គណបក្សកុម្មុយនិស្តចិនបានត្រៀមខ្លួនជាស្រេចក្នុងការបន្តគាំទ្រដំណាក់កាលទី១នៃយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជាសម្រាប់អាណត្តិទី៧។
នេះត្រូវបានបញ្ជាក់ដោយលោកCai Qi សមាជិកគណៈកម្មាធិការអចិន្ត្រៃយ៍ នៃការិយាល័យនយោបាយ នៃគណៈកម្មាធិការមជ្ឈឹមបក្សកុម្មុយនីស្ដចិន និងជាប្រធានការិយាល័យកិច្ចការទូទៅនៃគណៈកម្មាធិការមជ្ឈឹមបក្សកុម្មុយនីស្ដចិននៅនៅព្រឹកថ្ងៃទី១៧ ខែតុលាឆ្នាំ២០២៣2023 ក្នុងជំនួបសម្តែងការគួរសមជាមួយឯកបណ្ឌិត ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជាដែលបានអញ្ជើញចូលរួមក្នុងវេទិកាខ្សែក្រវាត់និងផ្លូវលើកទី៣» នៅទីក្រុងប៉េកាំង ប្រទេសចិន។
ឯកឧត្តមបណ្ឌិត ហ៊ុន ម៉ាណែត បានថ្លែងអំណរគុណដល់គណបក្ស រដ្ឋាភិបាល និងប្រជាជនចិន ដែលបានជួយដល់ការអភិវឌ្ឍន៍សង្គមសេដ្ឋកិច្ចរបស់កម្ពុជា។ ឯកឧត្តមបណ្ឌិតបានបន្តទៀតថាលោកបានទៅបំពេញទស្សនកិច្ចនៅប្រទេសចិនចំនួនពីរលើករួចមកហើយបន្ទាប់ពីបង្កើតរាជរដ្ឋាភិបាលអាណត្តិទី៧ក្នុងខែសីហា ឆ្នាំ២០២៣។
លោក Qi បានស្វាគមន៍ចំពោះវត្តមានរបស់លោកនាយករដ្ឋមន្រ្តី និងគណៈប្រតិភូរាជរដ្ឋាភិបាលកម្ពុជា ហើយបានសម្តែងនូវទំនុកចិត្តថា ក្រោមការដឹកនាំរបស់ឯកឧត្តមបណ្ឌិត ហ៊ុន ម៉ាណែត ដំណើរការកសាងសហគមកម្ពុជា-ចិន ដែលមានជោគវាសនារួមគ្នានឹងត្រូវបានពង្រឹង និងពង្រីកបន្ថែមទៀត។ លោកក៏បានរំលឹកពីសមិទ្ធិផលដ៏ត្រចះត្រចង់ដែលកើតចេញពីកិច្ចសហប្រតិបត្តិការក្នុងក្របខណ្ឌនៃការផ្តួចផ្តើមខ្សែក្រវាត់ និងផ្លូវរវាងកម្ពុជា និងចិនអស់រយៈពេលជាងដប់ឆ្នាំ ដូចជាការអភិវឌ្ឍន៍តំបន់សេដ្ឋកិច្ចពិសេសក្រុងព្រះសីហនុ ផ្លូវល្បឿនលឿនភ្នំពេញ-ព្រះសីហនុ អាកាសយានដ្ឋានអន្តរជាតិសៀមរាបថ្មី និងគម្រោងសាងសង់ផ្លូវល្បឿនលឿនភ្នំពេញ-បាវិត។AKP