វៀតណាម និងកម្ពុជានឹងពង្រឹងការតភ្ជាប់សេដ្ឋកិច្ច ជាពិសេសការតភ្ជាប់ការដឹកជញ្ជូនរវាងប្រទេសទាំងពីរ បង្កើតលក្ខខណ្ឌចាំបាច់សំខាន់ៗជាមុនដើម្បីបង្កើនកិច្ចសហប្រតិបត្តិការទ្វេភាគីលើវិស័យផ្សេងៗទៀត។
ការឯកភាពនេះត្រូវបានសម្រេចក្នុងកិច្ចប្រជុំនៅទីក្រុងមែលប៊ន ប្រទេសអូស្ត្រាលី កាលពីថ្ងៃទី៦ ខែមីនា ក្នុងជំនួបរវាងលោកនាយករដ្ឋមន្រ្តី ហ៊ុន ម៉ាណែត និងលោក Pham Minh Chinhនាយករដ្ឋមន្រ្តីវៀតណាមក្នុងអំឡុងកិច្ចប្រជុំកំពូលពិសេសអាស៊ាន-អូស្ត្រាលី ដើម្បីរំលឹកខួប ៥០ឆ្នាំនៃទំនាក់ទំនងភាពជាដៃគូ។
លោក លោក Pham Minh Chinhនាយករដ្ឋមន្រ្តីវៀតណាមបានអបអរសាទរកម្ពុជាដែលបានរៀបចំការបោះឆ្នោតព្រឹទ្ធសភានាពេលថ្មីៗនេះដោយជោគជ័យ ដោយលទ្ធផលនៃការបោះឆ្នោតបានបញ្ជាក់ពីតួនាទីដឹកនាំរបស់គណបក្សប្រជាជនកម្ពុជានៅក្នុងប្រទេស។
លោកបានផ្ញើសារសួរសុខទុក្ខជូនចំពោះសម្តេចតេជោ ហ៊ុន សែន និងថ្នាក់ដឹកនាំជាន់ខ្ពស់ផ្សេងទៀតនៃគណបក្សប្រជាជនកម្ពុជា ហើយបានពាំនាំនូវការគោរពជូនពររបស់អគ្គលេខាបក្ស Nguyen PhuTrong និងថ្នាក់ដឹកនាំជាន់ខ្ពស់នៃប្រទេសវៀតណាម ជូនចំពោះព្រះករុណា ព្រះមហាក្សត្រ នរោត្តម សីហមុនី និងសម្តេចតេជោ ហ៊ុន សែន។
នាយករដ្ឋមន្ត្រីវៀតណាមក៏បានអបអរសាទរដល់កម្ពុជាចំពោះសមិទ្ធិផលអភិវឌ្ឍន៍សេដ្ឋកិច្ចដែលសម្រេចបានក្នុពេលថ្មីៗនេះដែរ។
នាយករដ្ឋមន្ត្រីទាំងពីរបានសម្តែងនូវសេចក្តីរីករាយចំពោះការអភិវឌ្ឍន៍ប្រកបដោយភាពវិជ្ជមាន និងស្ថិរភាពនៃទំនាក់ទំនងវៀតណាម-កម្ពុជានាពេលថ្មីៗនេះ ដោយបានកត់សម្គាល់ថា មេដឹកនាំនៃប្រទេសទាំងពីររក្សាបាននូវដំណើរទស្សនកិច្ចជាទៀងទាត់ និងទំនាក់ទំនងកម្រិតខ្ពស់ ខណៈដែលយន្តការកិច្ចសហប្រតិបត្តិការទ្វេភាគីបង្ហាញថាមានប្រសិទ្ធភាព។
ភាគីទាំងពីរបានឯកភាពបង្កើនប្រសិទ្ធភាពនៃកិច្ចសហប្រតិបត្តិការសេដ្ឋកិច្ច-ពាណិជ្ជកម្ម-វិនិយោគ និងទន្ទឹមនឹងនោះ ដើម្បីជំរុញការតភ្ជាប់រវាងសេដ្ឋកិច្ចទាំងពីរ ជាពិសេសការតភ្ជាប់ការដឹកជញ្ជូន ដើម្បីពង្រឹងកិច្ចសហប្រតិបត្តិការលើវិស័យផ្សេងៗទៀត។
ភាគីទាំងពីរបានឯកភាពគ្នាក្នុងការសម្របសម្រួល និងអនុវត្តកិច្ចព្រមព្រៀង និងយន្តការដែលមានស្រាប់លើវិស័យការពារជាតិ និងសន្តិសុខ ព្រមទាំងខិតខំប្រឹងប្រែងបន្ថែមទៀតដើម្បីបំពេញការងារដែលនៅសេសសល់ ១៦% នៃការបោះបង្គោលព្រំដែន ដើម្បីកសាងព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាព។
លោកនាយករដ្ឋមន្រ្តី ហ៊ុន ម៉ាណែតបានលើកឡើងថា កម្ពុជានឹងបន្តបង្កើតលក្ខខណ្ឌអំណោយផលសម្រាប់ធុរកិច្ចវៀតណាមក្នុងការវិនិយោគ និងធ្វើអាជីវកម្មដោយជោគជ័យនៅកម្ពុជា។
លោកបានស្នើឱ្យបង្កើនជើងហោះហើរត្រង់រវាងប្រទេសទាំងពីរ ដើម្បីបង្កើនទំនាក់ទំនងទេសចរណ៍ និងពាណិជ្ជកម្ម។
នាយករដ្ឋមន្ត្រីទាំងពីរបានឯកភាពបន្តកិច្ចសហប្រតិបត្តិការជិតស្និទ្ធរវាងប្រទេសទាំងពីរ ក៏ដូចជាជាមួយឡាវ និងថៃ ដើម្បីតភ្ជាប់ចរាចរណ៍ និងទាញយកសក្តានុពលទេសចរណ៍នៃប្រទេសទាំងពីរ ផងដែរ។VOV