នគរបាលទីក្រុងហូជីមិញបានឃាត់ខ្លួនសមាជិកពីរនាក់នៃក្រុមរត់ពន្ធឧបករណ៍អេឡិចត្រូនិករាប់ម៉ឺនគ្រឿង រួមមានស្មាតហ្វូន កុំព្យូទ័រយួរដៃ និងថេប្លេត ដែលមានទំហំទឹកប្រាក់រហូតដល់១២ លានដុល្លារពីប្រទេសកម្ពុជា។
នគរបាលបានរាយការណ៍កាលពីថ្ងៃសៅរ៍ថា ខ្លួនបានអនុវត្តនីតិវិធីដើម្បីកាត់ទោសបុរសពីរនាក់ដែលមានឈ្មោះថាNgo Tan Datអាយុ៤២ ឆ្នាំ និង Nguyen Van Giangអាយុ ៣៧ ឆ្នាំ ពីបទរត់ពន្ធ។
ពួកគេត្រូវបានចាប់ខ្លួនកាលពីថ្ងៃព្រហស្បតិ៍ មួយសប្តាហ៍បន្ទាប់ពីនគរបាលបានស៊ើបអង្កេតរហូតឈានដល់ការចាប់ខ្លួនGiangដែលបានកំពុងរៀបចំដឹកជញ្ជូនប្រអប់ទូរស័ព្ទដៃជាច្រើនដោយគ្មានឯកសារត្រឹមត្រូវទៅកាន់ឃ្លាំងមួយក្នុងសង្កាត់៨ នៃទីក្រុងហូជីមិញ បន្ទាប់ពីទទួលបានឧបករណ៍ទាំងនោះពីអ្នកដឹកជញ្ជូន។
មន្រ្តីនគរបាលបានរឹបអូសយកទូរស័ព្ទខុសច្បាប់ និងនាំ Giangទៅកាន់ឃ្លាំងដែលពួកគេបានរកឃើញទូរស័ព្ទ iPhone ចំនួន ៣,៩៤៨ គ្រឿង ថេបប្លេតចំនួន ៣ គ្រឿង ឧបករណ៍កំណត់ទីតាំងចំនួន២០ និងកុំព្យូទ័រយួរដៃចំនួន១ គ្រឿង ដែលសុទ្ធតែមិនមានឯកសារបញ្ជាក់អោយបានត្រឹមត្រូវ។
នគរបាលបានរឹបអូសវត្ថុទាំងអស់នេះដែលមានតម្លៃប្រហែល១,២២ លានដុល្លារ ដើម្បីស៊ើបអង្កេតបន្ត។
បន្ទាប់ពីGiangបានផ្តល់សក្ខីកម្ម នគរបាលក៏បានឃាត់ខ្លួន Datដែលជាមេក្លោងទិញនិងដឹកជញ្ជូនឧបករណ៍អេឡិចត្រូនិកខុសច្បាប់ពីប្រទេសកម្ពុជាទៅកាន់ទីក្រុងហូជីមិញដើម្បីដាក់លក់តាំងពីខែធ្នូឆ្នាំ២០២១។
Datបានសារភាពថា ក្រុមរបស់ខ្លួន រួមទាំងសមាជិកម្នាក់ទៀតដែលរស់នៅក្នុងប្រទេសកម្ពុជា បានរត់ពន្ធទូរសព្ទដៃ កុំព្យូទ័រយួដៃ ថេបប្លេត និងឧបករណ៍ផ្សេងៗជាង ២២,០០០ គ្រឿង ដែលមានតម្លៃសរុប១២.២៣ លានដុល្លារ។
នគរបាលកំពុងតាមដានសមាជិកផ្សេងទៀតនៃក្រុមនេះក៏ដូចជាអ្នកដែលបានទិញរបស់រត់ពន្ធទាំងនេះផងដែរ។Tuoitre news