|
A Weihnochtsgschichtl!
Sunntåg, 1. Advent, 18:00 Uhr In da Reihenhaussiedlung Turdanitsch losst sich die Pensionistin Greti F. von iam Enkale Hansi R. drei Elektrokeazalan auf da Fenstabånk von ihra Kuchl aufschtölln. Vuaweihnåchtliche Stimmung kummt auf. Die Freid is groß.
18:14 Uhr Beim auslaan vom Mistkibl sigt da Nåchba von da Greti, da Wülfried P., de provokante Weihnochtsoffensive im Nochbahaus und kontat glei amol mit an 15-årmign, dänischn Keaznset im Wohnzimmafensta. Minutn späta leichtat gonz Turdanitsch im Glonz von 128 Fenstadekorationan.
19:03 Uhr Im 7 km entfeantn Draukråftweak beim Wollanig meakt da Wåchhåbende Inschiniöa an Defekt von die Strommessgerätschåftn fia'n Bereich Tschinowitsch/Turdanitsch, denkt sich oba daweil noch nix dabei.
20:17 Uhr Dem Ehepoa Wally und Gernot R. gelingt da Ånschluss ana Kettnschåltung von 96 Halogen-Fülmleichtn, quea duach senan Obstgoatn åns Stromnetz von da KELAG. A Teil von da heimischn Voglwölt fångt komplett vawirrt mit'm Nestale baun ån.
20:56 Uhr Den Nåchtclubbesitza Harry S. zipft des gonze ån und er montiat auf'm Flochdoch von seim Heisl dås "Laserensemble Metropolis", wås zu die Leistungsstärkstn von Europa zöhlt. Die 150m² Fassadn von an ångrenzendn Getreidesilo håltet dem Dauafeia von da Nikolausprojektion anige Minutn stånd, bevur a mit an lautn Klescha zommanbreslt.
21:30 Uhr Im Wiabl von da Weihnåchtsfeia im Draukråftweak am Wollanig heat kana den Alarm von da Genaratoahalle 5…
21:50 Uhr Da 85 jährige zåhnlose Kriagsvetaran Josef F. zaubat mit 150 Flackscheinweafa vom Typ "Varta Vokssturm" den Stean von Bethlehem in Nåchthimml.
22:12 Uhr A Tschippl von asiatische G'schäftsleit mit leichtm Gepäck und dinne Fetzn ån, hatscht völlig durchanånda durch Turdanitsch. Kuaz vuaher is a Boing 747 von da Singapur Airlines mit'm Zül "Bangkok" vasehentlich auf da Garaschneinfoat von da Bäckarei Wieser, de mit 3000 bunte Neonreadln ausgepflåstat is, glåndet.
22:37 Uhr Die NASA Raumsondn "Voyager 7" sendat vom Rånd da Mülchstroßn Bülda von ana ångeblichn "Supanova" auf da nöadlichn Eadhålbkugl. Die Wissnschofta in Houston san volle råtlos.
22:50 Uhr A leicht's Bebn beitlt des Draukråftweak beim Wollanig duachanånd. Da gånze Komplex tscheppat mit åll' seine Tuabinan auf 600 Megawatt weit iba da Belåstungsgrenz dahin.
23:06 Uhr Im tåghöll beleichtatn Turdanitsch wocht die Frisearin Hölga Z. auf und g'freit sich iba den sunnign Dezembamuagn. Um gånz genau 23:12 Uhr und 12 Sekundn druckt se auf'n Schålta von ihra Kaffeemaschin…
23:12 Uhr und 14 Sekundn In die gache Finstanis in gånz Villach und Umgebung klescht die Explosion vom Draukråftweak am Wollanig eine. Duach die stockfinstan Uatschåftn lafn vawirrt Leit, Leit wia Du und i, denan a Keazale am Adventkrånz nit gnua wår. |
|