ក្រសួងមហាផ្ទៃបង្កើតក្រុមការងារសកម្មភាពជនពិការក្រសួងមហាផ្ទៃ ដើម្បីផ្ដល់ការពិគ្រោះយោបល់ជំនាញលើបញ្ហាពិការភាពនិងការស្ដារលទ្ធភាពពលកម្ម ដែលចូលរួមចំណែកបង្កើនឱកាសសម្រាប់ជនមានពិការភាពក្នុងជួររដ្ឋាភិបាល។
សេចក្ដីសម្រេចបង្កើតក្រុមការងារសកម្មភាពជនពិការក្រសួងមហាផ្ទៃដែលមានចុះហត្ថលេខានៅថ្ងៃទី២៦ ខែធ្នូ ឆ្នាំ២០២៣ ដោយលោក ស សុខា រដ្ឋមន្ត្រីក្រសួងមហាផ្ទៃ និងបានផ្សព្វផ្សាយជាសាធារណៈពីម្សិលមិញ។
សេចក្ដីសម្រេចនោះបញ្ជាក់ថា ក្រុមការងារនេះបង្កើតឡើងដោយយោងតាមតម្រូវការចាំបាច់របស់ក្រសួងមហាផ្ទៃ ដែលមានលោក ស សុខា រដ្ឋមន្ត្រីក្រសួងមហាផ្ទៃជាប្រធានកិត្តិយស មានលោក យុន ឈុន្នី រដ្ឋលេខាធិការក្រសួងមហាផ្ទៃជាប្រធាន និងមានអនុប្រធាន១៤នាក់ ព្រមទាំងសមាជិក៦នាក់។
លោក ស សុខា បានថ្លែងនៅក្នុងសេចក្ដីសម្រេចនោះថា ក្រុមការងារសកម្មភាពជនពិការក្រសួងមហាផ្ទៃមានតួនាទីនិងភារកិច្ចផ្ដល់ការពិគ្រោះយោបល់លើបញ្ហាពិការភាពនិងស្ដារលទ្ធភាពពលកម្ម រៀបចំគោលនយោបាយផែនការនិងយុទ្ធសាស្ត្រដែលមានការពាក់ព័ន្ធនឹងបញ្ហាពិការភាព។ ជាងនេះទៅទៀត គឺជំរុញការអនុវត្តគោលនយោបាយ ច្បាប់ និងបញ្ជាផ្សេងៗដែលពាក់ព័ន្ធនឹងបញ្ហាពិការភាពនិងស្ដារលទ្ធភាពពលកម្ម។
លោកបន្ថែមថា៖ «ពួកគេមានតួនាទីនិងភារកិច្ចលើសំណើជូនក្រុមប្រឹក្សាសកម្មភាពជនពិការភាព ដើម្បីកែសម្រួលធ្វើវិសោធកម្មគោលនយោបាយច្បាប់និងបទបញ្ជាផ្សេងៗពាក់ព័ន្ធនឹងបញ្ហាពិការភាព»។
លោក ស សុខា រដ្ឋមន្ត្រីក្រសួងមហាផ្ទៃពីម្សិលមិញ ក៏បានអញ្ជើញដឹកនាំកិច្ចប្រជុំផ្សព្វផ្សាយសេចក្តីសម្រេចបង្កើតក្រុមការងារសកម្មភាពជនពិការក្រសួងមហាផ្ទៃផងដែរ នៅទីស្ដីការរបស់ក្រសួងមហាផ្ទៃ។
លោក ទូច សុឃៈ អ្នកនាំពាក្យក្រសួងមហាផ្ទៃបានបញ្ជាក់ពីម្សិលមិញថា ក្រុមការងារសកម្មភាពជនមានពិការភាពក្រសួងមហាផ្ទៃជាក្រុមការងារមួយដែលខុសពីក្រសួងសង្គម អតីតយុទ្ធជន និងយុវនីតិសម្បទា ដែលទទួលបន្ទុកលើសកម្មភាពនិងជនមានពិការភាពទូទៅ។
លោកថា ចំណែកក្រុមការងារសកម្មភាពជនពិការក្រសួងមហាផ្ទៃ ជាមែកធាងមួយដែលចូលរួមជួយក្រោមឆ័ត្ររបស់ក្រុមប្រឹក្សាសកម្មភាពជនពិការភាពកម្ពុជា។ ក្រុមការងារសកម្មភាពជនពិការភាពក្រសួងមហាផ្ទៃមិនមែនទទួលបន្ទុករ៉ាប់រង ផ្គត់ផ្គង់ គាំទ្រការស្ដារយុវនីតិសម្បទារបស់ជនមានពិការភាពទូទៅនោះទេ។
លោកថា ក្រុមការងារសកម្មភាពជនពិការភាពថ្មីរបស់ក្រសួងមហាផ្ទៃស្ថិតនៅក្រោមក្រុមប្រឹក្សាសកម្មភាពជនពិការភាពរបស់កម្ពុជា ដែលក្រុមប្រឹក្សានេះជាជាយន្តការសម្របសម្រួលថ្នាក់ជាតិនិងពិគ្រោះយោបល់លើបញ្ហាពិការភាព ដែលបានបង្កើតឡើងកាលពីឆ្នាំ២០០៩។
លោកថា ក្រុមការងារនេះចូលរួមពិនិត្យមើលអំពីស្ថានភាពនៃពិការភាព មូលហេតុដែលនាំឱ្យមានពិការភាព ផ្ដល់យោបល់ពាក់ព័ន្ធនឹងពិការភាព ក៏ដូចជាការរៀបចំគោលនយោបាយផែនការសកម្មភាព៕