ဧရာဝတီတိုင်း၊ ဟင်္သာတခရိုင်၊ လေးမျက်နှာမြို့နယ်မှာ စပါးရိတ်နေတဲ့ လယ်သမား ၆ ဦးကို အောက်တိုဘာ ၁၇ ရက်မှာ ရဲတပ်ဖွဲ့ဝင်တွေက ဖမ်းဆီးသွားတယ်လို့ တောင်သူတွေက ပြောပါတယ်။
အောက်တိုဘာ ၁၇ ရက် မနက်ပိုင်းက လေးမျက်နှာလမ်းမကြီးမှာ လူကြီးလမ်းကြောင်း လာနေစဉ် ထော်လာဂျီနဲ့ စပါးတိုက်နေတဲ့ တောင်သူ ၁ ဦး ဖမ်းဆီးခံခဲ့ရသလို အနီးနားမှာ စပါးရိတ်နေတဲ့ တောင်သူ ၅ ဦးပါ ဖမ်းဆီးခံခဲ့ရပါတယ်။
လယ်သမားမိသားစုဝင်တဦးက “ဒီရက်ထဲ မိုးလေးနားပြီး နေလေးပူတော့ ရိတ်တဲ့သူက ရိတ်တိုက်ပြီး လှမ်းတဲ့သူက လှမ်းပေါ့။ ထော်လာဂျီနဲ့ စပါးသယ်နေတာကို လူကြီးလမ်းကြောင်းလာနေတာ မသိဘူးလားဆိုပြီး ဖမ်းလိုက်တယ်။ စပါးရိတ်နေတဲ့ တောင်သူ ၅ ယောက်ကလည်း ဘာဖြစ်လို့လဲဆရာလို့ မေးတာ သူတို့ကိုပါ ဖမ်းသွားတယ်။ ညဘက်ရိတ်လည်း ညမထွက်ရအမိန့် ချိုးဖောက်တယ်ဆိုပြီး ဖမ်း၊ နေ့ဘက်ရိတ်လည်း ဖမ်းဆိုတော့ တောင်သူတွေက ဘာလုပ်ရမှန်း မသိတော့ပါဘူး” လို့ ပြောပါတယ်။
ဖမ်းဆီးခံရတဲ့ တောင်သူ ၆ ဦးကို လေးမျက်နှာမြို့မ ရဲစခန်းအချုပ်မှာ ထိန်းသိမ်းထားပြီး မိသားစုနဲ့ တွေ့ခွင့်ပေးပေမဲ့ ဘာအမှုနဲ့ ဖမ်းဆီးထိန်းသိမ်းထားတယ်ဆိုတာ မသိသေးဘူးလို့ သူက ဆက်ပြောပါတယ်။
လေးမျက်နှာမြို့မှာ စက်တင်ဘာနဲ့ အောက်တိုဘာလက မိုးသည်းထန်စွာ ရွာသွန်းတာကြောင့် စပါးဧက ၅,၀၀၀ နီးပါး ရေနစ်မြုပ်ခဲ့သလို ဧက ၈၀၀ နီးပါးလည်း ပျက်စီးခဲ့ပါတယ်။
