រោះជំនាញនេះកំពុងមានតម្រូវការក្នុងទីផ្សារ និងអាចរកចំណូលបានលឿនសម្រាប់ជួយសម្រាលបន្ទុកគ្រួសារ»។
ក្នុងពិធីប្រកាសដាក់ឱ្យអនុវត្តជាផ្លូវការកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ កាលពីទី១៤វិច្ឆិកា លោក ហ៊ុន ម៉ាណែត នាយករដ្ឋមន្ត្រី បានណែនាំដល់ក្រសួងការងារ និងបណ្ដុះបណ្ដាលវិជ្ជាជីវៈ ត្រូវសហការជាមួយក្រសួង ស្ថាប័ន រដ្ឋបាលរាជធានី ខេត្ត អាជ្ញាធរមូលដ្ឋាន និងដៃគូពាក់ព័ន្ធទាំងអស់ ផ្សព្វផ្សាយឱ្យបានទូលំទូលាយដល់គ្រួសារក្រីក្រ និងគ្រួសារងាយរងហានិភ័យ ព្រមទាំងបុគ្គលនៃសេដ្ឋកិច្ចក្រៅប្រព័ន្ធ និងក្នុងប្រព័ន្ធ អំពីឱកាសបណ្ដុះបណ្ដាល និងការចុះឈ្មោះរៀននៃកម្មវិធីខាងលើនេះ។
លោក ហ៊ុន ម៉ាណែត បានអំពាវនាវដល់អាណាព្យាបាលជួយជំរុញលើកទឹកចិត្ត និងបង្កលក្ខណៈងាយស្រួលដល់សមាជិកគ្រួសារឱ្យមកចុះឈ្មោះចូលរៀន និងមករៀនឱ្យបានទៀងទាត់ឱ្យចប់វគ្គបណ្តុះបណ្តាល ដើម្បីទទួលបានជំនាញមួយពិតប្រាកដ ដែលអាចទទួលបានការងារ និងមុខរបរសមរម្យ និងមានស្ថិរភាពចំណូល។
លោកក៏បានណែនាំក្រសួងការងារ និងបណ្ដុះបណ្ដាលវិជ្ជាជីវៈ ត្រូវគ្រប់គ្រងវត្តមានរបស់សិស្សឱ្យបានល្អ និងធានាបាននូវការប្រឡងបញ្ចប់វគ្គប្រកបដោយតម្លាភាព គុណភាព និងប្រសិទ្ធភាព៕