Boer ver agter bakkie gesleep
2011-05-01 23:34
- Artikelopsies
- Deel
- Kry Beeld op
’n Boer van Ottosdal in Noordwes is eergisteraand vermoor en meer as ’n kilometer ver agter sy bakkie aangesleep.
Mnr. André (Brood) van der Merwe (49), wat ongetroud was, is in die agterkop, in die bors en in die wang geskiet op sy plaas sowat 10 km uit die dorp op die Lichtenburgpad, het brig. Thulani Ngubane, kommunikasiehoof van die polisie in Noordwes, gesê.
Hy het bevestig Van der Merwe is sowat 1,2 km agter die bakkie aangesleep.
Volgens Ngubane het die bakkie omgeslaan terwyl Van der Merwe nog daaraan vas was, maar ’n man wat op die toneel was en nie sy naam wou verskaf nie, het gesê die lyk is in die wenakker gevind en die bakkie was nie meer daar nie.
Drie mans is reeds in verband met die moord in hegtenis geneem, waarvan een in die omgeslaande bakkie gevind is.
Van der Merwe het onlangs blaaskanker met die hulp van chemoterapie oorwin, het mnr. Koos Weideman, ’n buurman en huisvriend, gesê.
“’n Soort blaaskanker is verlede jaar by hom gediagnoseer en hy het chemoterapie gekry.”
Weideman het gesê Van der Merwe het sowat drie jaar gelede ook “’n klomp hartaanvalle” gekry.
Volgens Weideman het sy seun, Louis (22), en ’n paar jong mans eergisteraand op Van der Merwe se lyk afgekom.
“André se vriendin (me. Petra Pretorius) kon hom nie in die hande kry nie en het toe my seun gebel.”
Weideman, wat tydens die voorval in Margate was, het gesê sy seun en die mans saam met hom het op die sleepspoor afgekom en dit gevolg.
“My seun het my so 21:30 gebel en gesê hulle is op die spoor, maar hulle sien baie bloed. Hulle het toe op die lyk afgekom.”
Weideman het gesê sy seun is erg geskok.
Mnr. Robert Nel, ’n boer in die omgewing, het gesê Van der Merwe het ook by Swarico-afslaers gewerk en was ’n bekende in die gemeenskap wat daarvan gehou het om grappe te maak.
“Verlede jaar is daar ’n kluis uit sy huis gesteel wat toe in die lande gekry is.”
Die drie verdagtes is in aanhouding en sal na verwagting môre in die hof verskyn.
Mnr. Pieter Groenewald, leier van die VF+ in Noordwes, het gister in ’n verklaring gesê die wrede moord op Van der Merwe is “niks meer as rassisme nie”.
“Die regering en die minister van polisie is laks om op te tree teen plaasaanvallers en die landelike beveiligingsplan bestaan slegs in teorie, maar nie in die praktyk nie.”