នៅរសៀលថ្ងៃទី០២ ខែមីនា ឆ្នាំ២០២៤ ឯកឧត្តមបណ្ឌិតនាយករដ្ឋមន្ត្រី ហ៊ុន ម៉ាណែត បានអនុញ្ញាតឱ្យ លោក Mario Vecchio អគ្គនាយកប្រតិបត្តិ និងជាប្រធានក្រុមហ៊ុន FreshStart Energy ចូលជួបសម្តែងការគួរសម និងពិភាក្សាការងារ ក្នុងឱកាសនៃកិច្ចប្រជុំកំពូលពិសេសអាស៊ាន-អូស្ត្រាលី នៅទីក្រុងមែលប៊ន ប្រទេសអូស្ត្រាលី។
យោងតាមលទ្ធផលនៃជំនួបដែលត្រូវបានបង្ហោះតាមតេឡេក្រាមឯកឧត្តមបណ្ឌិត ហ៊ុន ម៉ាណែត កាលពីថ្ងៃទី១ ខែមីនា ក្នុងឱកាសនៃកិច្ចប្រជុំនេះ លោក Mario Vecchio បានថ្លែងអំណរគុណចំពោះឯកឧត្តមបណ្ឌិតនាយករដ្ឋមន្ត្រី ហ៊ុន ម៉ាណែត ដែលបានចំណាយពេលវេលាអនុញ្ញាតឲ្យលោកចូលជួបសម្តែងការគួរសម និងពិភាក្សាការងារ។
នាយកប្រតិបត្តិបានជម្រាបឯកឧត្តមបណ្ឌិត ហ៊ុន ម៉ាណែត អំពីវឌ្ឍនភាពអាជីវកម្មរបស់ ក្រុមហ៊ុន FreshStart Energy ដែលជាក្រុមហ៊ុនបុត្រសម្ព័ន្ធរបស់ FreshStart ដែលបច្ចុប្បន្នកំពុងប្រតិបត្តិការនៅក្នុងប្រទេសអូស្ត្រាលី និងប្រទេសផ្សេងទៀតដូចជាសិង្ហបុរី និងប្រទេសថៃ ដែលបានប្រើប្រាស់បច្ចេកវិទ្យាទំនើប ដើម្បីគ្រប់គ្រងការប្រើប្រាស់អគ្គិសនីនៅក្នុងសាលារៀន មន្ទីរពេទ្យ និងស្ថានីយ៍ប្រេងឥន្ធនៈ។
លោកបានបន្ថែមថា ក្រុមហ៊ុនអភិវឌ្ឍបច្ចេកវិទ្យាទំនើបសម្រាប់ការប្រើប្រាស់អគ្គិសនីប្រកបដោយប្រសិទ្ធភាព គុណភាពខ្ពស់ និងសន្សំសំចៃ។ លោកនាយកប្រតិបត្តិ បានបង្ហាញពីចេតនាចង់វិនិយោគនៅកម្ពុជា ដោយនាំយកបច្ចេកវិទ្យាទំនើបមកគ្រប់គ្រងការប្រើប្រាស់អគ្គិសនី។
ជាការឆ្លើយតប ឯកឧត្តមបណ្ឌិត នាយករដ្ឋមន្ត្រី ហ៊ុន ម៉ាណែត បានស្វាគមន៍ និងរីករាយដែលបានជួបជាមួយនាយកប្រតិបត្តិ និងថ្លែងអំណរគុណដល់ ក្រុមហ៊ុន FreshStart Energy ដែលមានបំណងមកបណ្តាក់ទុននៅកម្ពុជា។
ឯកឧត្តមបណ្ឌិត នាយករដ្ឋមន្ត្រី បានសង្កត់ធ្ងន់ថា គោលដៅរបស់កម្ពុជាមិនត្រឹមតែពង្រឹង និងពង្រីកទំនាក់ទំនងរវាងរដ្ឋាភិបាល និងរដ្ឋាភិបាល និងការទំនាក់ទំនងរវាងប្រជាជន និងប្រជាជនប៉ុណ្ណោះទេ ប៉ុន្តែក៏ជាការផ្សារភ្ជាប់វិស័យឯកជន និងសាធារណៈនៃប្រទេសទាំងពីរផងដែរ។
ទាក់ទងនឹងវិស័យថាមពល ឯកឧត្តមបណ្ឌិត នាយករដ្ឋមន្ត្រី បានសង្កត់ធ្ងន់ថា ប្រទេសជាច្រើនក្នុងក្របខ័ណ្ឌតំបន់ និងពិភពលោកកំពុងយកចិត្តទុកដាក់យ៉ាងខ្លាំងចំពោះការផ្លាស់ប្តូរវិស័យថាមពល ហើយរាជរដ្ឋាភិបាលកម្ពុជាក៏កំពុងយកចិត្តទុកដាក់លើការអភិវឌ្ឍន៍វិស័យថាមពលនេះផងដែរ។
លើសពីនេះ ឯកឧត្តមបណ្ឌិត នាយករដ្ឋមន្ត្រី បានលើកទឹកចិត្តដល់ក្រុមហ៊ុននានាដែលមកទស្សនកិច្ចនៅកម្ពុជា ដើម្បីពិនិត្យលទ្ធភាពស្វែងរកឱកាសវិនិយោគនៅកម្ពុជា ដោយសហការជាមួយក្រុមប្រឹក្សាអភិវឌ្ឍន៍កម្ពុជា និងក្រសួងរ៉ែ និងថាមពល ដើម្បីឲ្យស្ថាប័នទាំងពីរជួយសម្រួល និងគាំទ្រក្នុងការរៀបចំ គម្រោងវិនិយោគរបស់ក្រុមហ៊ុននៅកម្ពុជា។