藝人朱千雪（Tracy）及劉佩玥（Moon）於觀塘，為金剛及小儀擔任主持的無綫節目《街坊廚神舌戰東京》進行拍攝。期間金剛及小儀呢對孖寶一碰頭就大放笑彈，當金剛攬實小儀膊頭合照時，即惹來記者笑指二人表現親密。小儀聞言就指自己與金剛是「最唔會傳緋聞的男女」，而金剛則反駁：「我不嬲都攬實佢啦，我哋係傳過最多緋聞嘅男女先啱！」而小儀又說：「但冇人信呢！哈哈！」

驚畀金剛整蠱

其後問到Tracy及Moon有否於拍攝時被金剛整蠱？Tracy笑言諗定以「搏同情」策略對付對方：「我哋都驚，應該會畀佢整蠱。佢地廚藝又好啲，所以我哋諗定策略，出街搵人試食時搏同情，等人哋投我票。（出動美色？）靠包裝。」

劉佩玥否認同何廣沛緋聞

談到二人的廚藝，Tracy自認有天分，又自封環保廚師：「我有天分，但冇咩人試過。我只買夠煮一次嘅材料，唔落鹽同油。」她又稱曾為男友炮製西餐及蛋糕作禮物。至於Moon笑言只是節日才會下廚，但亦曾為男友整便當。Moon被問到會否請緋聞男友伍允龍試菜？她說：「冇喎，好嘢梗係留畀屋企人！」而有指Moon與《律政強人》演員何廣沛傳緋聞？Moon作出否認，稱與對方是好朋友及好兄弟，強調只是朋友聚餐，無須特意闢謠。問到Moon認為伍允龍和何廣沛於當男友的角度，誰比較好？她稱兩位都是好朋友，既細心又會照顧人：「咁要問佢哋女朋友，先知佢哋做男友好唔好。」

朱千雪十一月拍新劇

此外，提到有指Tracy因要讀書而讓出《律政強人》女一之位，令李佳芯有機會補上。問她會否對此感可惜？Tracy直言不知情，又笑言全家都愛睇李佳芯的演出：「《律》劇冇搵過我，所以我唔覺可惜。但我十一月寒假時都會拍《踩過界》做醫生。（你覺得如果你做《律》女一會更好？）我全家都鍾意睇李佳芯，晚晚睇。反而如果我演，我爸媽可能唔睇呢。」